ការព្រួយបារម្ភពីការកើនឡើងនៃការឆ្លងមេរោគអេ.ដស៍ក្នុងចំណោមក្មេងជំទង់នៅថៃ
ប្រទេសថៃ ៖ មូលនិធិថែទាំសុខភាព Aids (AHF) របស់ប្រទេសថៃបានលើកឡើងពីការព្រួយបារម្ភ
ប្រទេសថៃ ៖ មូលនិធិថែទាំសុខភាព Aids (AHF) របស់ប្រទេសថៃបានលើកឡើងពីការព្រួយបារម្ភអំពីការកើនឡើងនៃអត្រាឆ្លងមេរោគអេដស៍នៅក្នុងចំណោមក្មេងជំទង់ ដោយសារតែការរួមភេទមិនបានការពារ។
លោក Kritsiam Arayawongchai នាយកកម្មវិធីប្រចាំប្រទេសថៃរបស់មូលនិធិនេះ បានលាតត្រដាងបញ្ហានេះក្នុងវេទិកានាពេលថ្មីៗ ដែលមានចំណងជើងថា «To Love is Not Wrong But Don’t forget to Protect Yourself» គោលបំណងលើកទឹកចិត្តដល់ការអនុវត្តផ្លូវភេទប្រកបដោយសុវត្ថិភាពក្នុងចំណោមសិស្សវិទ្យាល័យ។
នៅក្នុងការសិក្សាទូលំទូលាយធ្វើឡើងដោយ AHF Thailand សហការជាមួយនឹងមជ្ឈមណ្ឌលថែទាំសុខភាពចំនួន ២៥ ដើម្បីប្រមូលលទ្ធផលការធ្វើតេស្តឈាមរកមេរោគអេដស៍ពីមនុស្សចំនួន ៧៣,០៨១នាក់ ដែលមានអាយុពី ១៥ដល់ជាង៥០ឆ្នាំ ចាប់ពីថ្ងៃទី១ ខែមករា ដល់ថ្ងៃទី៣១ ខែតុលា លទ្ធផលបានបង្ហាញថា ១៥២នាក់ ឬ ២.៩% នៃក្មេងជំទង់ ៥,១១៦នាក់មានអាយុពី១៥-១៩ឆ្នាំ ផ្ទុកមេរោគអេដស៍។ ក្រុមអាយុ ២០-២៤ឆ្នាំ ក៏ត្រូវបានចាត់ទុកថាមានហានិភ័យខ្ពស់ផងដែរ ដោយនៅក្នុងចំណោមមនុស្ស ១៥,៦៤៦នាក់ ចំនួន ៣៨៧នាក់ ឬ ២.៤% ផ្ទុកមេរោគអេដស៍។
វេទិកាដែលរៀបចំដោយក្រុមស្ម័គ្រចិត្ត Impulse Bangkok បានធ្វើឡើងនៅសាលាវត្តរាជអូរោត (Wat Ratcha-orot) និងមានការចូលរួមពីសិស្សវិទ្យាល័យចំនួន៥០០នាក់មានគោលបំណងចម្បងលើកកម្ពស់ការយល់ដឹងអំពីមេរោគអេដស៍/ជំងឺអេដស៍ នៅក្នុងចំណោមសិស្សានុសិស្ស។ លោក Kritsiam ពន្យល់បន្ថែមថា ទិន្នន័យពីនាយកដ្ឋានប្រយុទ្ធនឹងជំងឺបានបង្ហាញពីការព្រួយបារម្ភនៅក្នុងចំណោមយុវជន ដោយមានតែ ៨០,៣% នៃយុវជនអាយុពី ១៥-២៤ឆ្នាំប៉ុណ្ណោះ ដែលប្រើប្រាស់ស្រោមអនាម័យ។ ទោះជាយ៉ាងណាក៏ដោយ ភាគរយនេះត្រូវបានកាត់បន្ថយមកត្រឹម ៤០% នៅពេលពួកគេរួមភេទជាមួយគូស្នេហ៍របស់ពួកគេ ដែលតួលេខនេះឆ្លុះបញ្ចាំងពីចំនួនយុវជនខ្វះការយល់ដឹងអំពីការប្រើស្រោមអនាម័យ ដើម្បីការពារមេរោគអេដស៍ និងការឆ្លងរោគតាមផ្លូវភេទ។
ឆ្លើយតបទៅនឹងស្ថិតិដ៏គួរឱ្យព្រួយបារម្ភនោះ លោក Woranan Khankaeng នាយកសាលាវត្តរាជអូរោត បានសង្កត់ធ្ងន់លើសារៈសំខាន់នៃការលើកកម្ពស់ការយល់ដឹងអំពីមេរោគអេដស៍ ហើយសាលារបស់លោកបានផ្តួចផ្តើមយុទ្ធនាការមួយមានឈ្មោះថា «Teens Safe from HIV» ដែលរួមមានការប្រឹក្សា និងសេវាថែទាំសុខភាព។ លោកសម្តែងក្តីសង្ឃឹមថា សិស្សានុសិស្សនឹងផ្សព្វផ្សាយសារអំពីការអនុវត្តផ្លូវភេទប្រកបដោយសុវត្ថិភាពដល់ក្រុមគ្រួសារ និងមិត្តភ័ក្តិពួកគេក្នុងគោលបំណងកាត់បន្ថយការឆ្លងថ្មី៕ (ប្រភព ៖ បាងកកប៉ុស្ត៍ និង The Thaiger)
ចែករំលែកព័តមាននេះ