រាជធានីភ្នំពេញ ៖ ថ្លែងពីប្រទេសបារាំង សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងប្រាប់អ្នករិះគន់ថា ជំនួបសំណេះសំណាលនាពេលនេះ មិនមែនជាការទិញទឹកចិត្តឡើយ ដូច្នេះ អ្នករិះគន់ទាំងនោះ កុំមើលស្រាលប្រជាពលរដ្ឋខ្មែរដែលរស់នៅក្រៅប្រទេស ។
នាឱកាសអញ្ជើញជាអធិបតីជួបសំណេះសំណាលជាមួយបងប្អូនសហគមន៍ខ្មែរ រស់នៅក្នុងទ្វីបអឺរ៉ុប នៅថ្ងៃទី១៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងអរគុណដល់ប្រជាពលរដ្ឋខ្មែរ ដែលធ្វើដំណើរដើម្បីចូលរួមកម្មវិធីសំណេះសំណាលនាពេលនេះ ។
សម្ដេចធិបតីនាយករដ្ឋមន្ត្រីកម្ពុជាបានគូសញ្ជាក់យ៉ាងដូច្នេះថា៖ «ខ្ញុំសូមអរគុណចំពោះការចូលរួម និងឆ្លៀតឱកាសជួបជុំគ្នានៅថ្ងៃនេះ ហើយនេះ គឺបង្ហាញអំពីស្មារតី នៃការសាមគ្គីគ្នា ការស្រលាញ់គ្នា រាប់អានគ្នា ក្នុងនាមជាប្រជាតិខ្មែរតែមួយ ហើយទាំងអស់នេះ ខ្ញុំគិតថា មិនមែនជាការទិញទឹកចិត្តនោះទេ។
ថ្លែងប្រាប់ក្រុមប្រឆាំង និងអ្នកដែលតែងតែរិះគន់សម្ដេចធិបតីបានលើកឡើងថា «អ្នកខ្លះគេថា ឱ្យតែរាជរដ្ឋាភិបាល ជួបប្រជាពលរដ្ឋខ្មែរ ត្រូវតែទិញទឹកចិត្ត បានមានអ្នកចូលរួម ។ ខ្ញុំសូមជូនដំណឹងទៅអ្នកទាំងនោះវិញថា សូមកុំមើលស្រា លប្រជាពលរដ្ឋខ្មែរ ស្មារតីនៃការរួមគ្នា ក្នុងនាមជាខ្មែរនេះ គេហៅថា ឈាមខាប់ជាងទឹក នៅទីណាក៏ដោយ សុខចិត្តឈាមចូលគ្នា ដើម្បីជួបជុំគ្នា ហើយបង្ហាញស្មារតីអំពីការរាប់អានគ្នា ជាពិសេសចង់ដឹងប្រទេសជាតិរបស់ខ្លួន»។
ជាមួយគ្នានោះដែរ សម្ដេចនាយករដ្ឋមន្ដ្រីបន្ថែមថា ប្រជាពលរដ្ឋខ្មែររស់នៅទីណាក៏ដោយ គឺនៅតែគិតអំពីប្រទេសជាតិរបស់ខ្លួន។ ដូច្នេះ ការជួបជុំគ្នា នាពេលនេះ គឺពួកគាត់ចង់ដឹងអំពីស្ថានភាពនៅប្រទេសកម្ពុជា តើរដ្ឋាភិបាលធ្វើអ្វីខ្លះ? សម្រាប់ប្រជាពលរដ្ឋខ្មែរ៕
ចែករំលែកព័តមាននេះ