រាជធានីភ្នំពេញ ៖ ថ្ងៃទី២៧ ឧសភា ២០១១ នេះ លំហាត់សមយុទ្ធឆ្មាំអង្គរ បានបញ្ចប់ជាផ្លូវការហើយ ដោយមានពិធីបិទនៅសាលាហ្វឹកហ្វឺនសម្រាប់កម្លាំងថែរក្សាសន្តិភាពពហុជាតិ វេលាម៉ោង៣រសៀលក្នុងខេត្តកំពង់ស្ពឺ ។ យោងតាមព័ត៌មានពីមន្ត្រីក្រសួងការពារជាតិ បានឱ្យដឹងថា លោកនាយឧត្តមសេនីយ៍ទៀ បា.ញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ
រាជធានីភ្នំពេញ ៖ ថ្ងៃទី២៧ ឧសភា ២០១១ នេះ លំហាត់សមយុទ្ធឆ្មាំអង្គរ បានបញ្ចប់ជាផ្លូវការហើយ ដោយមានពិធីបិទនៅសាលាហ្វឹកហ្វឺនសម្រាប់កម្លាំងថែរក្សាសន្តិភាពពហុជាតិ វេលាម៉ោង៣រសៀលក្នុងខេត្តកំពង់ស្ពឺ ។
យោងតាមព័ត៌មានពីមន្ត្រីក្រសួងការពារជាតិ បានឱ្យដឹងថា លោកនាយឧត្តមសេនីយ៍ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ នឹងធ្វើជាអធិបតីក្នុងពិធីបិទនោះនិងមានការអញ្ជើញចូលរួមពីឧត្តមសេនីយ៍ត្រី Alexander Kozlov មេបញ្ជាការរងមកពី បញ្ជាការដ្ឋានកងទ័ពសហរដ្ឋអាមេរិកប្រចាំនៅតំបន់ប៉ាស៊ីហ្វិក ។
លោកទាំងពីរនឹងថ្លែងសុន្ទរកថាក្នុងពិធីនោះ ។ លំហាត់សមយុទ្ធឆ្មាំអង្គរឆ្នាំ២០១១ គឺជាលំហាត់ហ្វឹកហ្វឺនពហុភាគីគាំទ្រប្រតិបត្តិការគាំពារសន្តិភាព ដែលឧបត្ថម្ភរួមគ្នាដោយកងកម្លាំងសហរដ្ឋអាមេរិក ប្រចាំនៅតំបន់ប៉ាស៊ីហ្វិក និងកងយោធពលខេមរភូមិន្ទដោយមានបំណងផ្តល់នូវបរិយាកាសមួយសម្រាប់ភាពជាដៃគូ រវាងកងទ័ពកម្ពុជា និងកងទ័ពសហរដ្ឋអាមេរិក ព្រមទាំងប្រទេសជាមិត្តផ្សេងទៀត។
គម្រោងសកម្មភាពសំណង់ស៊ីវិលក្នុងអំឡុងពេលនៃលំហាត់សមយុទ្ធរួមមានការសាងសង់អគារសាលារៀនថ្មីមួយមាន៣បន្ទប់ និងអណ្តូងទឹកថ្មីមួយនៅភូមិតាំងសៀ និងមណ្ឌលសុខភាព ដំណាក់ចាន់ ក្នុងភូមិត្រពាំងអន្ទង់ ត្រូវបានផ្លាស់ដំបូលថ្មី និងលាបថ្នាំថ្មី ហើយត្រូវបានផ្តល់ប្រព័ន្ធទឹកស្អាត និងថាមពលព្រះអាទិត្យ ។ ចំណែកការពិនិត្យព្យាបាលជំងឺទូទៅ២វគ្គ ដោយឥតគិតថ្លៃនៅវិទ្យាល័យបាត់ដឹង និងសាលាបឋមសិក្សាត្រែងទ្រយឹង ក្នុងខេត្តកំពង់ស្ពឺ ។ មានអ្នកជំងឺជាង៣ពាន់នាក់ បានទទួលការពិនិត្យព្យាបាលជំងឺ ៕
ចែករំលែកព័តមាននេះ