រាជធានីភ្នំពេញ ៖ សម្តេចធិបតី ហ៊ុន ម៉ាណែត ប្រមុខមុខរាជរដ្ឋាភិបាលកម្ពុជា បានអះអាងថា ជនមានពិការភាព មានតួនាទីយ៉ាងសំខាន់ ដើម្បីចូលរួមអភិវឌ្ឍន៍ប្រទេសជាតិ។ រាជរដ្ឋាភិបាល អាណត្តិទី៧នេះ បន្តជំរុញការលើកកម្ពស់ និងចាត់ទុកវិស័យពិការភាពជាការងារអាទិភាព ។
ថ្លែងក្នុងឱកាសអញ្ជើញជាអធិបតីក្នុងពិធី “អបអរសាទរ ទិវាជនមានពិការភាព លើកទី២៥ និងអន្តរជាតិ លើកទី៤១” ដែលរៀបចំឡើងនៅសាលមហោស្រព កោះពេជ្រ នាព្រឹកថ្ងៃទី៤ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា រាជរដ្ឋាភិបាលមានចក្ខុវិស័យច្បាស់លាស់ ដើម្បីធានាឧត្តមប្រយោជន៍ជូនជនមានពិការភាព ណែនាំឱ្យអាជ្ញាធរ បន្ដគាំទ្រជនមានពិការភាពនៅគ្រប់ទម្រង់ ។
សម្ដេចធិបតី បានថ្លែងបន្តថា ទិវាជនមានពិការភាពអន្តរជាតិ ត្រូវបានប្រារព្ធឡើង ដើម្បីរម្លឹក អំពីការតស៊ូទាមទារសិទ្ធិ ចូលរួមក្នុងសង្គមរបស់ជនមានពិការភាពប្រមាណ១.៣ពាន់លាននាក់ នៃប្រជាជននៅលើពិភពលោក ដែលជាជនបាត់បង់កាយសម្បទា ញាណដឹង និងសតិបញ្ញា។ ឆ្នាំ២០២៣ កម្ពុជាបានបង្ហាញសមត្ថភាពរបស់ជនមានពិការភាព ដោយស្មើមុខស្មើមាត់នៅលើឆាកអន្ដរជាតិ តាមរយៈការប្រកួតយកមេដាយក្នុងការប្រកួតអាស៊ានប៉ារ៉ាហ្គេម ។
ក្នុងឱកាសនោះដែរ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ បានលើកឡើងថា នៅឆ្នាំ២០២៣ មានជនមានពិការភាព ចូលបម្រើការងារ តាមស្ថាប័នរដ្ឋ និងវិស័យឯកជនទូទាំងប្រទេសសរុបជាង ៧ពាន់នាក់ ។
ឯកឧត្តមរដ្ឋមន្ត្រី បានឱ្យដឹងថា ជនមានពិការភាពចូលបម្រើការងារ ក្នុងក្រសួង-ស្ថាប័នរដ្ឋ ចំនួន៣៩ មានជនមានពិការភាពចូលបម្រើការងារចំនួន ៣,៧៧៦នាក់ ក្នុងនោះស្ត្រីចំនួន ៨៦៩នាក់ ជនមានពិការភាពកម្រិតធ្ងន់ចំនួន ២,៣៥១នាក់ ស្មើ២,០៥% ក្នុងឆ្នាំ២០២៣ ។
ឯកឧត្តម បានឱ្យដឹងទៀតថា ដោយឡែក វិស័យឯកជនរួមមាន ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រសរុបចំនួន២៤១ ជនមានពិការភាព បានចូលបម្រើការងារចំនួន ៣,៧៥៩នាក់ ស្ត្រីចំនួន ៣,៦៣១នាក់។ ក្នុងឱកាសប្រារព្ធទិវាជនមានពិការភាពកម្ពុជាលើកទី២៥ និងអន្តរជាតិលើកទី៤១នេះ ឯកឧត្តមរដ្ឋមន្ត្រី បានគូសបញ្ជាក់ថា ឆ្នាំ២០២៣នេះ បានប្រារព្ធឡើងក្រោមប្រធានបទ “ដំណោះស្រាយប្រកបដោយនវានុវត្តន៍ ដើម្បីសង្គមមួយមានផាសុកវត្ថុ និងសមធម៌” ក្នុងគោលបំណងបង្កើនការយល់ដឹងអំពី ពិការភាពដើម្បីលើកស្ទួយការអនុវត្តកាតព្វកិច្ចនានា ឈានទៅសម្រេចនូវការអនុវត្តអភិក្រម “ធ្វើឱ្យសិទ្ធិក្លាយជាការពិត” ដើម្បីផ្លាស់ប្តូរផ្នត់គំនិតការប្រើប្រាស់ពាក្យសំដី ប្រមាថមាក់ងាយ សើចចំអកឡកឡាយ ដែលនាំឱ្យប៉ះពាល់ដល់សិទ្ធិ និងសេចក្តីថ្លៃថ្នូរ ហើយអាចបាត់បង់ឱកាស ចូលរួមយ៉ាងពេញលេញរបស់ជនមានពិការភាព ។
គួរឱ្យដឹងដែរថា រាជរដ្ឋាភិបាលកម្ពុជា បានកំណត់យកវិស័យពិការភាពជាការងារអាទិភាព ដោយបានផ្តល់សច្ចាប័នលើអនុសញ្ញាស្តីពីសិទ្ធិជនពិការ និងលិខិតូបករណ៍អន្តរជាតិផ្សេងៗ បានកសាងនិងដាក់ឱ្យអនុវត្តច្បាប់ គោលនយោបាយ និងលិខិតបទដ្ឋានគតិយុត្តជាតិ ពង្រឹងការផ្តល់សេវាផ្សេងៗ ដូចដែលមានចែងក្នុងកម្មវិធី នយោបាយផែនការយុទ្ធសាស្ត្របញ្ចាកោណ ដំណាក់កាលទី១ ក្របខណ្ឌគោលនយោបាយជាតិ គាំពារសង្គម ២០១៦-២០២៥ និងការធ្វើបរិយាបន្នជួយជនមានពិការភាព ទៅក្នុងគ្រប់វិស័យ ៕
ចែករំលែកព័តមាននេះ