រាជធានីភ្នំពេញ៖ វិទ្យុចិន នៅកម្ពុជា និងព្រឹទ្ធសភា បានបើកពិព័រណ៍ ស្ដីពី សមិទ្ធផលនៃខួប ១០ឆ្នាំនៃការរួមគ្នាកសាង ”ខ្សែក្រវាត់ និងផ្លូវ” និងកិច្ចសំណេះសំណាល ”ប្រិយមិត្ត” អបអរសាទរ​ខួបគម្រប់ ១៥ឆ្នាំ នៃការបង្កើតវិទ្យុមិត្តភាពកម្ពុជា-ចិន។​

នៅរសៀលថ្ងៃទី១១ ខែធ្នូ ឆ្នាំ២០២៣ វិទ្យុមិត្តភាពកម្ពុជា-ចិន បានសហការជាមួយ​អគ្គលេខាធិការដ្ឋានព្រឹទ្ធសភា រៀបចំពិព័រណ៍ ស្ដីពី សមិទ្ធផលនៃខួប ១០ឆ្នាំ នៃការរួមគ្នាកសាង ”ខ្សែក្រវាត់ និងផ្លូវ” រវាងកម្ពុជា និងចិន និងកិច្ចសំណេះសំណាល ”ប្រិយមិត្ត” អបអរសាទរខួបគម្រប់ ១៥ឆ្នាំនៃការបង្កើតវិទ្យុមិត្តភាពកម្ពុជា-ចិន។ ពិធីនេះ បានធ្វើឡើង នៅសាលសិក្ខាសាលា​ព្រឹទ្ធសភា ក្នុងវិមានចំការមន​ ក្នុងរាជធានីភ្នំពេញ​។  

ក្នុងឱកាសនោះ កញ្ញា Yao Shiya ប្រធានគ្រប់គ្រងវិទ្យុមិត្តភាពកម្ពុជា-ចិន ប្រចាំរាជធានីភ្នំពេញ នៃអគ្គស្ថានីយវិទ្យុ និងទូរទស្សន៍មជ្ឈិមចិន បានឱ្យដឹងថា កម្មវិធីនេះ រៀបចំឡើង ក្នុងគោល​បំណង បង្ហាញនូវការតាំងពិព័រណ៍ ស្ដីពី សមិទ្ធផលនៃខួបគម្រប់ ១០ឆ្នាំ នៃការរួមគ្នាកសាង ”ខ្សែក្រវាត់ និងផ្លូវ” រវាងកម្ពុជា និងចិន ដែលសហការរៀបចំដោយអគ្គស្ថានីយវិទ្យុ និងទូរទស្សន៍មជ្ឈិមចិន ស្ថានទូតចិន ប្រចាំនៅកម្ពុជា និង​ក្រសួងព័ត៌មាន។

កញ្ញាបញ្ជាក់ថា ឆ្នាំ២០២៣នេះ ជាខួបគម្រប់ ៦៥ឆ្នាំនៃការបង្កើតចំណងការទូតកម្ពុជា-ចិន និងជាខួបគម្រប់ ១៥ឆ្នាំនៃការបង្កើតវិទ្យុមិត្តភាពកម្ពុជា-ចិន។ ១៥ឆ្នាំមកនេះ វិទ្យុមិត្តភាព​កម្ពុជា-ចិន បាន និងកំពុងប្រកាន់ខ្ជាប់នូវការអនុវត្តកាតព្វកិច្ចប្រព័ន្ធផ្សព្វផ្សាយ ធ្វើជាសាក្សី និងកត់ត្រាទុកនូវរឿងរ៉ាវមិត្តភាពដ៏ពិតប្រាកដរវាងកម្ពុជា និងចិន​។

ចំណែកលោក ជួន សុធី អគ្គនាយករង នៃអគ្គនាយកដ្ឋានព័ត៌មាន និងទំនាក់ទំនងសាធារណៈ នៃអគ្គលេខាធិការដ្ឋានព្រឹទ្ធសភា បានលើកឡើងថា  ការរៀបចំកម្មវិធីថ្ងៃ​នេះ ពិតជាបានចូល​រួមចំណែក ធ្វើឱ្យចំណងមិត្តភាពកម្ពុជា និងចិន កាន់តែស៊ីជម្រៅរឹងមាំ និងស្ថិតស្ថិរយូរអង្វែង និងនាំមកនូវការវិវឌ្ឍរីកចម្រើន លើគ្រប់វិស័យ។ ពោលគឺពីកិច្ចសហប្រតិបត្តិការជាដៃគូ​យុទ្ធសាស្ត្រ​គ្រប់​ជ្រុងជ្រោយ ទៅជាមិត្តភាពដែកថែប និងឈានដល់កិច្ចសហប្រតិបត្តិការ «ត្បូងពេជ្រ»។

ជាមួយគ្នានោះដែរ លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន និងជាសមាជិកគណៈប្រតិបត្តិនៃសមាគមមិត្តភាពកម្ពុជា-ចិន បានបង្ហាញក្តីរីករាយ និងចាត់ទុកថា តាមរយៈព្រឹត្តិការណ៍នេះ នឹងធ្វើឱ្យប្រជាជននៃប្រទេសទាំងពីរ បានយល់កាន់តែស៊ីជម្រៅអំពី​សមិទ្ធផល​ជាច្រើន ដែលកម្ពុជា ទទួលបានតាមរយៈការគាំទ្រ គំនិតផ្តួចផ្តើម ខ្សែក្រវាត់ និងផ្លូវ ​របស់ប្រធានរដ្ឋចិន Xi Jinping​។

ជាមួយគ្នានេះ តំណាងប្រិយមិត្តវិទ្យុមិត្តភាពកម្ពុជា-ចិន និងអ្នកចូលរួម បានបង្ហាញការគាំទ្រ ចំពោះព្រឹត្តិការណ៍ នៅថ្ងៃនេះ ដោយចាត់ទុកថា ជាការបង្កើនកិច្ចសហប្រតិបត្តិការកម្ពុជា-ចិន ឱ្យកាន់តែរឹងមាំថែមទៀត។ 

ក្នុងឱកាសដ៏ពិសេសនេះ មានការបញ្ចាំងវីដេអូ អបអរសាទរខួបគម្រប់ ១៥ឆ្នាំនៃការបង្កើត​វិទ្យុមិត្តភាព​កម្ពុជា-ចិនរបស់ថ្នាក់ដឹកនាំស្ថាប័នរាជរដ្ឋាភិបាល  អង្គភាពព័ត៌មានរដ្ឋ និងឯកជន សមាគម សាកលវិទ្យាល័យសំខាន់ៗ ហើយក៏មានការបង្ហាញចំណាប់អារម្មណ៍របស់​ប្រិយមិត្ត និងកាត់នំខួបកំណើតវិទ្យុមិត្តភាពកម្ពុជា-ចិន ផងដែរ៕ អ៊ាង ប៊ុនរិទ្ធ