- ភ្នំពេញ
រាជធានីភ្នំពេញ ៖ ក្នុងរយៈពេលចុងក្រោយនេះលេចចេញករណីបុរសអ្នករើសអេតចាយ បែរជាក្លាយជាចោរចូលផ្ទះគេ លួចទ្រព្យសម្បត្តិទៅវិញ ។ ករណីនេះ មិនគួរកើតឡើងឡើយ ខណៈដែលអ្នករើសអេតចាយភាគច្រើននៅតែប្រកបរបរដោយសុចរិតនេះ ។…
រាជធានីភ្នំពេញ ៖ ក្នុងរយៈពេលចុងក្រោយនេះលេចចេញករណីបុរសអ្នករើសអេតចាយ បែរជាក្លាយជាចោរចូលផ្ទះគេ លួចទ្រព្យសម្បត្តិទៅវិញ ។ ករណីនេះ មិនគួរកើតឡើងឡើយ ខណៈដែលអ្នករើសអេតចាយភាគច្រើននៅតែប្រកបរបរដោយសុចរិតនេះ ។
កាលពីវេលាម៉ោង៩និង៣០នាទី យប់ថ្ងៃទី១ ខែមករា ឆ្នាំ២០២៤ នៅបុរីសឡា ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ មានករណីបុរសម្នាក់ដើររើសអេតចាយ ហើយបន្លំចូលផ្ទះប្រជាពលរដ្ឋត្រូវបានគេស្រែកថា «ចោរៗ» ។ ហេតុការណ៍នោះ ត្រូវបានប្រជាពលរដ្ឋអះអាងថា បុរសអ្នករើសអេតចាយនេះបានបន្លំចូលលួចទ្រព្យសម្បត្តិ ក្នុងផ្ទះរបស់ប្រជាពលរដ្ឋ ។ តែបុរសជាប់ចោទបានប្រកែក ។
យ៉ាងណាក៏ដោយ បើត្រឹមរើសអេតចាយ គឺមិនត្រូវបន្លំចូលក្នុងផ្ទះរបស់គេទាំងយប់ឡើយ ។ រើសសំបកកំប៉ុងប៊ីយ៊ែ ដបទឹកបរិសុទ្ធ ឬរបស់របរផ្សេងទៀត ដែលគេបោះចោលនៅក្រៅផ្ទះ ហើយអ្នករើសអេតចាយ រុករកត្រឹមតែនៅក្រៅរបងផ្ទះរបស់គេបានហើយ ។ កុំមានដៃ មានជើង លួចរបស់របរ ដែលគេមិនបោះចោល ។ ចំណែកប្រជាជនក៏ត្រូវមានការប្រុងប្រយ័ត្នផងដែរបិទទ្វាររបង និងផ្ទះអោយជិត និងចាក់សោរ ដើម្បីចៀសវាងចោរបន្លំ ឬលួចចូលផ្ទះលួយទ្រព្យសម្បត្តិ ។
ក្រៅពីនេះ ក៏នៅមានអ្នករើសអេតចាយមួយចំនួនទៀតរើសកកាយធុងសំរាម ឬថង់ដាក់សំរាមដែលគេចងត្រឹមត្រូវហើយ បែរជារើកកាយហែកថង់សំរាម ដើម្បីរុករកសំបកកំប៉ុងសំបកដបទឹកបរិសុទ្ធនាំឱ្យសំរាមនៅរាយប៉ាយពេញផ្លូវ ។ បើថា រុករករើកកាយហើយ សូមរៀបចំទុកដាក់សំរាមឱ្យមានរបៀបឡើងវិញផង ។ អាណិតម្ចាស់ផ្ទះ និងក្រុមអ្នកបោសសំអាតប្រមូលសំរាមផង។
ចំណែកម្ចាស់ផ្ទះ ដែលជាម្ចាស់សំរាមវិញ ក៏គួរតែទុកដាក់សំរាមឱ្យបានត្រឹមត្រូវ ហើយបើមានសំបកកំប៉ុង ដប ទឹកបរិសុទ្ធ ឬក៏របស់របរដែលត្រូវបោះចោល ត្រូវញែកដាក់ដាច់ដោយឡែកពីកាកសំណល់ចំណីអាហារ និងសំរាមផ្សេងទៀត ដើម្បីកុំឱ្យអ្នករើសអេតចាយកកាយ ហែកថង់នាំឱ្យសំរាម និងកាកសំណល់រាយប៉ាយ ។
ជាសរុបទៅ អ្នកប្រកបរបររើសអេតចាយ សូមត្រឹមតែរើសរបស់របរសំបកកំប៉ុង សំបកដប ឬរបស់ដែលគេបោះចោលបានហើយ ។ សូមកុំមានដៃ មានជើង លួចរបស់របរ ដែលគេមិនបោះចោល ។
ជាមួយគ្នានេះ ប្រជាពលរដ្ឋម្ចាស់ផ្ទះក៏មិនត្រូវចោទប្រកាន់គ្រាន់តែឃើញគ្នាជាអ្នករើសអេតចាយចោទគេថា ជាចោរនោះដែរ ។ បើមានភស្តុតាងជាក់ស្តែង ច្បាស់លាស់មិនអីទេ តែបើគ្រាន់តែគ្នាដើររើសអេតចាយ ហើយស្រែកចោទគ្នាថា ចោរដែរ គឺមិនកើតទេ ។
ចុះបើពេលនោះ ស្រាប់តែប្រជាជនយើងមានកំហឹង ហើយប្រើហិ.ង្សាវា.យរហូតដល់ជននោះរបួស ឬក៏ស្លា.ប់ទៅ តើនរណាទទួលខុសត្រូវ? ហើយបើទោះបីជាជននោះ ជាចោរមែនក៏ច្បាប់ ប្រទេសយើង មិនអនុញ្ញាតឱ្យមហាជនកាត់ទោស វា.យដុំលើជនជាប់សង្ស័យនោះឡើយ។ ប្រយ័ត្ន ក្លាយខ្លួនជាអ្នកទោស ដោយសារតែកំហឹ.ងមួយពេលវា.យចោរ ៕
ចែករំលែកព័តមាននេះ