ខេត្តស្វាយរៀង ៖ រថយន្តហ៊ីយ៉ាន់ដាយ ពាក់ស្លាកលេខ 3A-0339 ផ្ទុកទំនិញលើសទម្ងន់មួយគ្រឿងដែលបើកបរដោយឈ្មោះអ៊ឹង វ៉យ អាយុ៣៩ឆ្នាំ រស់នៅភូមិ៣ ឃុំព្រែកខ្សោយ «ខ» ស្រុកពាមរក៍ ខេត្តព្រៃវែង បានក្រាបលែងទៅមុខដោយសារបាក់ភ្លៅកណ្តាលកោសថ្នល់ ជាតិលេខ១ ខូងជម្រៅ២តឹក ផុតកៅស៊ូឃើញខ្សាច់ និងអូសចម្ងាយជិត១០ម៉ែត្រ ។ ហេតុការណ៍នេះបានកើតឡើងកាលពីថ្ងៃទី២៥ ឧសភា វេលាម៉ោង៧និង១៥នាទីព្រឹកនៅលើកំណាត់ផ្លូវជាតិលេខ១ ចំណុចភូមិដើមពោធិ៍ ឃុំកណ្តៀងរាយ ស្រុកស្វាយទាប ។
តាមព័ត៌មានពីសមត្ថកិច្ចប៉ូលិសចរាចរបានឱ្យដឹងថា រថយន្តខាងលើមានចំណុះ១២តោន ក៏ប៉ុន្តែម្ចាស់រថយន្តបានដឹកខ្សាច់មានទម្ងន់រហូតដល់១៨តោន ទើបបណ្តាលឱ្យបាក់ភ្លៅរថយន្តចំកណ្តាលញែកចេញជាពី និងកោសចំកណ្តាលថ្នល់ធ្វើឱ្យខូងកៅស៊ូក្រាលផ្លូវប្រវែងជិត១០ម៉ែត្រ ។ គណៈកម្មការត្រួតពិនិត្យបច្ចេកទេសយានយន្តបានដកហូតសៀវភៅឈៀកអាជីវកម្ម ប័ណ្ណបើកបរ និងឃាត់ខ្លួនអ្នកបើកបរយកទៅកាន់មន្ទីរសាធារណការ និងដឹកជញ្ជូនខេត្ត ដើម្បីអប់រំ ផាកពិន័យ និងបងថ្លៃធ្វើការជួសជុលការខូចខាតថ្នល់ជាតិ ។
ទោះបីជាមានការរឹតបន្តឹងយ៉ាងណាក៏នៅតែមានរថយន្តដឹកទំនិញធុនធំមួយចំនួនផ្ទុកទំនិញលើសច្បាប់កំណត់ដដែល ធ្វើឱ្យសមត្ថកិច្ចពិបាកត្រង់ថា រថយន្តខ្លះលួចកែច្នៃ មើលមួយភ្លែតអាចច្រឡំ ទើបនៅមានខ្វះចន្លោះ ពេលមានគ្រោះថ្នាក់មើលកំណត់ហេតុពេលថ្លឹងជញ្ជីងទម្ងន់១៨តោន ពេលពិនិត្យសៀវភៅបន្ទុកមានត្រឹម១២តោន ប៉ុណ្ណោះ ។ ម្យ៉ាងទៀតការដឹកខ្សាច់ និងដឹកថ្ម ភាគច្រើនតែងតែលើសទម្ងន់ ដោយម្ចាស់រថយន្តតកម្ពស់ទ្រុងរថយន្ត ដូច្នេះធ្វើឱ្យមានទម្ងន់ធ្ងន់លើសការកំណត់ ។ នេះសំណាងហើយដែលរថយន្តមិនក្រឡាប់ បើពុំនោះទេ ពិតជាប៉ះពាល់ដល់អ្នកធ្វើដំណើរតាមផ្លូវថ្នល់មិនខាន ៕
ចែករំលែកព័តមាននេះ