រាជធានីភ្នំពេញ ៖ សម្រាប់ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដែលនឹងប្រព្រឹត្តិទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ…
រាជធានីភ្នំពេញ ៖ សម្រាប់ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដែលនឹងប្រព្រឹត្តិទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ មានអង្គបោះឆ្នោត ចំនួន ១១,៧៤៧នាក់ ។
ឯកឧត្ដម ហេង ស៊ីឡេង សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា កាលពីថ្ងៃទី០៤ ខែមករា ឆ្នាំ២០២៤ គ.ជ.ប បានសម្រេចលើបញ្ជីបោះឆ្នោតដំបូង ដែលមានការិយាល័យបោះឆ្នោតចំនួន ៣៣ការិយាល័យ និងមានអង្គបោះឆ្នោត សរុបចំនួន ១១,៧៤៧ នាក់ ក្នុងនោះរួមមានតំណាងរាស្ត្រក្នុងតំណែងមានចំនួន ១២៥ នាក់ស្ត្រី ១៧នាក់ ក្រុមប្រឹក្សាឃុំ សង្កាត់ទាំងអស់ ក្នុងតំណែងមានចំនួន ១១,៦២២នាក់ ស្ត្រី ២,៥៦៨នាក់ ។
ក្នុងកិច្ចប្រជុំជាមួយភាគីពាក់ព័ន្ធ នាព្រឹកថ្ងៃទី០៥ ខែមករា ឆ្នាំ២០២៤ នៅទីស្ដីការគណៈកម្មាធិការជាតិរៀបចំការបោះឆ្នោត ឯកឧត្ដម ហេង ស៊ីឡេង បានថ្លែងថា តាមប្រតិទិនសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ គ.ជ.ប ត្រូវធ្វើការបិទផ្សាយ បញ្ជីបោះឆ្នោតដំបូង នៅថ្ងៃទី០៥ ខែមករា ឆ្នាំ២០២៤ ហើយដើម្បីបង្កលក្ខណៈងាយស្រួលទៅដល់អ្នកបោះឆ្នោត គ.ជ.ប ក៏បានបង្ហោះបញ្ជីបោះឆ្នោតដំបូងនេះ នៅលើគេហទំព័រ voterlist.nec.gov.kh និង Mobile App (NEC KH) ផងដែរ ។
គណបក្សនយោបាយ ដែលបានចុះបញ្ជីស្របតាមច្បាប់ ស្ដីពីគណបក្សនយោបាយ មានសិទ្ធិសុំបញ្ជីបោះឆ្នោតដំបូងច្បាប់ថតចម្លងបាន ដោយបង់ថ្លៃ។
ការបិទផ្សាយបញ្ជីបោះឆ្នោតដំបូង មានរយៈពេល៥ថ្ងៃ ក្នុងគោលដៅឱ្យប្រជាពលរដ្ឋ និងអ្នកពាក់ព័ន្ធ ធ្វើការពិនិត្យ ដើម្បីកែតម្រូវតាមរយៈការប្ដឹងតវ៉ា ឬការប្តឹងជំទាស់ទាក់ទងទៅនឹងបញ្ជីបោះឆ្នោតដំបូង ដោយត្រូវអនុវត្តន៍នីតិវិធី និងដំណាក់កាល នៃបណ្តឹង ដូចជាពាក្យបណ្ដឹងតវ៉ា អាចធ្វើឡើងអំពីការបាត់ឈ្មោះរបស់អ្នកបោះឆ្នោត ឬមានឈ្មោះក្នុងបញ្ជីបោះឆ្នោត ប៉ុន្តែកត់ត្រាមិនច្បាស់លាស់ ឬមិនត្រឹមត្រូវ ឬមានឈ្មោះក្នុងបញ្ជីបោះឆ្នោតនៃរាជធានី ខេត្តផ្សេងរួចហើយ។
