ADផ្ទាំងផ្សព្វផ្សាយពាណិជ្ជកម្ម

Picture

កម្ពុជា ចូលរួមសន្និសីទកំពូលអង្គការ​សហប្រជាជាតិ ស្តីពី ការប្រែប្រួលអាកាសធាតុ លើកទី២៨ (COP28) នៅទីក្រុងឌូបៃ

2 ខែ មុន
  • ភ្នំពេញ

រាជធានីភ្នំពេញ៖ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានដឹកនាំគណៈប្រតិភូ​អន្តរក្រសួងកម្ពុជា ចូលរួមសន្និសីទ​កំពូលអង្គការសហប្រជាជាតិ ស្តីពីការប្រែប្រួល​អាកាសធាតុ លើកទី២៨ (COP28)…

រាជធានីភ្នំពេញ៖ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានដឹកនាំគណៈប្រតិភូ​អន្តរក្រសួងកម្ពុជា ចូលរួមសន្និសីទ​កំពូលអង្គការសហប្រជាជាតិ ស្តីពីការប្រែប្រួល​អាកាសធាតុ លើកទី២៨ (COP28) នៅទីក្រុងឌូបៃ។​

លោកបណ្ឌិត អ៊ាង សុផល្លែត បានឡើង​ថ្លែងនូវ​​សេចក្តីថ្លែងការណ៍ ក្នុងនាមសម្តេច មហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅឯសន្និសីទកំពូលអង្គការ​សហប្រជាជាតិ ស្តីពី ការប្រែប្រួលអាកាសធាតុលើកទី២៨ (COP28) នៅទីក្រុងឌូបៃ នៃប្រទេសអេមីរ៉ាត់អារ៉ាប់រួម ដើម្បីបង្ហាញពីការប្តេជ្ញាចិត្តខ្ពស់របស់កម្ពុជា ក្នុងកិច្ចខិតខំប្រឹងប្រែង​ជាអន្តរជាតិ ដើម្បីរួមចំណែកដោះស្រាយបញ្ហាប្រែប្រួលអាកាសធាតុ។

នៅចំពោះមុខថ្នាក់ដឹកនាំ មកពីជុំវិញពិភព​លោក ចំនួន ១៩៧ប្រទេស លោក​រដ្ឋមន្រ្តី អ៊ាង សុផល្លែត បានជំរុញដល់សមាជិកនៃអង្គសន្និសីទ COP28 ឱ្យបង្កើនបន្ថែមនូវកិច្ចសហការជា សកល ដែលមិនធ្លាប់មានពីមុនមកសម្រាប់ឆ្លើយតបទៅនឹងការប្រែប្រួលអាកាសធាតុ ដោយធានានូវសុខុមាលភាពរបស់សហគមន៍ និងសុខភាពនៃភពផែនដីរបស់យើង។

លោកបណ្ឌិត បានសង្កត់ធ្ងន់ពីការបេ្តជ្ញាចិត្តរបស់កម្ពុជា ក្នុងការចូលរួមជាមួយបណ្តាប្រទេស​ហត្ថលេខីនៃ UNFCCC ដូចតទៅ៖ ១- ក្នុងការរក្សាកំណើនសីតុណ្ហភាពត្រឹម ១,៥អង្សាសែលស៊ុស កម្ពុជាបានប្ដេជ្ញាចិត្តតាមរយៈការដាក់ចេញនូវយុទ្ធសាស្រ្តរយៈពេលវែង ប្រកបដោយអព្យាក្រឹត​កាបូន នៅត្រឹមឆ្នាំ២០៥០។​ ២- ជំរុញការប្រើប្រាស់ថាមពលកកើតឡើងវិញ ឱ្យបាន ៧០% នៅត្រឹមឆ្នាំ២០៣០ ដែលបច្ចុប្បន្ននេះកម្ពុជា មានថាមពលស្អាតរហូតដល់ ៦២% រួចហើយ។​ ៣- បង្កើនកាបូនស្តុក តាមរយៈការបង្កើនគម្របព្រៃឈើឱ្យបាន ៦០% ដោយក្នុងនោះ ក្រសួងបរិស្ថាន បានរួមចំណែកដាក់ចេញនូវយុទ្ធនាការដាំដើមឈើយ៉ាងហោចណាស់ ១លានដើម ក្នុងមួយឆ្នាំ និងការពារព្រៃឈើឱ្យបានហ្មត់ចត់។​ ៤- ជំរុញ និងអំពាវនាវដល់សហគមន៍អន្តរជាតិ នាំគ្នាកៀរគរ​មូលនិធិអាកាសធាតុ​បៃតង (GCF) ឱ្យបាន ១០០ប៊ីលានដុល្លារអាម៉េរិកក្នុងមួយឆ្នាំ​។​ ៥- ជំរុញ និងបង្កើនថវិកា សម្រាប់មូលនិធិអាកាសធាតុផ្សេងទៀត ដូចជា មូលនិធិបន្សាំ មូលនិធិនៃការ​បាត់បង់ និងខូចខាត ព្រមទាំងមូលនិធិ សម្រាប់ប្រព័ន្ធស្បៀង ជាដើម ដើម្បីទប់ទល់នឹងវិបត្តិ​អាកាសធាតុ។

សូមបញ្ជាក់ថា នៅថ្ងៃទី០៩ ខែធ្នូ ឆ្នាំ២០២៣ នេះ ក្រៅពីធ្វើសេចក្តីថ្លែងការណ៍ លោក​បណ្ឌិត អ៊ាង សុផល្លែត ក៏នឹងអញ្ជើញចូលរួម នៅក្នុងកិច្ចប្រជុំកម្រិតខ្ពស់ទ្វេភាគី ជាមួយអង្គការ CI កិច្ចប្រជុំ​ជាមួយប្រធានលេខាធិការដ្ឋានវេទិកាអង្គការសហប្រជាជាតិ ស្តីពី ព្រៃឈើ (UNFF)  និងកិច្ចប្រជុំ​កម្រិត​ខ្ពស់​នៃបណ្តាប្រទេសជាដៃគូ JCM លើកទី៩ ផងដែរ៕ អ៊ាង ប៊ុនរិទ្ធ

អត្ថបទសរសេរ ដោយ

កែសម្រួលដោយ