ខេត្តបាត់ដំបង ៖ កម្មករម្នាក់ធ្វើការក្នុងការដ្ឋានកិនថ្មមួយកន្លែងនៅចំណុចភ្នំតាគ្រាម ក្នុងភូមិប៉ោយស្វាយ ឃុំតាគ្រាម ស្រុកបាណន់បានស្លា.ប់កាលពីថ្ងៃទី០២ មករា នៅក្នុងមន្ទីរពេទ្យដែលប្រភពខ្លះអះអាងថា «ជនរងគ្រោះបានរអិលធ្លា.ក់ចូលក្នុងម៉ាស៊ីនកិនថ្ម» រីឯប្រភពដទៃទៀត…
ខេត្តបាត់ដំបង ៖ កម្មករម្នាក់ធ្វើការក្នុងការដ្ឋានកិនថ្មមួយកន្លែងនៅចំណុចភ្នំតាគ្រាម ក្នុងភូមិប៉ោយស្វាយ ឃុំតាគ្រាម ស្រុកបាណន់បានស្លា.ប់កាលពីថ្ងៃទី០២ មករា នៅក្នុងមន្ទីរពេទ្យដែលប្រភពខ្លះអះអាងថា «ជនរងគ្រោះបានរអិលធ្លា.ក់ចូលក្នុងម៉ាស៊ីនកិនថ្ម» រីឯប្រភពដទៃទៀត បែរជាដាក់ការសង្ស័យថា «អាចជារឿងមិនប្រក្រតី»ពីព្រោះត្រូវសមត្ថកិច្ចនិងម្ចាស់ការដ្ឋានកិនថ្មនេះ ព្យាយាមបិទបាំងព័ត៌មាននេះយ៉ាងស្ងាត់បំផុត សូម្បីមន្ត្រីជំនាញក៏គេរារាំងមិនឲ្យចុះត្រូតពិនិត្យទីតាំងកើតហេតុ និងសាកសពកម្មករនោះដែរ ។
ប្រភពព័ត៌មាននានាដែលកោះសន្តិភាពទើបទទូលបាន នៅព្រឹកថ្ងៃទី០៣ មករា បានឲ្យដឹងថា ជនរងគ្រោះឈ្មោះ សឿក សុភាព ហៅលាភ ភេទប្រុស អាយុ៣៦ឆ្នាំ រស់នៅភូមិអូរពងមាន់ ឃុំតាគ្រាម ជាកម្មករធ្វើការនៅក្នុងការដ្ឋានកិនថ្មរបស់ក្រុមហ៊ុន «ប៉េង អាន» មានទីតាំងនៅចំណុចភ្នំតាគ្រាម ស្ថិតនៅភូមិប៉ោយស្វាយ ឃុំតាគ្រាម ស្រុកបាណន់ ។
ប្រភពពីមូលដ្ឋានបានទម្លាយឲ្យដឹងថា ជនរងគ្រោះត្រូវបានគេនិយាយតៗគ្នាថា បានរអិលជើងធ្លាក់ចូលក្នុងម៉ាស៊ីនកិនថ្មដែលកើតឡើងតាំងពីរសៀលថ្ងៃទី២៩ ធ្នូ ឆ្នាំ២០២៣ បណ្ដាលឲ្យរបួសធ្ងន់ ហើយត្រូវកម្មករនៅក្នុងការដ្ឋាននេះនាំគ្នាដឹកជនរងគ្រោះទៅកាន់មន្ទីរពេទ្យ ដើម្បីសង្គ្រោះបន្ទាន់យ៉ាងស្ងាត់ស្ងៀមបំផុត ។
