ប្រធានបក្សប្រឆាំងកូរ៉េខាងត្បូងត្រូវគេវា.យប្រហារ ខណៈចុះសំណេះសំណាលជាមួយអ្នកគាំទ្រ
កូរ៉េខាងត្បូង ៖ ប្រធានគណបក្សប្រឆាំងនៅកូរ៉េខាងត្បូង លោកលីជែម្យុង (Lee Jae-myung) ត្រូវ
កូរ៉េខាងត្បូង ៖ ប្រធានគណបក្សប្រឆាំងនៅកូរ៉េខាងត្បូង លោកលីជែម្យុង (Lee Jae-myung) ត្រូវបុរសម្នាក់ចា.ក់ត្រូវចំកញ្ចឹងក បណ្ដាលឱ្យលោកដេកស្ដូកស្ដឹងនៅនឹងដី។ ទីភ្នាក់ងារព័ត៌មានយុនហាប់ផ្សាយថានៅពេលលោកលីចុះសំណេះសំណាលជាមួយអ្នកគាំទ្រនៅទីក្រុងពូសាន (Busan) ស្រាប់តែមានបុរសមិនស្គាល់អត្តសញ្ញាណម្នាក់មិនដឹងមកពីណាទេបានយកអាវុធមួយប្រភេទចា.ក់ត្រូវចំកញ្ចឹងករបស់លោកលីតែម្ដង។ តាមរយៈរូបភាពដែលគេថតបាននៅកន្លែងកើតហេតុគេឃើញថាបុរសជាជនដៃដល់បន្លំខ្លួនធ្វើជាអ្នកគាំទ្រលោកលី ដោយពាក់ក្រដាសនៅលើក្បាលដាក់ឈ្មោះរបស់លោក។
បុរសនោះដើរសសៀរៗទៅក្បែរលោកលី និងស្នើសុំឱ្យលោកចុះហត្ថលេខា ឬចំណារផ្សេងៗទុកជាអនុស្សាវរីយ៍។ នៅពេលអង្គរក្សរបស់លោករាងភ្លេចត្រចៀក គាត់ក៏ដើរចូលកាន់តែកៀក និងចាក់លោកលីតែម្ដង។ ប៉ុន្តែគាត់មិនអាចរត់ទៅណារួចទេព្រោះកងអង្គរក្ស និងអ្នកនៅក្បែរនោះបានផ្ដួលគាត់ទៅលើដី និងចាប់ខ្លួនគាត់បានភ្លាមៗនៅនឹងកន្លែងកើតហេតុតែម្ដង។
តាមរយៈរូបភាពដែលគេបង្ហោះតគ្នា គេឃើញលោកលីដេកបាត់មាត់បាត់កនៅលើដី, ភ្នែករបស់គាត់បានបិទទៅហើយ។ អ្នកនៅក្បែរនោះខំយកកន្សែងដៃបិទផ្ទប់កញ្ចឹងករបស់គាត់ដើម្បីទប់ឈាមដែលចេះតែហូរមកឥតឈប់។ ក្រោយមក មន្ត្រីក្រោមឱវាទរបស់លោកប្រាប់ថានៅពេលនេះលោកលីអស់អីហើយ។ លោកអាចដឹងខ្លួនវិញនៅពេលទៅដល់មន្ទីរពេទ្យ។
សូមជម្រាបថាលោកលីជែម្យុង (Lee Jae-myung) វ័យអាយុ៥៩ឆ្នាំ ជាប្រធានគណបក្សប្រជាធិបតេយ្យ។ លោកចូលរួមប្រកួតប្រជែងនៅក្នុងការបោះឆ្នោតជ្រើសរើសប្រធានាធិបតីកាលពីឆ្នាំ២០២៣ និងទទួលបានសំឡេងឆ្នោតយ៉ាងប្រកៀកប្រកិតគ្នាបំផុតទល់នឹងលោកយូនសុខយូល (Yoon Suk Yeol) ដែលជាប្រធានាធិបតីកូរ៉េខាងត្បូងកំពុងកាន់អំណាចសព្វថ្ងៃ។
ក្រោយហេតុការណ៍នេះ លោកយូនសុខយូលប្រកាសថ្កោលទោសជាទម្ងន់ចំពោះការបង្ករបួសស្នាមទៅលើដៃគូនយោបាយរបស់លោក។ លោកចាត់ទុកថានេះជាទង្វើដែលមិនអាចទទួលយកបានជាដាច់ខាត។ នេះបើតាមសេចក្ដីប្រកាសរបស់ខុទ្ទកាល័យលោកយូនសុខយូល។ លោកសូមសម្ដែងការខ្វាយខ្វល់ខ្លាំងចំពោះសុខទុក្ខរបស់លោកលី និងសូមឱ្យក្រុមគ្រូពេទ្យខិតខំឱ្យអស់ពីសមត្ថភាពដើម្បីព្យាបាលលោកលីឱ្យបានជាសះស្បើយឡើងវិញកាន់តែឆាប់តាមដែលអាចធ្វើទៅបាន។
សព្វថ្ងៃនេះ លោកលីកំពុងជាប់បណ្ដឹងនៅតុលាការពាក់ព័ន្ធនឹងការចោទប្រកាន់ថាលោកមានជាប់ពាក់ព័ន្ធនឹងអំពើពុករលួយនៅក្នុងគម្រោងអភិវឌ្ឍមួយកាលដែលលោកនៅកាន់តំណែងជាអភិបាលក្រុងសឹងណាម (Seongnam)។ លោកលីបដិសេធការចោទប្រកាន់នោះដោយចាត់ទុកថាវាជាការប្រឌិត និងជារឿងនយោបាយ។ ពាក់ព័ន្ធនឹងសំណុំរឿងបង្ករបួសស្នាមទៅលើលោកលីនៅថ្ងៃនេះ ថ្វីដ្បិតប្រទេសកូរ៉េខាងត្បូងរឹតត្បិតខ្លាំងទៅលើការប្រើប្រាស់កាំភ្លើង ប៉ុន្តែប្រទេសនេះក៏ឧស្សាហ៍កើតមានអំពើហិង្សាពាក់ព័ន្ធនឹងរឿងនយោបាយផងដែរតាមរយៈការប្រើប្រាស់អាវុធផ្សេងក្រៅពីកាំភ្លើង។
កាលពីមុន, អតីតប្រធានាធិបតីកូរ៉េខាងត្បូង លោកស្រីប៉ាក់ឃុនហេ (Park Geun-hye) កាលពីលោកស្រីនៅកាន់តំណែងជាប្រធានគណបក្សប្រឆាំង ក៏ធ្លាប់ត្រូវគេបង្ករបួសស្នាមផងដែរនៅក្នុងការរៀបចំកម្មវិធីជួបជុំគ្នាមួយកាលពីឆ្នាំ២០០៦។ កាលនោះ លោកស្រីត្រូវគេវាយប្រហារដោយកាំបិត បណ្ដាលឱ្យត្រូវរបួសត្រង់មុខរបស់លោកស្រី ហើយត្រូវគ្រូពេទ្យដេរអស់ជាច្រើនថ្នេរ៕ (ប្រភព៖ The Guardian)
ចែករំលែកព័តមាននេះ