អ៊ីរ៉ង់បដិសេធរាល់ការចូលរួមក្នុងការវា.យប្រហារនាវាក្នុងសមុទ្រក្រហម
ប្រទេសអ៊ីរ៉ង់ ៖ អ៊ីរ៉ង់ចេញមុខប្រកាសភ្លាមៗចំពោះការចោទប្រកាន់របស់អាមេរិក ដោយកាលពីថ្ងៃទី
ប្រទេសអ៊ីរ៉ង់ ៖ អ៊ីរ៉ង់ចេញមុខប្រកាសភ្លាមៗចំពោះការចោទប្រកាន់របស់អាមេរិក ដោយកាលពីថ្ងៃទី២៣ធ្នូ ក្រុងតេហេរ៉ង់ បានបដិសេធរាល់ការចោទប្រកាន់ដែលថា ខ្លួនចូលរួមដៃជាមួយពួកឧទ្ទាមហ៊ូធីយេម៉ែន ក្នុងការវាយប្រហារបណ្ដានាវាពាណិជ្ជកម្មដែលចាត់ទុកថាទាក់ទិននឹងអ៊ីស្រាអែលក្នុងសមុទ្រក្រហម។
អនុរដ្ឋមន្ត្រីការបរទេសអ៊ីរ៉ង់លោកអាលីបាហ័ររីថ្លែងថា ការតស៊ូរបស់ក្រុមប្រដាប់អាវុធប្រឆាំងអ៊ីស្រាអែល មានកងកម្លាំងផ្ទាល់របស់ខ្លួន ហើយអាចធ្វើសកម្មភាពតាមការសម្រេចនិងតាមសមត្ថភាពរបស់ពួកគេ។ អ្នកការទូតអ៊ីរ៉ង់រូបនេះបញ្ចេញប្រតិកម្មចំពោះការអះអាងនានារបស់ពួកលោកខាងលិច និងការលើកឡើងរបស់លោកស្រី ADRIENNEWATSON អ្នកនាំពាក្យក្រុមប្រឹក្សាសន្តិសុខជាតិអាមេរិកដែលថា ក្រុងតេហេរ៉ង់បានផ្ដល់បណ្ដាព័ត៌មានដល់ពួកឧទ្ទាមយេម៉ែនពីចលនារបស់បណ្ដានាវាអាមេរិក។
មុននេះរដ្ឋមន្ត្រីការបរទេសអ៊ីរ៉ង់ លោកហូសាំងអាមៀអាប់ឌុលឡាហ៊ីយ៉ានគូសបញ្ជាក់ថា សហរដ្ឋអាមេរិកធ្លាប់បានស្នើឲ្យអ៊ីរ៉ង់ណែនាំដល់ពួកឧទ្ទាមហ៊ូធី កុំឲ្យវាយប្រហារលើបណ្ដាផលប្រយោជន៍អាមេរិកនិងអ៊ីស្រាអែលក្នុងតំបន់។ លោកថាយើងបានបញ្ជាក់ច្បាស់ប្រាប់អាមេរិកថា ក្រុមប្រដាប់អាវុធទាំងនោះធ្វើសកម្មភាពដើម្បីផលប្រយោជន៍របស់ពួកគេ។ យើងមិនបានបញ្ជាដល់ពួកគេហើយក៏នឹងមិនបញ្ជាឲ្យពួកគេបញ្ឈប់ការវាយប្រហារដែរ។
ដោយអះអាងថាធ្វើសកម្មភាពជួយដល់ក្រុមហាម៉ាស់ប៉ាឡេស្ទីន ក្នុងសង្គ្រាមពួកគេប្រឆាំងអីុស្រាអែល ពួកឧទ្ទាមយេម៉ែនគាំទ្រដោយអ៊ីរ៉ង់ រយៈពេលប៉ុន្មានសប្ដាហ៍ចុងក្រោយនេះ បានធ្វើការវាយប្រហារជាច្រើនប្រឆាំងបណ្ដានាវាពាណិជ្ជកម្ម។ សេតវិមានចោទអ៊ីរ៉ង់ថាជួយផ្ដល់ដល់ពួកឧទ្ទាមនោះ បណ្ដាឧបករណ៍យោធាទំនើបៗនិងជួយដល់ផ្នែកស៊ើបការណ៍។ កាលពីថ្ងៃទី២៣ធ្នូ ដ្រូន១គ្រឿងបានវាយប្រហារនាវាពាណិជ្ជកម្ម១គ្រឿងក្នុងមហាសមុទ្រឥណ្ឌាបណ្ដាលឲ្យរងការខូចខាត តែមិនបណ្ដាលឲ្យមនុស្សរងរបួសទេ។ នាវារងការវាយប្រហារនេះទាក់ទិនអ៊ីស្រាអែល។
តាមមន្ទីរប៉ងតាហ្គោនថា ពួកឧទ្ទាមហ៊ូធីដែលត្រួតត្រាដែនដីយេម៉ែនស្ទើរទាំងស្រុង បានធ្វើការវាយប្រហារដោយដ្រូននិងមីស៊ីលជាង១០០លើក សំដៅលើនាវាពាណិជ្ជកម្ម១០គ្រឿងទាក់ទិននឹងប្រទេស៣៥។ ដើម្បីទប់ទល់នឹងការគម្រាមកំហែងនេះអាមេរិកនិងបណ្ដាសម្ព័ន្ធមិត្តបានបង្កើតក្រុមចម្រុះមួយមានប្រទេស១០ចូលរួមដើម្បីការពារបណ្ដានាវាក្នុងសមុទ្រក្រហម។ ការវាយប្រហារផ្ទួនៗរបស់ពួកហ៊ូធីលើបណ្ដានាវាក្នុងផ្លូវសមុទ្រសំខាន់នោះ បង្ខំឲ្យក្រុមហ៊ុនដឹកជញ្ជូនតាមសមុទ្រធំៗលើពិភពលោក ផ្អាកមិនឲ្យនាវាពួកគបើកកាត់សមុទ្រនោះ រហូតដល់មានបទបញ្ជាជាថ្មី ៕
ចែករំលែកព័តមាននេះ