មិនតែប៉ុណ្ណោះ ទាំងសមត្ថកិច្ចមូលដ្ឋាន ទាំងម្ចាស់ការដ្ឋាន ហាក់ដូចជាត្រូវរ៉ូវគ្នាបានព្យាយាមលាក់បាំងរឿងនេះយ៉ាងស្ងាត់ឈឹងផងដែរ ។ លុះនៅថ្ងៃទី០២ មករា ពេលជនរងគ្រោះស្លា.ប់នៅមន្ទីរពេទ្យ រហូតដឹកយកមកធ្វើបុណ្យនៅផ្ទះ ទើបបែកធ្លាយរឿងនេះផ្អើលពេញភូមិ ។ រីឯសមត្ថកិច្ចចាប់តាំងពីថ្នាក់ក្រោមរហូតដល់ថ្នាក់លើនៅតែព្យាយាមបិតបាំងរឿងនេះដដែល គេរាយការណ៍ស្ងាត់ៗជូនតែលោកស្នងការម្នាក់គត់ឲ្យបានជ្រាប ខណៈមន្ត្រីការិយាល័យជំនាញបានត្រឹមតែដឹងព្រាលៗរាប់ទាំងការិយាល័យបច្ចេកទេសផង ។ នេះបើតាមប្រភពព័ត៌មានដែលបានបង្ហើបឲ្យដឹង ។
ដោយសារតែសកម្មភាពបិទបាំងព័ត៌មានសព្វបែបយ៉ាងនេះហើយ ទើបនាំឲ្យមហាជន រួមទាំងមន្ត្រីមួយចំនួនផងដាក់ការសង្ស័យថា «ការស្លាប់របស់កម្មករកិនថ្មខាងលើនេះ អាចជារឿងមិនប្រក្រតី» ទើបគេនាំគ្នាបិទបាំង សូម្បីរូបថតជនរងគ្រោះ ឬទីតាំងកើតហេតុ ក៏ត្រូវគេហាមឃាត់មិនអ្នកពាក់ព័ន្ធណាម្នាក់ចែករំលែកទៅកាន់បណ្ដាញព័ត៌មាន ឬបង្ហោះតាមបណ្ដាញសង្គមដែរ ។
អធិការស្រុកបាណន់ លោក សំ វីរៈ បាននិយាយពីរឿងនេះប្រាប់កោះសន្តិភាពថា តាមពិតសមត្ថកិច្ចរបស់លោកពុំបានបិតបាំងរឿងនេះទេ ។ មន្ត្រីជំំនាញរបស់លោកបានចុះពិនិត្យទីតាំងកើតហេតុត្រឹមត្រូវ ក្រោយពេលកើតហេតុ ។ លោកអធិការបានបញ្ជាក់ថា ជនរងគ្រោះបានធ្លាក់ចូលក្នុងម៉ាស៊ីនកិនថ្ម បណ្ដាលឲ្យរងរបួសធ្ងន់ធ្ងរ ជាពិសេសគ្រឿងក្នុងតែម្ដង ។
នៅពេលលើកជាសំណួរថា មានគេនិយាយថា ខាងអធិការស្រុកមិនបានរាយការណ៍ ឬស្នើសុំមន្ត្រីការិយាល័យជំនាញឲ្យជួយសហការចុះពិនិត្យទីតាំងកើតហេតុ និងពិនិត្យសាកសពជនរងគ្រោះដូចមុនៗទេ ព្រោះកន្លងទៅ សូម្បីតែជនរងគ្រោះចងកធ្វើអត្តឃាតខ្លួនឯងសោះ ក៏លោកអធិការរាយការណ៍ និងស្នើសុំឲ្យមន្ត្រីការិយាល័យជំនាញចុះជួយពិនិត្យដែរ តើហេតុអ្វីបានជារឿងកម្មករការដ្ឋានកិនថ្មខាងលើនេះស្លាប់ បែរជាមិនរាយការណ៍ និងស្នើសុំមន្ត្រីការិយាល័យជំនាញឲ្យជួយសហការពិនិត្យទីតាំងកើតហេតុ និងធ្វើកោសល្យវិច័យលើសាកសព?
