រម្លឹករឿងជូរចត់នៃការបា.ញ់កម្ទេ.ចមេបញ្ជាការឆ្មាំបដិវត្តន៍អ៊ីរ៉ង់ដោយគ្រាប់មីស៊ីល
តេអេរ៉ង់៖ នៅថ្ងៃនេះកាលពី៤ឆ្នាំមុន ប្រទេសអាមេរិកបានធ្វើឃាតមេបញ្ជាការកងទ័ពឆ្មាំបដិវត្តអ៊ីរ៉
តេអេរ៉ង់៖ នៅថ្ងៃនេះកាលពី៤ឆ្នាំមុន ប្រទេសអាមេរិកបានធ្វើឃាតមេបញ្ជាការកងទ័ពឆ្មាំបដិវត្តអ៊ីរ៉ង់សូឡេម៉ានី (Soleimani) ដោយប្រើប្រាស់យន្តហោះដ្រូនបាញ់ពីលើអាកាស។ ព្រឹត្តិការណ៍នេះកើតឡើងកាលថ្ងៃទី៣ ខែមករា ឆ្នាំ២០២០។ សព្វថ្ងៃនេះ អ៊ីរ៉ង់នៅតែចិញ្ចឹមចិត្តថាថ្ងៃណាមួយខ្លួនត្រូវតែសងសឹកឱ្យវីរបុរសរបស់ខ្លួនដែលស្លាប់ដោយសារការធ្វើឃាតនោះ។
ក្រោមការដឹកនាំរបស់លោកដូណាល់ត្រាំ លោកបាននិយាយការពារខ្លួនទល់នឹងការសម្រេចចិត្តដ៏ពិបាកបំផុតនៅក្នុងការធ្វើឃាតបុគ្គលដ៏មានអំណាចលំដាប់កំពូលម្នាក់នេះ។ ពោលគឺមេបញ្ជាការឆ្មាំបដិវត្តរូបនេះមានអំណាចខ្លាំងជាងប្រធានាធិបតីអ៊ីរ៉ង់ទៅទៀត ហើយនៅក្រោមតែអគ្គមគ្គុទ្ទេសក៍អ៊ីរ៉ង់ម្នាក់ប៉ុណ្ណោះ។ ការធ្វើឃាតមេបញ្ជាការរូបនេះកើតឡើងនៅពេលទំនាក់ទំនងអ៊ីរ៉ង់-អាមេរិកធ្លាក់ចុះខ្លាំងស្រាប់ទៅហើយ។ ដូច្នេះ ទំនាក់ទំនងនេះរឹតតែធ្លាក់ចុះបន្ថែមទៀតក្រោយការធ្វើឃាត។
រដ្ឋាភិបាលទីក្រុងវ៉ាស៊ីនតោនចោទប្រកាន់ថាសូឡេម៉ានីជាអ្នកដែលបង្កបញ្ហាច្រើនណាស់ អាចនិយាយបានថាជាអ្នកដើរក្រឡុកស្ថានការណ៍ និងដើរវ៉ាងទីនៅតំបន់មជ្ឈិមបូព៌ា។ វ៉ាស៊ីនតោនចោទថាគាត់ជាអ្នករៀបចំផែនការវាយប្រហារទៅលើមូលដ្ឋានកងទ័ពអាមេរិកនៅក្នុងតំបន់នេះ។ នៅក្នុងការធ្វើឃាតនោះ យន្តហោះដ្រូនរបស់អាមេរិកបានហោះស្ងាត់ៗពីលើរថយន្តរបស់សូឡេម៉ានី ហើយបាញ់មីស៊ីលពីរគ្រាប់។ ការធ្វើឃាតនេះនាំឱ្យអ៊ីរ៉ង់មានកំហឹងយ៉ាងខ្លាំង។ ទោះបីដឹងថាបើធ្វើសង្គ្រាមគ្មានក្រឡាហក់ជាមួយអាមេរិក ប៉ុន្តែអ៊ីរ៉ង់គិតថាខ្លួនត្រូវតែធ្វើអ្វីម្យ៉ាងដើម្បីឱ្យក្រុមអ្នកគាំទ្រសូឡេម៉ានីបានស្ងប់ចិត្ត។
