រាជធានីភ្នំពេញ ៖ កាលពីពេលថ្មីនេះ ផ្ទុះការចាប់អារម្មណ៍យ៉ាងខ្លាំងពេញបណ្តាញសង្គមយក្ស Tik Tok ក្រោយពេលក្មេងស្រីម្នាក់បកស្រាយចម្រៀងពោរពេញទៅដោយថាមពល និងស្នាមញញឹម ហើយសម្លេងវិញក៏បាន កាយវិការក៏សមទៀត។
ជាការពិតណាស់ ចម្រៀងអាចថា មេរៀនមួយដែលអាចអោយក្មេងៗលំហែអារម្មណ៍ បញ្ចេញសមត្ថភាព ទេពកោសល្យពីធម្មជាតិ ដូចជានាងតូចរូបនេះទៀតសោត ពិតជាក្លាហាន ហើយនាងអាចចេះចាំជាច្រើនបទ ក្នុងនោះមានដូចជាបទ «កង្កែបចេញពីសាលា» បទ «ស្អាតជានិច្ច» និងបទ «អា.គី.សុខន (ឆ្កែ) ខ្ញុំ » ជាដើម។ តាមរយៈបទទាំងនេះ ពិតជាទទួលបានការចាប់អារម្មណ៍យ៉ាងខ្លាំងសំណាក់មហាជន ដោយមើលឃើញពីសកម្មភាពបង្រៀន ក៏ដូចជាការអនុវត្តន៍ដ៏រស់រវើកផងដែរ។
គួរបញ្ជាក់ដែរថា តាមរយៈសកម្មភាពបង្ហាត់បង្រៀនរបស់លោកគ្រូ គឺទទួលបានការចាប់អារម្មណ៍យ៉ាងច្រើន ចំពោះវីដេអូដែលលោកគ្រូធ្វើការបង្ហោះ មិនថាការរាំច្រៀង ក៏ដូចជាការចែករំលែកសិល្ប៍សាស្ត្រវិធីក្នុងការបង្រៀននោះទេ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោកគ្រូ អ៊ឹម សុធា ដែលជាគ្រូបង្រៀនរបស់នាងតូចកំពុងផ្ទុះការចាប់អារម្មណ៍ក្នុងបណ្តាញសង្គមនោះ បានប្រាប់ឱ្យដឹងថា «នាងតូចឈ្មោះ រិទ្ធ ខៈយ៉ានី ដោយនាងតូចរូបនេះមិនត្រឹមតែពូកែតែចម្រៀង និងរាំនោះទេ ពោលគឺនាងតូចរវៀសរវៃ ហើយក៏ជាសិស្សពូកែថែមទៀតផង»។
លោកគ្រូបន្តថា «នាងតូច រិទ្ធ ខៈយ៉ានី នាងរៀននៅថ្នាក់មត្តេយ្យ ក្នុងសាលារៀនឧបសម្ព័ន្ធដូនត្រិតកណ្តាល ដោយនាងជាសិស្សដែលឧស្សាហ៍ព្យាយាម ហើយក៏ជាសិស្សដែលពូកែជាងគេនៅក្នុងថ្នាក់ផងដែរ។ ថែមទាំងអាចច្រៀងចម្រៀងជាច្រើនបទ ដូចជា ៖ បទ «មេអំបៅ», បទ «ជីតាខ្ញុំ», បទ «សត្វទីទុយ», បទ «កុកមួយកុកពីរ» និងបទជាច្រើនទៀតដូចដែលបានរាប់រៀបខាងលើ»។
តាមរយៈចម្រៀងនេះទៀតសោត លោកគ្រូកំលោះសង្ហារូបនេះ ក៏បានប្រាប់បន្តថា «លោកបង្រៀនចម្រៀងនេះទទួលបានអត្ថប្រយោជន៍ច្រើន ពោលគឺអាចអោយកូនសិស្សលោកគ្រូងាយចងចាំ មិនថាមេរៀន ឬចម្រៀងនោះទេ។ ក្រៅពីនេះ ចម្រៀងក៏ធ្វើអោយកូនសិស្សរបស់លោកគ្រូបំបាត់ទុក្ខកង្វល់ផ្សេងៗផងដែរ»។
លោកគ្រូ អ៊ឹម សុធា ដែលជាគ្រូបង្រៀនប្អូនតូចៗ បានបង្ហើបថា «លោកគ្រូមានការលំបាកតិចតួចដែរ ក្នុងការបង្រៀន ដោយសារកូនសិស្សដែលលោកគ្រូបង្រៀនភាគច្រើនគឺតូចៗ ដូច្នេះហើយអាចថាពិបាក។ ប៉ុន្តែមិនថ្វីទេ អាចថានេះគឺការងារ ហើយត្រូវតែខិតខំធ្វើយ៉ាងណាអោយសិស្សទទួលបានចំណេះដឹងផ្សារភ្ជាប់ជាមួយការសិក្សាផងដែរ»។
ជាចុងក្រោយ លោក អ៊ឹម សុធា ពិតជាអរគុណខ្លាំងណាស់ ចំពោះការចូលចិត្តអ្វីដែលលោកគ្រូបានបង្រៀន ក៏ដូចជាការចែករំលែកតាមបណ្តាញសង្គម។ លោកគ្រូក៏សំណូមពរចំពោះឪពុកម្តាយទូទៅ ដោយកុំអោយកូនៗលេងទូរស័ព្ទច្រើនពេក ហើយជំនួសការលេងទូរស័ព្ទមកជាការបង្រៀនកូនបន្ថែមនៅផ្ទះវិញ៕
អត្ថបទដោយ ៖ លីហួ គីមឆាយ
ចែករំលែកព័តមាននេះ