លោក សំ វីរៈ បានផ្ដល់ចម្លើយទាំងរារែកដូច្នេះថា «ខ្ញុំបានរាយការណ៍ជូនទៅលោកស្នងការភ្លាមៗ ក្រោយពេលកើតហេតុ ប៉ុន្តែ…..! លោក…! នៅការិយាល័យចរាចរណ៍បានស្នើសុំឲ្យជួយសម្រូល… ដើម្បីកុំឲ្យរឿងនេះខ្ចរខ្ចាយព្រោះថា ម្ចាស់ការដ្ឋានកិនថ្មនោះ ជាសាច់ញាតិគាត់ ទើបមិនមានមន្ត្រីការិយាល័យជំនាញនៃស្នងការខេត្តចុះពិនិត្យ តែខ្ញុំបានរាយការណ៍ទៅលោកស្នងការសព្វបែបយ៉ាងអស់ហើយ» ។
ដោយឡែក បើតាមប្រភពនានាដែលបានទម្លាយឲ្យដឹងពីមូលដ្ឋានឯណោះវិញបាននិយាយថា ករណីកម្មករការដ្ឋានកិនថ្មរបស់ក្រុមហ៊ុន«ប៉េងអាន»ស្លាប់នេះ គេសង្កេតឃើញពិតជាមានការលាក់លៀមមែន ។ បើតាមការពិនិត្យលើសកម្មភាព និងស្ដាប់ព័ត៌មាននានា ដែលបានខ្សឹបខ្សៀវគ្នានៅក្នុងភូមិក៏ដូចនៅកន្លែងរោងបុណ្យការព្យាយាមបិទបាំងព័ត៌មាននេះ គឺគេកត់សម្គាល់ ៖ ទី១-ផ្ដើមចេញពីខាងក្រុមហ៊ុនកិនថ្ម និង ទី២-ផ្ដើមចេញពីមន្ត្រីមូលដ្ឋានតែម្ដងដែលមើលទៅពួកគេហាក់ត្រូវរ៉ូវគ្នា ដើម្បីជួយបិទបាំងព័ត៌មាននេះ ដែលនាំឲ្យមហាជនមានមន្ទិលសង្ស័យជាច្រើនទៅលើការស្លាប់របស់ជនរងគ្រោះ ។
ប្រភពខ្លះបាននិយាយត្រាប់តាមសមត្ថកិច្ចប្រាប់តៗគ្នាថា «ជនរងគ្រោះពិតជាបានរអិលជើងធ្លាក់ចូលម៉ាស៊ីនកិនថ្មមែន ទើបរបួសធ្ងន់រហូតដល់ស្លាប់ដែលជាការធ្វេសប្រហែស» ។ ប៉ុន្តែប្រភពខ្លះទៀត បានចោទជាសំណួរថា ប្រសិនបើជនរងគ្រោះធ្វេសប្រហែសរអិលជើងធ្លាក់ចូលម៉ាស៊ីនកិនថ្មដោយខ្លួនឯងសោះ តើហេតុអ្វីបានជាម្ចាស់ក្រុមហ៊ុននេះ និងសមត្ថកិច្ចចាប់តាំងពីថ្នាក់ក្រោម រហូតដល់ថ្នាក់លើព្រូតគ្នាព្យាយាមលាក់បាំងរឿងនេះ ? ឬមួយមានរឿងអាថ៌កំបាំងអ្វីផ្សេងពីនេះ ដែលបណ្ដាលឲ្យជនរងគ្រោះស្លាប់ ទើបគេព្យាយាមលាក់ព័ត៌មាន ? សូម្បីរូបថតជនរងគ្រោះ ឬទីតាំងកើតហេតុ ក៏មានគេហាមឃាត់មិនអនុញ្ញាតឲ្យនរណាម្នាក់បង្ហោះតាមបណ្ដាញសង្គម ឬចែករំលែកដល់បណ្ដាញព័ត៌មានដែរ ។
កោះសន្តិភាព មិនអាចទំនាក់ទំនងសុំការបំភ្លឺពីអ្នកគ្រប់គ្រង ឬប្រធានការដ្ឋានកិនថ្មរបស់ក្រុមហ៊ុន«ប៉េងអាន»បានទេ គិតត្រឹមម៉ោង៣រសៀលថ្ងៃទី០៣ មករា ២០២៤ នេះ ពាក់ព័ន្ធនឹងការស្លាប់កម្មករម្នាក់ និងការលើកឡើងផ្ទុយគ្នានៃមតិមហាជនជុំវិញសំណុំរឿងនេះ ។ ដូច្នេះ មានតែរង់ចាំតាមដានបន្តទេថា តើលោកស្នងការ ឬលោកអគ្គស្នងការ ឬថ្នាក់ដឹកនាំក្នុងក្រសួងពាក់ព័ន្ធ មានការចាប់អារម្មណ៍ និងមានចំណាត់ធ្វើការស៊ើបអង្កេតជាថ្មីឡើងវិញ ដើម្បីស្វែងរកការពិតដែរឬអត់ ?
មានព័ត៌មានបន្ថែម កោះសន្តិភាពនឹងផ្សាយជូនបន្ត ។
ចែករំលែកព័តមាននេះ