ពាក្យបណ្ដឹងជំទាស់អាចធ្វើឡើងចំពោះបុគ្គលណាម្នាក់ ដែលមានឈ្មោះក្នុងបញ្ជីបោះឆ្នោតដំបូង ជាជនដែលពុំមានសិទ្ធិបោះឆ្នោតដោយមិនមែនជាតំណាងរាស្ត្រក្នុងតំណែង ឬមិនមែនជាសមាជិកក្រុម ប្រឹក្សាឃុំ សង្កាត់ក្នុងតំណែង នៅក្នុងក្របខណ្ឌភូមិភាគនីមួយៗ និងករណីដែលអ្នកបោះឆ្នោតមានឈ្មោះក្នុងបញ្ជីបោះឆ្នោតច្រើនជាងមួយកន្លែងជាដើម។
ការប្ដឹងតវ៉ា ឬការប្ដឹងជំទាស់ពាក់ព័ន្ធនឹងបញ្ជីបោះឆ្នោតដំបូង ត្រូវធ្វើនៅ គធ.ខប ក្នុងរយៈពេល ៥ថ្ងៃ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង ថ្ងៃចុងក្រោយ នៃការទទួលពាក្យបណ្តឹង គឺនៅថ្ងៃទី១១ ខែ មករា ឆ្នាំ២០២៤ ក្នុងនោះថ្ងៃទី០៧ ខែមករា ឆ្នាំ២០២៤ ដែលត្រូវជាថ្ងៃបុណ្យផ្លូវការ គធ.ខប មិនទទួលពាក្យបណ្តឹងទេ។ បន្ទាប់ពីទទួលបានពាក្យបណ្ដឹង គធ.ខប ត្រូវចាត់ចែងដោះស្រាយលើពាក្យបណ្ដឹងនោះ ក្នុងរយៈពេលយ៉ាងយូរ៣ថ្ងៃ។
ករណីអ្នកប្ដឹង ឬតំណាង មិនសុខចិត្តនឹងសេចក្ដីសម្រេចរបស់ គធ.ខប សាមីខ្លួន ឬតំណាងអាចប្ដឹងបន្តទៅកាន់ គ.ជ.ប ក្នុង រយៈ ពេល ៥ថ្ងៃ បន្ទាប់ពីថ្ងៃទទួលបានលិខិតជូនដំណឹង ឬសម្រង់សេចក្ដី សម្រេច (ទ.១២០៣) របស់ គធ.ខប។ បន្ទាប់ពីទទួលបានពាក្យបណ្ដឹង គ.ជ.ប ត្រូវចាត់ចែងដោះស្រាយលើពាក្យបណ្ដឹងនោះក្នុងរយៈពេលយ៉ាងយូរ ៥ថ្ងៃ។ ករណីអ្នកប្ដឹង ឬតំណាង មិនសុខចិត្តនឹងសេចក្ដីសម្រេចរបស់ គ.ជ.ប សាមីខ្លួន ឬតំណាង អាចប្ដឹងបន្តទៅកាន់ក្រុមប្រឹក្សាធម្មនុញ្ញក្នុងរយៈពេល៥ថ្ងៃ បន្ទាប់ពីថ្ងៃទទួលបានលិខិតជូនដំណឹង ឬសម្រង់សេចក្ដីសម្រេច(ទ.១២០៣) របស់ គ.ជ.ប។ បន្ទាប់ពីទទួលបានពាក្យបណ្ដឹង ក្រុម ប្រឹក្សាធម្មនុញ្ញត្រូវចាត់ចែងដោះ ស្រាយលើពាក្យបណ្ដឹងនោះ ក្នុងរយៈពេលយ៉ាងយូរ ១០ថ្ងៃ។ ការដាក់ ការទទួល និងការដោះស្រាយពាក្យបណ្តឹងត្រូវអនុវត្តន៍តាមនីតិវិធីរបស់ក្រុមប្រឹក្សាធម្មនុញ្ញ។
សូមជម្រាបថា សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ឆ្នាំ២០២៤ ដែលប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ មានគណបក្សនយោបាយចំនួន៤ បានចូលរួមប្រកួតប្រជែងគ្នា ក្នុងនោះគណបក្សប្រជាជនកម្ពុជា ទទួលបានលេខរៀងទី១ ឯលេខរៀងទី២ គណបក្សឆន្ទៈខ្មែរ លេខរៀងទី៣ គណបក្សហ្វុនស៊ីនប៉ិច និងលេខរៀងទី៤ គណបក្សកម្លាំងជាតិ ៕
ចែករំលែកព័តមាននេះ