អ៊ីរ៉ង់ក៏បាញ់មីស៊ីលជាច្រើនគ្រាប់សំដៅទៅមូលដ្ឋានកងទ័ពអាមេរិកនៅប្រទេសអ៊ីរ៉ាក់ ប៉ុន្តែមិនហ៊ានបាញ់ឱ្យចំមូលដ្ឋានទេព្រោះខ្លាចស្លាប់ទាហានអាមេរិក អាមេរិកអាចវាយបកវិញកាន់តែធ្ងន់។ ថ្ងៃទី៨ ខែមករា ឆ្នាំ២០២០ អ៊ីរ៉ង់ក៏ចាប់ផ្ដើមបាញ់មីស៊ីល។ ប៉ុន្មានម៉ោងក្រោយមក ដោយសារគិតថាអាមេរិកអាចនឹងចាត់វិធានការវាយបកវិញ ដូច្នេះ អ៊ីរ៉ង់ប្រាប់ឱ្យកងទ័ពប្រុងជើងការណ៍ជាប់ជាប្រចាំ ដោយត្រៀមប្រព័ន្ធការពារដែនអាកាសកម្រិតខ្ពស់។ ត្រឹមតែប៉ុន្មានម៉ោងក្រោយមក អ៊ីរ៉ង់ច្រឡំដៃបាញ់ធ្លាក់យន្តហោះដឹកអ្នកដំណើរមួយគ្រឿងរបស់ប្រទេសអ៊ុយក្រែន បណ្ដាលឱ្យស្លាប់មនុស្សទាំងអស់១៧៦នាក់។
សូឡេម៉ានីកាលនោះមានអាយុ៦២ឆ្នាំ។ គាត់ជាមេបញ្ជាការកំពូលនៃឆ្មាំបដិវត្តអ៊ីរ៉ង់ និងជាមនុស្សសំខាន់នៅក្នុងការពង្រីកឥទ្ធិពលរបស់អ៊ីរ៉ង់នៅតំបន់មជ្ឈិមបូព៌ា។ គាត់កាន់តំណែងនេះកាលពីឆ្នាំ១៩៩៨ និងចាប់ផ្ដើមពង្រឹងទំនាក់ទំនងយ៉ាងជិតស្និទ្ធជាមួយក្រុមហេស្បូឡា (Hezbollah) នៅប្រទេសលីបង់។ គាត់ក៏ពង្រឹងទំនាក់ទំនងជាមួយរដ្ឋាភិបាលស៊ីរី (អាល់អាសាត) និងចលនាប្រដាប់អាវុធស៊ីអាយ (Shi’ite) នៅប្រទេសអ៊ីរ៉ាក់ផងដែរ។ តាមរយៈនេះ គាត់ក្លាយជាបុគ្គលគំរូសម្រាប់ពលរដ្ឋអ៊ីរ៉ង់ និងជាបុគ្គលឆ្នើមនៅក្នុងចំណោមក្រុមដែលមាននិន្នាការប្រឆាំងនឹងអ៊ីស្រាអែល និងក្រុមប្រឆាំងនឹងអាមេរិក។
ការប៉ុនប៉ងធ្វើឃាតសូឡេម៉ានីមិនមែនមានតែម្ដងហ្នឹងទេ។ គាត់ធ្លាប់ហែលឆ្លងជីវិតដែលត្រូវគេលបធ្វើឃាតជាច្រើនដង ប៉ុន្តែអាចគេចផុតពីសេចក្ដីស្លាប់។ នៅទីបំផុត គាត់ត្រូវអស់អាយុសង្ខារនៅពេលយន្តហោះដ្រូនបាញ់មីស៊ីលផ្ទួនៗគ្នាពីរគ្រាប់សំដៅទៅលើរថយន្តរបស់គាត់។ ថ្វីដ្បិតគាត់មានអ្នកគាំទ្រច្រើន ប៉ុន្តែគាត់ក៏មានអ្នកស្អប់ច្រើនណាស់ដែររហូតដល់ចង់កម្ចាត់គាត់ចេញពីលើភពផែនដីនេះ។ ក្រុមបស្ចិមប្រទេស អ៊ីស្រាអែល និងចលនាសម្ងាត់របស់ក្រុមប្រទេសអារ៉ាប់បានរៀបចំផែនការដើម្បីធ្វើឃាតគាត់ជាហូរហែនៅក្នុងរយៈពេលពីរទសវត្សមុនពេលស្លាប់។ ប៉ុន្តែផែនការទាំងនោះតែងតែបរាជ័យ៕ (ប្រភព៖ VOA, Reuters និងប្រភពដទៃទៀត)
ចែករំលែកព័តមាននេះ