ប្រទេសវៀតណាម ៖ ឈើប្រណីតរាប់ពាន់ម៉ែត្រការ៉េ នៅក្នុងរោងចក្រឈើមួយកន្លែងរបស់ប្រទេសវៀតណាមត្រូវអគ្គិភ័យឆាបឆេះយ៉ាងសន្ធោសន្ធៅ និងបង្កឱ្យមានផ្សែងខ្មៅហុយឡើងកម្ពស់រាប់សិបម៉ែត្របង្កឱ្យមានការភ្ញាក់ផ្អើលកាលពីព្រឹកព្រលឹមទៀបភ្លឺ ថ្ងៃទី១៧ ខែមករា ឆ្នាំ២០២៤។
យោងតាមសារព័ត៌មានវៀតណាម «VN Express» បានប្រាប់ឱ្យដឹងថា «រោងចក្រនេះ គឺជាកម្មសិទ្ធិរបស់ក្រុមហ៊ុនឈើ Lam Giang Industrial Wood មានទីតាំងនៅតាមបណ្តាយផ្លូវជាតិលេខ១ ស្ថិតក្នុងឃុំថាច់ឡុង ស្រុកថាច់ហាខេត្ត Ha Tinh ដែលជាខេត្តឆ្នេរសមុទ្រភាគខាងជើងប្រទេសវៀតណាម»។
តាមសាក្សីនៅកន្លែងកើតហេតុ បានប្រាប់ឱ្យដឹងថា «អគ្គិភ័យនេះចាប់ផ្តើមដំបូងចេញពីតំបន់រោងចក្រឈើ នៅម៉ោងប្រហែល១ទៀបភ្លឺ ហើយរោងចក្រនេះ មានស្តុកបន្ទះឈើរាប់ម៉ឺនសន្លឹកនៅខាងក្នុង និងមានអណ្ដាតភ្លើងឆាបឆេះរាលដាលយ៉ាងលឿន»។
ប្រជាពលរដ្ឋម្នាក់រស់នៅក្បែរកន្លែងកើតហេតុ បាននិយាយដែរថា «មុនកើតហេតុ គាត់កំពុងតែដេកលង់លក់ ស្រាប់តែឮសំឡេងផ្ទុះ២គ្រា.ប់ ។ ដំបូងឡើយ គាត់គិតថា វាគឺជាគ្រោះថ្នាក់ចរាចរណ៍ធ្ងន់ធ្ងរតែប៉ុណ្ណោះ។ ប៉ុន្តែពេលគាត់ចេញពីផ្ទះ គាត់ក៏បានឮសំឡេងស្រែកថា ផ្សែងហុយៗ និងស៊ីរ៉ែនរថយន្តពន្លត់អគ្គិភ័យបន្លឺឡើងជាបន្តបន្ទាប់ ខណៈដែលឃើញកម្មករក្នុងរោងចក្រប្រញាប់ប្រញាល់ប្រមែប្រមូលគ្រឿងសង្ហារិម និងរបស់របរផ្សេងៗ រត់គេចចេញពីអគ្គិភ័យនោះ»។
ប្រភពដដែលបន្តថា ចំណែកកងកម្លាំងនៃនាយកដ្ឋាននគរបាលពន្លត់អគ្គិភ័យ និងសង្គ្រោះដែលប្រចាំនៅខេត្ត Ha Tinh ក៏បានបញ្ជូនរថយន្តពន្លត់អគ្គិភ័យជាច្រើនគ្រឿង និងកងកម្លាំងរាប់សិបនាក់ទៅដល់កន្លែងកើតហេតុ ដើម្បីបាញ់ទឹកពន្លត់ភ្លើង។ លុះរហូតឈានមកដល់ម៉ោង៧ព្រឹកអណ្ដាតភ្លើងក៏បានរលត់ទៅវិញ ប៉ុន្តែមិនទាន់រលត់ទាំងស្រុងនោះទេ ព្រោះផ្នែកដំបូលរោងចក្រនៅតែមានភ្លើងឆាបឆេះយ៉ាងសន្ធោសន្ធៅនៅឡើយ។ ចំណែករថយន្តពន្លត់អគ្គិភ័យក៏បន្តប្រយុទ្ធប្រឆាំងជាមួយនឹងអណ្តាតភ្លើងដោយការបូមទឹកចេញពីបឹងជុំវិញយកមកពន្លត់ភ្លើងបន្តទៀត»។
តាមរបាយការណ៍បឋម បានបង្ហាញឱ្យដឹងថា អគ្គិភ័យខាងលើនេះមិនបណ្តាលឱ្យមនុស្សណាម្នាក់បាត់បង់អាយុជីវិតនោះទេ ប៉ុន្តែឈើប្រណីតរាប់តោនត្រូវបានបំផ្លាញទាំងស្រុងដែលគិតជាទឹកប្រាក់អស់ជាច្រើនពាន់លានដុង»។
យ៉ាងណាក៏ដោយ គេនៅមិនទាន់បញ្ជាក់អំពីមូលហេតុនៅពីក្រោយ ដែលបណ្តាលឱ្យកើតមានគ្រោះអគ្គិភ័យនៅក្នុងរោងចក្រឈើនេះនៅឡើយទេ ស្របពេលដែលប៉ូលិសខេត្ត Ha Tinh កំពុងតែចុះពិនិត្យកន្លែងកើតហេតុដើម្បីបើកការស៊ើបអង្កេតរកមូលហេតុ។
គួរកត់សម្គាល់ថា នាដើមឆ្នាំ២០២៤នេះ ប្រទេសវៀតណាម តែងតែកើតមានគ្រោះអគ្គិភ័យជាញឹកញាប់តែភាគច្រើនលើសំណង់លំនៅដ្ឋាន ដោយបានសម្លាប់មនុស្សអស់ជាច្រើននាក់ប៉ុន្តែសម្រាប់អគ្គិភ័យឆាបឆេះរោងចក្រស្រដៀងគ្នានឹងករណីខាងលើនេះវិញ គេនៅចាំបានថា កាលពីខែវិច្ឆិកា ឆ្នាំ២០២៣ អគ្គិភ័យបានឆាបឆេះរោងចក្រផលិតគ្រឿងសង្ហារឹម និងបំផ្លិចបំផ្លាញឈើរាប់ពាន់ម៉ែត្រការ៉េស្ថិតក្នុងក្រុងTan Uyen ហើយកាលពីខែសីហា ឆ្នាំ២០២៣នេះដែរ អគ្គិភ័យក៏បានឆេះរោងចក្រជាច្រើនដែលនៅជាប់ៗគ្នាក្នុងពេលតែមួយស្ថិតក្នុងទីក្រុង Thuận An ខេត្ត Binh Dương៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