ខេត្តបាត់ដំបង ៖ ជីវិ.តពិត ខុសពីរឿងនិទាន ហើយគ្មាននរណាម្នាក់ចង់កើតមកតែលតោលនោះឡើយ ពោលគឺបើអាចរើសកន្លែងកើតបាននោះពិតជាប្រសើរ ជាក់ស្ដែងក្មេងស្រីដ៏កម្សត់ម្នាក់កំព្រាឪពុកម្តាយ ពិតជាគួរឱ្យអាណិត និងសង្រេកចិត្តពេកក្រៃ ក្រោយពេលឃើញនាងគ្មានសាច់ញាតិ បងប្អូន ឬគ្រួសារទីពឹងនោះឡើយ ហើយថែមទាំងមានជំងឺទៀត។
នេះហើយជីវិ.តពិតរបស់ក្មេងស្រីដ៏កម្សត់ម្នាក់ គ្មានគ្រួសារ គ្មានបងប្អូន សាច់ញាតិ្តក៏គ្មានដែរ ដោយនាងបាត់បង់គ្រួសារដ៏កក់ក្តៅ បានត្រឹមតែស្នាក់នៅសាលារៀនមួយកន្លែង ធ្វើឱ្យមហាជនមានការអាណិតអាសូរជាពន់ពេក ក្រោយពេលបានដឹងពីរឿងរ៉ាវជីវិ.តរបស់នាង។ ហើយបើងាកមកមើលដៃ និងជើងកូនសិស្សរូបនេះ ឃើញថា មានជំងឺសើស្បែក ចំណែកទឹកមុខរបស់នាង ក៏ដូចជាមិនសូវស្រស់នោះឡើយ។
បើយោងតាមគណនីហ្វេសប៊ុកមួយមានឈ្មោះថា «ស៊ីប ឡាលីន ( Sip Lalin)» បានធ្វើការរៀបរាប់អំពីក្មេងស្រីរូបនេះ ដោយប្រាប់ឱ្យដឹងថា «កូនកំព្រាគ្មានឪពុកម្តាយ ម៉ែឪយាយស្លា.ប់ចោលអស់ គ្មានបងប្អូន រៀនថ្នាក់ទី9D នៃវិទ្យាល័យសម្តេចឪ បាត់ដំបង។ ជើងទាំងពីរហើម រោគសើស្បែកប្រចាំកាយតាំងពីតូច ទៅពេទ្យនៅខេត្តសៀមរាប ប្រហែលសង្ឃឹមជា។ គាត់អាយុ១៥ឆ្នាំហើយ ឃើញហើយស្រក់ទឹកភ្នែកដោយមិនដឹងខ្លួន គួរឱ្យអាណិត ខំមករៀននឹងគេដែរ ឯកោ គ្មានភាពកក់ក្តៅ។ គាត់ថា ចង់មានឪពុកម្តាយដូចគេ តែគាត់មិនអាចជ្រើសរើសបាន ស្នាក់នៅសាលាចិន បានអ្នកគ្រូនៅសាលាចិនផ្តល់ថវិការមួយចំនួនឱ្យរៀន»។
នេះហើយជាជីវិ.ត ទោះបីជាគ្មានសូម្បីតែទីពឹងក៏ដោយ ក៏នាងនៅតែមករៀន ព្រោះថា នាងពុំបានយកភាពឯការមករាំងស្ទះនោះឡើយ ហើយមានតែការសិក្សាប៉ុណ្ណោះ ទើបជារស្មីចំពោះរូបនាង។
ជាការពិតណាស់ ក្រោយនាងមានជំងឺ ក៏ដូចជាប្រវត្តិជីវិ.តគួរឱ្យសង្វេកនោះ ក៏មានមហាជនជាច្រើននាក់បានជួយដល់រូបនាង តាមគណនីខាងលើនោះផងដែរ។ ក្នុងនោះ មហាជនខ្លះបានធ្វើការលើកឡើងថា «កូនគេកូនយើង អាណិតណាស់កូនស្រីអើយ»។ «សូមចូលរួមផងអ្នកគ្រូ មីងជួយស៊ែរសង្ឃឹមថា នឹងមានអ្នកចិត្តបុណ្យយកប្អូនទៅព្យាបាល»។ និងមហាជនខ្លះទៀតលើកឡើងថា «ចង់ជួយគាត់ជាថវិការតិចតួច ទាក់ទងតាមណា ក្មួយអើយ ខ្ញុំស្រក់ទឹកភ្នែកមិនដឹងខ្លួន ទឹកមុខគួរឱ្យស្រណោះពន់ពេក»។
អ្នកខ្លះទៀត ក៏បានធ្វើការលើកឡើងទៀតថា « គាត់នៅបាត់ដំបងមែនទេ អ្នកគ្រូ ខ្ញុំចង់ផ្ដល់សម្លៀកបំពាក់ខ្ញុំខ្លះជូនគាត់ ហើយនឹងថវិកាតិចតួច» រួចគណនីខាងលើ ក៏បានតបថា «កូនអាចជូនគាត់បាន គាត់នៅរៀនវិទ្យាល័យសម្តេចឪខេត្តបាត់ដំបង»។
ពិតជាបានបុណ្យច្រើនណាស់ ក្រោយមានបង្ហោះពីគណនីខាងលើរួចមក ឃើញថា មានមហាជនច្រើនបានជួយដល់ក្មេងស្រីដែលគេស្គាល់ថា គាត់ពិតជាលំបាកពិតមែន ដោយទីជម្រកក៏មិនមាន គ្រួសារក៏អត់ សាច់ញាតិក៏គ្មាននោះ ហើយថែមទាំងរុំព័ន្ធដោយជំងឺទៀតផង៕
អត្ថបទដោយ ៖ លីហួ គីមឆាយ
ចែករំលែកព័តមាននេះ