បន្ទាប់ពីអាកាសធាតុចុះត្រជាក់ខ្លាំងប៉ុន្មានថ្ងៃជាប់ៗគ្នា គេសង្កេតឃើញក្មេងៗ និងចាស់ៗមួយចំនួន បានងើបតាំងពីព្រលឹមបង្កាត់ភ្លើងដុតកំដៅរាងកាយ។ ចំណែកប្រជាពលរដ្ឋរស់នៅក្នុងក្រុងប៉ៃលិន ទាំងក្មេង ទាំងចាស់ និងប្រុសស្រី រួមជាមួយអ្នករត់ម៉ូតូឌុប ក៏នាំគ្នាសម្រុកទៅទិញ
ខេត្តប៉ៃលិន ៖ រហូតមកដល់ថ្ងៃទី២៥ ខែធ្នូ ឆ្នាំ២០២៣នេះ បន្ទាប់ពីអាកាសធាតុចុះត្រជាក់ខ្លាំងប៉ុន្មានថ្ងៃជាប់ៗគ្នា គេសង្កេតឃើញក្មេងៗ និងចាស់ៗមួយចំនួន បានងើបតាំងពីព្រលឹមបង្កាត់ភ្លើងដុតកំដៅរាងកាយ។ ចំណែកប្រជាពលរដ្ឋរស់នៅក្នុងក្រុងប៉ៃលិន ទាំងក្មេង ទាំងចាស់ និងប្រុសស្រី រួមជាមួយអ្នករត់ម៉ូតូឌុប ក៏នាំគ្នាសម្រុកទៅទិញសម្លៀកបំពាក់ជជុះ និងខោអាវបំបាត់រងានៅឯទីផ្សារ ដោយក្នុងម្នាក់ៗទិញចាប់ពី២កំប្លេឡើងទៅ ដើម្បីពាក់ខ្លួនឯង និងផ្ញើជូនក្រុមគ្រួសារនៅឯផ្ទះផងដែរ។
ចំណែកក្រុមអាជីវករ ដែលលក់ដូរសម្លៀកបំពាក់ទាំងនេះ ក៏មានការមមារញឹក ហើយថែមទាំងមានទឹកមុខសប្បាយរីករាយក្នុងចិត្ត ខណៈពេលដែលមានអតិថិជនចូលទៅទិញច្រើនខុសពីថ្ងៃធម្មតា។
បើតាមប្រភពព័ត៌មានពីស្ត្រីម្នាក់មានឈ្មោះ ឌីណា ណៃ អាយុ៣៦ឆ្នាំ ជាអាជីវករលក់ដូរនៅក្នុងផ្សារសាមគ្គី ហៅផ្សារប៉ាហ៊ី រស់នៅក្នុង សង្កាត់ប៉ៃលិន ក្រុងប៉ៃលិន ខេត្តប៉ៃលិន បានរៀបរាប់ប្រាប់ឱ្យភ្នាក់ងារយើងដឹងថា «បន្ទាប់ពីចាប់ផ្តើមធ្លាក់ខ្យល់ត្រជាក់ខ្លាំងនាចុងខែ១២នេះ កាលពីថ្ងៃទី២១ ខែធ្នូ ឆ្នាំ២០២៣ ការលក់ដូរសម្លៀកបំពាក់របស់គាត់ដាច់ខ្លាំង ដោយមានការលក់កំរាលពូក សម្លៀកបំពាក់ក្មេងចាស់ប្រុសស្រីមួយទឹក (ក្បាលគីប) គ្រប់ប្រភេទ ក្នុងតម្លៃសមរម្យ ពោលគឺអាវបំបាត់រងារ ១លក់ត្រឹមតែតម្លៃ៥០០០រៀលទៅ៨០០០រៀល ខោជើងវែង ១លក់តម្លៃ១ម៉ឺនរៀល»។
គាត់បន្តទៀតថា «ការលក់ដូរដែលដាច់កាក់កបគួរឱ្យកត់សម្គាល់នោះ គឺជារដូវរងាខែធ្នូ ដែលមានអតិថិជនចូលទៅទិញយ៉ាងច្រើនកុះករ ធ្វើឱ្យរូបគាត់ស្ទើរតែលក់មិនចង់ទាន់ និងគ្មានពេលសម្រាកនោះទេ»។
គាត់បញ្ជាក់ទៀតថា «ថ្ងៃនេះ អ្វីដែលគួរឱ្យកត់សម្គាល់នោះ គឺមានអ្នករត់ម៉ូតូឌុបក៏ចូលទៅទិញសម្លៀកបំពាក់បំបាត់រងារសម្រាប់ខ្លួនឯង និងទិញផ្ញើប្រពន្ធកូននៅឯផ្ទះផងដែរ។ លើសពីនេះ រហូតដល់ពេលល្ងាច ក្រោយពីបិទតូបនៅផ្សារហើយ គាត់ក៏បន្តលក់ដូរស្បែកជើងនៅឯសួនកុមារ ក្បែរសាលាខេត្តប៉ៃលិនផងដែរ ហើយក៏មានម៉ូយចូលទៅទិញច្រើនគួរឱ្យកត់សម្គាល់»។
គាត់បញ្ជាក់បន្តទៀតថា «មិនត្រឹមតែតូបលក់សម្លៀកបំពាក់របស់គាត់ប៉ុណ្ណោះទេ សូម្បីតែតូបលក់ដូររបស់អាជីវករនៅក្បែរៗនោះ ក៏មានម៉ូយចូលទៅទិញច្រើន ធ្វើឱ្យម្ចាស់តូបសប្បាយរីករាយនៅក្នុងការលក់ដូរផងដែរ ហើយក៏បង្ហើបឱ្យដឹងថា បើលក់ដាច់ដូចរដូវរងាបែបនេះ ពួកគាត់ពិតជាទទួលបានកម្រៃចំណេញងាយស្រួលក្នុងការសងជំពាក់បំណុលគេថែមទៀតផង»៕
ចែករំលែកព័តមាននេះ