រាជធានីភ្នំពេញ ៖ ក្នុងពិធីបើកបវសនកាល ឆ្នាំសិក្សា២០២៣-២០២៤ និងចែករង្វាន់ដល់សិស្សពូកែ រាជធានីភ្នំពេញ នៅវិទ្យាល័យ ជា ស៊ីម ឈូកវ៉ា…
រាជធានីភ្នំពេញ ៖ ក្នុងពិធីបើកបវសនកាល ឆ្នាំសិក្សា២០២៣-២០២៤ និងចែករង្វាន់ដល់សិស្សពូកែ រាជធានីភ្នំពេញ នៅវិទ្យាល័យ ជា ស៊ីម ឈូកវ៉ា សង្កាត់គោករកា ខណ្ឌព្រែកព្នៅ នាព្រឹកថ្ងៃទី០១ ខែធ្នូ ឆ្នាំ២០២៣ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានថ្លែងថា រដ្ឋបាលរាជធានីភ្នំពេញ បានបង្កើតក្រុមតេឡេក្រាមមួយ ដោយភ្ជាប់គ្នារវាងសាលារៀន ជាមួយនឹងអាជ្ញាធរ និងកងកម្លាំងមានសមត្ថកិច្ចមូលដ្ឋាន ដើម្បីធ្វើយ៉ាងណាឲ្យនៅតាមសាលារៀន មានសន្តិសុខល្អ មិនមានគ្រឿងញៀន និងមិនមានក្រុមបងតូចបងធំ ដើម្បីឲ្យក្មួយៗ សិស្សានុសិស្ស បានសិក្សារៀនសូត្រ ក្លាយជាទំពាំងស្នងឫស្សីរបស់ជាតិ នាពេលអនាគត។
លោកអភិបាល បានណែនាំក្មួយៗ សិស្សានុសិស្សទាំងអស់ ព្យាយាមរៀនសូត្រ កុំដើរលេងកម្សាន្តច្រើនជាងការរៀនសូត្រ នាំឲ្យសោកស្ដាយ នៅពេលអនាគត ខណៈដែលក្មួយៗ មានឱកាសក្នុងការសិក្សារៀនសូត្រ ក្រោមម្លប់ នៃសន្តិភាព ។
លោកអភិបាល បានលើកឡើងទៀតថា សម្ដេចមហាបវរធិបតី ហ៊ុន ម៉ាណែត បានយកចិត្តទុកដាក់ខ្លាំងណាស់ ដោយរកអស់គ្រប់មធ្យោបាយ ដើម្បីធ្វើយ៉ាងណាឲ្យកម្ពុជាមានភាពរីកចម្រើនរុងរឿង ក្លាយជាប្រទេស ដែលមានចំណូលកម្រិតខ្ពស់ នៅឆ្នាំ២០៥០។ តាមរយៈនេះ ការខិតខំប្រឹងប្រែងរៀនសូត្ររបស់ក្មួយៗ គឺដើម្បីខ្លួនឯងផង ដើម្បីគ្រួសារផង និងជាពិសេស គឺដើម្បីសង្គមជាតិរបស់យើងទាំងមូល ដោយពេលនេះក្មួយៗមានលទ្ធភាពគ្រប់គ្រាន់ ក្នុងការសិក្សារៀនសូត្រ ពោលគឺក្មួយៗអាចរៀនសូត្រ បានតាមប្រព័ន្ធអ៊ីនធឺណែត ថែមទៀតផង ។
លោកបន្តថា ការទទួលបានមេដាយរបស់ក្មួយៗ គឺជាកិត្តិយសរបស់ក្មួយៗ កិត្តិយសរបស់អាណាព្យាបាល ឪពុកម្ដាយរបស់ក្មួយៗ ហើយក៏ជាកិត្តិយសរបស់ជាតិយើងផងដែរ។ សម្រាប់អាជ្ញាធររាជធានីភ្នំពេញ តែងតែជួយគាំទ្រ ទាំងសម្ភារៈ និងថវិកា ជាមួយនឹងការតម្រង់ទិសក្មួយៗឲ្យដើរផ្លូវល្អ ត្រូវជៀសវាងការប្រព្រឹត្ត នូវអបាយមុខផ្សេងៗ ។
សូមបញ្ជាក់ថា រដ្ឋបាលរាជធានីភ្នំពេញ បានជូនរង្វាន់ដល់សិស្សានុសិស្សពូកែ តាមថ្នាក់មានចំណាត់ថ្នាក់លេខ១ ដល់លេខ៣ ពីថ្នាក់ទី៩ ដល់ថ្នាក់ទី១២ តាមគ្រឹះស្ថានមធ្យមសិក្សាសាធារណៈ មានចំនួន ៣,៨៩៤នាក់ ស្រី២,៣៤៨នាក់ ក្នុងនោះចំណាត់ថ្នាក់លេខ១ ចំនួន ១,២៩៨នាក់ ស្រី ៨០៥នាក់។ ចំណាត់ថ្នាក់លេខ២ ចំនួន ១,២៩៨នាក់ ចំណាត់ថ្នាក់លេខ៣ ចំនួន ១,២៩៨នាក់ ស្រី ៧៧៩នាក់ ។
រាជធានីភ្នំពេញ បានរៀបចំប្រឡងជ្រើសរើសសិស្សពូកែ ទូទាំងរាជធានី ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ដែលមកពីគ្រប់គ្រឹះស្ថានមធ្យម សិក្សាសាធារណៈ និងឯកជនទូទាំងរាជធានី មានចំនួន ៨៧១នាក់ ស្រី៥១៨នាក់ បានជាប់ចំណាត់ ថ្នាក់រាជធានីចំនួន ៦៦នាក់ ក្នុងនោះយុវតី៣៣នាក់ ។
មន្ទីរអប់រំ យុវជន និងកីឡារាជធានីភ្នំពេញ បានបញ្ជូនសិស្សពូកែរាជធានី ចំនួន ៦៦នាក់ ក្នុងនោះយុវតី ៣៣នាក់ ទៅចូលរួមប្រឡងជ្រើសរើសសិស្សពូកែទូទាំងប្រទេស នាថ្ងៃទី១២ ខែមិថុនា ឆ្នាំ២០២៣ នៅមណ្ឌលវិទ្យាល័យនេតយ៉ង់ ខេត្តបាត់ដំបង ដែលបេក្ខជនមកពីគ្រប់រាជធានី-ខេត្ត ចំនួន៤៨០នាក់ ។ ជាលទ្ធផល រាជធានីភ្នំពេញ ដណ្ដើមបានជ័យលាភីចំនួន ៧នាក់ យុវតី០២នាក់ ក្នុងនោះ មេដាយមាស ០២ លើមេដាយមាសទូទាំងប្រទេស៦ ។
បេក្ខជនជ័យលាភីសិស្សពូកថ្នាក់អន្តរជាតិ ក្រសួងអប់រំ យុវជន និងកីឡា បានបញ្ជូនបេក្ខជនជាសិស្សពូកែទូទាំងប្រទេស ទៅចូលរួមប្រកួតប្រជែងថ្នាក់អន្តរជាតិ ក្នុងនោះសិស្សានុសិស្សរបស់រាជធានីភ្នំពេញ ចំនួន៨០នាក់ ទទួលមេដាយមាសចំនួន៨៥នាក់ ស្រី៥១នាក់ មេដាយប្រាក់ចំនួន ៤៥នាក់ ស្រី១៩នាក់មេដាយសំរឹទ្ធ ចំនួន៥៧នាក់ ស្រី២៣នាក់ ៕
ចែករំលែកព័តមាននេះ