រាជធានីភ្នំពេញ ៖ តារាចម្រៀងលោក ភព ដែលជាពន្លកថ្មីទើបនឹងរះ ហើយបងប្អូនមួយចំនួនអាចនឹងស្គាល់កំលោះសង្ហារូបនេះហើយ ដោយលោកទើបតែប្រឡូក និងឈានជើងចូលសិល្បៈប៉ុណ្ណោះ ប៉ុន្តែលោកទទួលបានការងារច្រើនគួរសមទៅលើការចេញបទចម្រៀងថ្មីៗ និងការប្រគំតន្ត្រីផងដែរ។
តារាចម្រៀងដែលជាពន្លកនៃសិល្បៈរូបនេះ ពិតជាតស៊ូវិវឌ្ឍន៍ខ្លួន១៨០ដឺក្រេ ក្នុងការក្លាយខ្លួនជាតារាចម្រៀង និងអាចចេញនូវបទចម្រៀងជាច្រើនបទ ដែលនាពេលបច្ចុប្បន្ននេះកំពុងទទួលបានការគាំទ្រតាមរយៈបណ្តាញសង្គមនោះ ដូចជាបទ «និយាយដើមស្រីៗ», បទ«បងមិនមែនជាសាប៊ូកក់សក់», បទ «អូនគឺ The Best» និងបទចម្រៀងជាច្រើនបទទៀត ដែលលោកទទួលបានសន្ទុះការគាំទ្រគួរអោយកត់សម្គាល់។
![](https://kohsantepheapdaily.com.kh/wp-content/uploads/2023/12/c4ca4238a0b923820dcc509a6f75849b-2.jpg)
តាមរយៈសម្លេងដ៏ផ្អែមស្រទន់របស់លោក ហើយក្រោយពេលបកស្រាយបានច្រើនបទគួរសមនោះ ឃើញមានមហាជនកោតសរសើរលោក និងសំណូមពរអោយលោកចេញចម្រៀងថ្មីៗផងដែរនោះ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក ភព បានប្រាប់អោយដឹងថា «លោកពិតជារីករាយជាខ្លាំង ក្រោយពេលលោកទទួលបានការគាំទ្រពីសំណាក់ទស្សនិជន។ ហើយលោកនឹងខិតខំរកអ្វីដែលថ្មីប្លែកសម្រាប់ការចែកជូនទៅកាន់មហាជនបន្ថែមទៀត មិនថា ការច្រៀង ការសម្តែង និងស្ទាយតុបតែខ្លួននោះទេ ពោលគឺលោកនឹងរិះរកអ្វីដែលថ្មី និងជាការបំពេញទំហំចិត្តទស្សនិកជន»។
តារាចម្រៀងលោក ភព ដែលមានស្រុកកំណើតនៅខេត្តកំពតរូបនេះ បានបន្តថា «នាពេលបច្ចុប្បន្ន លោកបានចេញចម្រៀងប្រមាណជាង១០បទ ហើយបទដែលទទួលការគាំទ្រនោះ មានដូចជា ៖ បទ«បងមិនមែនជាសាប៊ូកក់សក់», បទ«អូនគឺ The Best» និង «Sad ហើយ»ជាដើម ក៏ដូចជាបទថ្មីៗជាច្រើនទៀត ក្នុងដើមឆ្នាំ២០២៤ខាងមុខនេះទៀតផងដែរនោះ»។
![](https://kohsantepheapdaily.com.kh/wp-content/uploads/2023/12/c81e728d9d4c2f636f067f89cc14862c-3.jpg)
បើងាកមកជីវិតរបស់តារាចម្រៀង លោក ភព បានអោយដឹងទៀតថា «កាលនៅពីក្មេង លោកគ្រាន់តែក្តីស្រម៉ៃចង់ក្លាយជាតារាចម្រៀងម្នាក់ ដោយបានខិតខំសុំគេច្រៀងជាច្រើនកន្លែង ហើយកន្លែងខ្លះក៏គេអោយច្រៀង កន្លែងខ្លះទៀតក៏គេបដិសេដមិនអោយច្រៀង ពោលគឺទម្រាំលោកមានថ្ងៃនេះ ហើយអាចចេញចម្រៀងជាច្រើនបទបាន គឺពុំងាយទេសម្រាប់លោកផ្ទាល់»។
លោក ភព បានបន្តថា «លោកជឿថា អ្វីក៏ដោយ ដែលលោកស្រឡាញ់ លោកនឹងធ្វើអោយបាន ពោលគឺដូចជាក្តីស្រម៉ៃរបស់លោក ក៏ដូចជាការច្រៀងកាន់ក្បាលមេក្រូជាដើមនោះ»។
ជាចុងក្រោយ លោកពិតជាអរគុណខ្លាំងណាស់ ចំពោះបងប្អូនទស្សនិកជន ដោយលោកនឹងព្យាយាមរិះរកអ្វីដែលថ្មីប្លែក និងចេញបទថ្មីៗ ដើម្បីបំពេញអារម្មណ៍បងប្អូនមហាជន ដោយពុំអោយខកបំណងនោះឡើយ៕ ដោយ ៖ លីហួ គីមឆាយ
![](https://kohsantepheapdaily.com.kh/wp-content/uploads/2023/12/eccbc87e4b5ce2fe28308fd9f2a7baf3-3.jpg)
![](https://kohsantepheapdaily.com.kh/wp-content/uploads/2023/12/a87ff679a2f3e71d9181a67b7542122c-1.jpg)
![](https://kohsantepheapdaily.com.kh/wp-content/uploads/2023/12/e4da3b7fbbce2345d7772b0674a318d5-1.jpg)
![](https://kohsantepheapdaily.com.kh/wp-content/uploads/2023/12/1679091c5a880faf6fb5e6087eb1b2dc-2.jpg)
![](https://kohsantepheapdaily.com.kh/wp-content/uploads/2023/12/8f14e45fceea167a5a36dedd4bea2543-2.jpg)
![](https://kohsantepheapdaily.com.kh/wp-content/uploads/2023/12/c9f0f895fb98ab9159f51fd0297e236d-2.jpg)
ចែករំលែកព័តមាននេះ