ខេត្តក្រចេះ ៖ កម្លាំងនគរបាលខេត្តក្រចេះ ក្រោមបញ្ជាពីលោកឧត្ដមសេនីយ៍ទោ អ៊ូ សុបុណ្ណា ស្នងការនគរបាលខេត្ត បានឃាត់ខ្លួនក្រុមក្មេងទំនើងមួយក្រុមដែលតែងតែបើកបរម៉ូតូក្នុងល្បឿនលឿនបង្កភាពអនាធិបតេយ្យនៅតាមដងផ្លូវមាត់ទន្លេក្នុងក្រុងក្រចេះ ។
ក្រុមក្មេងទំនើងទាំងនោះ ត្រូវបានកម្លាំងនៃស្នងការដ្ឋាននគរបាលខេត្តចុះឃាត់ខ្លួន កាលពីយប់ថ្ងៃទី៣០ ខែវិច្ឆិកា ឆ្នាំ២០២៣ ខណៈពួកគេប្រើប្រាស់ម៉ូតូចំនួន១១គ្រឿងបើកបរក្នុងល្បឿនលឿន បង្កភាពអនាធិបតេយ្យនៅតាមដងផ្លូវសាធារណៈ ។
ភ្លាមៗ កម្លាំងនគរបាលចរាចរណ៍ផ្លូវគោកបានធ្វើការស្ទាក់ក្រសោបបានម៉ូតូទាំង១១គ្រឿងនាំទៅស្នងការដ្ឋាន ហើយក៏បានអញ្ជើញអាណាព្យាបាលមកធានា និងធ្វើកិច្ចសន្យាបញ្ឈប់ការបើកបរបែបអនាធិបតេយ្យបន្តទៀត និងអនុញ្ញាតឱ្យត្រឡប់ទៅផ្ទះវិញរៀងៗខ្លួន ។
សូមបញ្ជាក់ថា ការបង្ក្រាបក្មេងទំនើងនេះ មិនមែនជាលើកទី១ទេ កម្លាំងនគរបាលតែងតែមានចំណាត់ការបង្ក្រាបជាបន្តបន្ទាប់ចំពោះក្រុមក្មេងទំនើងជិះម៉ូតូបង្ហោះ ឬក៏កែច្នៃបំពង់ស៊ីម៉ាំងខុសប្រក្រតី ដើម្បីចូលរួមរក្សាការពារសន្តិសុខសណ្ដាប់ធ្នាប់សង្គម ៕
ចែករំលែកព័តមាននេះ