ប្រទះឃើញជនជាតិកូរ៉េម្នាក់ ដើរហាត់ប្រាណ ដេកស្លា.ប់ក្បែរផ្លូវជាតិ ផ្អើលក្រុងសៀមរាប
- សៀមរាប
ខេត្តសៀមរាប ៖ មានករណីបុរសជាជនជាតិកូរ៉េម្នាក់ដើរហាត់ប្រាណ ហើយត្រូវបានប្រជាពលរដ្ឋ
ខេត្តសៀមរាប ៖ មានករណីបុរសជាជនជាតិកូរ៉េម្នាក់ដើរហាត់ប្រាណ ហើយត្រូវបានប្រជាពលរដ្ឋប្រទះឃើញដេកស្លា.ប់ នៅលើផ្លូវជាតិលេខ៦ ត្រង់ចំណុចទល់មុខផ្លូវចូលមន្ទីរពេទ្យអន្តរជាតិរ៉ូយ៉ាល់អង្គរ ស្ថិតនៅភូមិកសិកម្ម សង្កាត់ស្រង៉ែ ក្រុងសៀមរាប ខេត្តសៀមរាប បង្កការភ្ញាក់ផ្អើលកាលពីវេលាម៉ោង៤និង២៥នាទីទៀបភ្លឺថ្ងៃទី៤ ខែធ្នូ ឆ្នាំ២០២៣។
សមត្ថកិច្ចបានឱ្យដឹងនៅថ្ងៃទី៥ ខែធ្នូ ឆ្នាំ២០២៣នេះថា បុរសម្នាក់ដែលប្រជាពលរដ្ឋបានប្រទះឃើញដេកស្លា.ប់នោះ ត្រូវបានរកឃើញអត្តសញ្ញាណស.ពហើយ គឺជនរងគ្រោះឈ្មោះ SON SOONKOO ភេទប្រុស អាយុ៥៧ឆ្នាំ មុខរបរទេសចរណ៍ ជនជាតិកូរ៉េខាងត្បូង កាន់លិខិតឆ្លង ដែនលេខ M៤៩៨៤៦៨៩៧ ស្នាក់នៅបណ្ដោះអាសន្ន ក្នុងសណ្ឋាគារ ឃីងដុម អង្គរ ស្ថិតក្នុងភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
សមត្ថកិច្ចបានបន្ថែមថា យោងតាមការបំភ្លឺពីឈ្មោះ ហុង ហ៊ូ ភេទប្រុស អាយុ៦៣ឆ្នាំ មានទីលំនៅបច្ចុប្បន្ន ស្ថិតនៅភូមិថ្នល់ សង្កាត់ស្រង៉ែ ក្រុងខេត្តសៀមរាប បានឲ្យដឹងថា នៅវេលាម៉ោង៣និង៥០នាទីទៀបភ្លឺ គាត់បានជិះម៉ូតូតែម្នាក់ឯង ដើម្បីទៅហូបកាហ្វេ ពេលរូបគាត់ជិះដល់កន្លែងកើតហេតុខាងលើ ស្រាប់តែឃើញមនុស្សប្រុសម្នាក់ដេកនៅលើចិញ្ចើមផ្លូវជាតិលេខ៦ ក្បាលបែរទៅទិសខាងជើង ។ បន្ទាប់មកគាត់បានចុះពីលើម៉ូតូដើរទៅមើល ពុំឃើញជនរងគ្រោះដកដង្ហើមនោះទេ ។ ភ្លាមនោះគាត់ក៏បានទូរស័ព្ទរាយការណ៍ជូនសមត្ថកិច្ច។
តាមប្រភពពីសមត្ថកិច្ចបានបញ្ជាក់ថា យោងតាមការបំភ្លឺពីឈ្មោះ KIM BONGTAE ភេទប្រុស អាយុ៥៦ឆ្នាំ មុខរបរទេសចរណ៍ ជនជាតិកូរ៉េខាងត្បូង កាន់លិខិតឆ្លងដែនលេខ M ៥០២២២៤៧២០ ត្រូវជាមិត្តភក្តិរបស់ជនរងគ្រោះបានឱ្យដឹងថា «គាត់បានចូលមកប្រទេសកម្ពុជានៅថ្ងៃទី៣ ខែធ្នូ ឆ្នាំ២០២៣ តាមច្រកព្រលានយន្តអន្តរជាតិសៀមរាបអង្គរ ក្នុងគោលបំណងដើម្បីធ្វើទេសចរណ៍ តាមរយៈក្រុមហ៊ុនទេសចរណ៍ ហ្គូដ ធួរ ដែលមានសមាជិកជនជាតិកូរ៉េទាំងអស់ចំនួន០៦នាក់ (ស្រី២នាក់) ។ ពេលមកដល់ ខាងក្រុមហ៊ុនទេសចរណ៍បានរៀបចំឱ្យពួកគាត់ចូលស្នាក់នៅសណ្ឋាគារ ឃីងដុម អង្គរ ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ដោយគាត់ និងជនរងគ្រោះបានស្នាក់នៅបន្ទប់លេខ១២៣ រួមគ្នា ព្រោះគាត់ និងជនរងគ្រោះស្គាល់គ្នា អស់រយៈពេល៣០ឆ្នាំមកហើយ។
មិត្តភក្តិរបស់ជនរងគ្រោះបានបន្តថា ចាប់តាំងពីស្គាល់គ្នាមក ពួកគាត់តែងតែដើរលេងជាមួយគ្នាតាមបណ្តាប្រទេសនានា រៀងរាល់មួយឆ្នាំដង ដោយជនរងគ្រោះពុំដែលមានបញ្ហាសុខភាពអ្វីនោះទេ ។ ពេលចូលដល់ក្នុងបន្ទប់ស្នាក់នៅ ពួកយើងគេងលក់ទាំងអស់គ្នាតែម្តង ។ រហូតដល់វេលាម៉ោង៦ ព្រឹកថ្ងៃទី៤ ខែធ្នូ ឆ្នាំ២០២៣ គាត់បានភ្ញាក់ពីគេង ពុំបានឃើញជនរងគ្រោះនោះទេ ។ គាត់ក៏ពុំបានចាប់អារម្មណ៍អ្វីនោះដែរ ព្រោះគិតថា ជនរងគ្រោះចេញទៅរត់ហាត់ប្រាណដូចរាល់ដង។ រហូតដល់វេលាម៉ោង៧ព្រឹកថ្ងៃខែឆ្នាំដដែល គាត់ចុះមកហូបអាហារពេលព្រឹកក្នុងភោជនីយដ្ឋានរបស់សណ្ឋាគារ ពេលនោះ ស្រាប់តែមគ្គុទេសទេសចរណ៍ជាស្ត្រីជនជាតិកូរ៉េម្នាក់ បានមកប្រាប់គាត់ថា ឈ្មោះ SON SOONKOO បានស្លា.ប់បាត់ហើយ នៅអំឡុងពេលដែលជនរងគ្រោះកំពុងរត់ហាត់ប្រាណ។
សមត្ថកិច្ចបានបញ្ជាក់ទៀតថា ដោយយោងតាមការបំភ្លឺពីសាក្សី និងការពិនិត្យសាកស.ព និងតាមការបញ្ជាក់ពីលោកគ្រូពេទ្យកោសល្យវិច័យយើងសន្និដ្ឋានថា បុរសខាងលើ ស្លាប់ដោយសារគាំងបេះដូង។
ដោយមានការសម្រេចពីស្ថានកុងស៊ុលកូរ៉េខាងត្បូងប្រចាំខេត្តសៀមរាប បច្ចុប្បន្នសាកស.ពជនរងគ្រោះ បានសមត្ថកិច្ចជំនាញប្រគល់ជូនលោកស្រី JEONG MIRAN ត្រូវជាម្ចាស់អាជីវកម្មក្រុមហ៊ុន ហ្គូដ ធួរ & អ៊ែរ ឯ.ក យកទៅរក្សាទុកនៅមន្ទីរពេទ្យអន្តរជាតិរ៉ូយ៉ាល់អង្គរ ដើម្បីរង់ចាំក្រុមគ្រួសារ មកទទួលយកទៅធ្វើបុណ្យ ៕
ចែករំលែកព័តមាននេះ