ក្រុងប៉ោយប៉ែត ៖ បុរសចំណាស់ជនជាតិសៀមម្នាក់បានស្លា.ប់នៅតាមដងផ្លូវ ខណៈកំពុងជិះរថយន្តមកពីខេត្តកំពង់ចាមជាមួយកូននិងកូនប្រសា ហើយសពត្រូវបានដឹកយកមកតម្កល់នៅ ក្នុងវត្តរតនារាម ហៅវត្តផ្សារកណ្តាល ស្ថិតក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ក្រុងប៉ោយប៉ែត កាលពីវេលាម៉ោង៨យប់ ថ្ងៃទី២៥ ឧសភា
ក្រុងប៉ោយប៉ែត ៖ បុរសចំណាស់ជនជាតិសៀមម្នាក់បានស្លាប់នៅតាមដងផ្លូវ ខណៈកំពុងជិះរថយន្តមកពីខេត្តកំពង់ចាមជាមួយកូននិងកូនប្រសា ហើយសពត្រូវបានដឹកយកមកតម្កល់នៅ ក្នុងវត្តរតនារាម ហៅវត្តផ្សារកណ្តាល ស្ថិតក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ក្រុងប៉ោយប៉ែត កាលពីវេលាម៉ោង៨យប់ ថ្ងៃទី២៥ ឧសភា ។ ទាំងសពទាំងកូននិងកូនប្រសាត្រូវគេសង្ស័យថា ចូលមកដីខ្មែរដោយខុសច្បាប់ ព្រោះពេលសួរនាំពួកគេឆ្លើយថា លិខិតឆ្លងដែនភ្លេចនៅឯស្រុកម្តាយចុងជាខ្មែរនៅឯខេត្តកំពង់ចាម ឯទិដ្ឋាការឆ្លងដែនរបស់សពប្រាប់ថា បាត់រកមិនឃើញ ។
សាកសពនិងកូន ព្រមទាំងកូនប្រសាទាំង៣នាក់នោះ ១-ឈ្មោះអំផាន់ ភូបានឈឺន អាយុ៥២ឆ្នាំ (សព) ២-ឈ្មោះវ៉ាសនា ភូបានឈឺន ភេទប្រុស អាយុ២០ឆ្នាំ ជាកូន និង៣-ឈ្មោះកាល់ ឡាយ៉ា សែនយ៉ាមូន ភេទស្រី អាយុ២០ឆ្នាំ ជាកូនប្រសា ពួកគេមកពីភូមិណងវ៉ា ឃុំឃូខាត ស្រុកបួយ៉ា ខេត្តនគរាជសីមា ប្រទេសសៀម ។
បើតាមការឱ្យដឹងពីស្ត្រីឈ្មោះភី ឆេងស៊ឹម អាយុ៤២ឆ្នាំ មានទីលំនៅក្នុងឃុំបឹងកុក ក្រុងកំពង់ចាមថា បុរសសៀមដែលស្លាប់នេះ ជាប្តីរបស់ខ្លួនបានគ្នា១៧ឆ្នាំហើយ ។ ប្តីគាត់បានស្លាប់លើរថយន្ត ខណៈពួកគាត់កំពុងធ្វើដំណើរមកពីលេងស្រុកកំណើតឯខេត្តកំពង់ចាម។ ស្ត្រីខ្មែរជាប្រពន្ធបន្តថា មុនពេលស្លាប់ប្តីរបស់គាត់មានអាការមិនស្រួលខ្លួនតាមផ្លូវចាប់ពីខេត្តបាត់ដំបងមក ហើយក៏បានស្លាប់នៅលើរថយន្តតែម្តង ។
សាកសពត្រូវបានមន្ត្រីការិយាល័យទំនាក់ទំនងព្រំដែននៃប្រទេសទាំង២សម្របសម្រួលគ្នាដឹកបញ្ជូនត្រឡប់ទៅស្រុកសៀមវិញនៅវេលាម៉ោងជិត៧យប់ ថ្ងៃទី២៦ ឧសភា។ ដោយឡែក២នាក់ប្តីប្រពន្ធដែលជាកូន និងកូនប្រសាត្រូវបានគេឱ្យអង្គុយក្នុងរថយន្តដឹកសពទៅស្រុកវិញ ព្រោះតែគ្មានលិខិតឆ្លងដែនត្រឹមត្រូវ ថែមទាំងគ្មានអត្តសញ្ញាណប័ណ្ណជាប់ខ្លួនទៀតផង៕
ចែករំលែកព័តមាននេះ