រាជធានីភ្នំពេញ ៖ រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោក (គ.ស.ច.គ) បានចេញបទបញ្ជា និងធ្វើការណែនាំឲ្យដាក់ពិន័យយ៉ាងធ្ងន់ធ្ងរ ចំពោះអ្នកប្រើប្រាស់គ្រឿងស្រវឹង ដែលបង្កគ្រោះថ្នាក់បាត់បង់ជីវិត ឬរបួសដល់អ្នកដទៃ ។
ក្នុងពិធីប្រកាសផ្សព្វផ្សាយ ផែនការជាតិ ទស្សវត្សសកម្មភាពសុវត្ថិភាពចរាចរណ៍ផ្លូវគោក លើកទី២ ឆ្នាំ២០២១-២០៣០ នាថ្ងៃទី៣០ ខែវិច្ឆិកា ឆ្នាំ២០២៣ ឯកឧត្តមឧបនាយករដ្ឋមន្ដ្រី ស សុខា រដ្ឋមន្ត្រីក្រសួងមហាផ្ទៃ បានលើកឡើងថា តាមការសង្កេតឃើញថា ចំនួន៥៤ភាគរយ នៃចំនួនអ្នក ដែលមានគ្រោះថ្នាក់បង្កឲ្យស្លា.ប់នេះ ភាគច្រើននៅពេលយប់ ហើយភាគច្រើនសុទ្ធតែគ្រឿងស្រវឹងទាំងអស់ បង្កឲ្យបាត់បង់ជីវិតអ្នកដទៃ ឬអ្នកជិះជាមួយខ្លួន ។
ឯកឧត្តមឧបនាយករដ្ឋមន្ដ្រី បញ្ជាក់ថា «ឥឡូវយើងឃើញថា បញ្ហាសេពគ្រឿងស្រវឹងនេះ គឺមានភាពទូលំទូលាយ។ ដូច្នេះខ្ញុំសូមស្នើឲ្យគណៈកម្មាធិការសុវត្ថិភាពចរាចរណ៍ផ្លូវគោក ពិសេសក្រសួងសាធារណការ និងដឹកជញ្ជូន ក៏ដូចជាក្រសួងមហាផ្ទៃរបស់យើង មេត្តាពិនិត្យក្នុងការដាក់ពិន័យឲ្យធ្ងន់បន្ដិច អ្នកដែលប្រើប្រាស់គ្រឿងស្រវឹង ដែលបង្កគ្រោះថ្នាក់បាត់បង់ជីវិតដល់អ្នកដទៃ» ។
ឯកត្តម ឧបនាយករដ្ឋមន្ដ្រី ស សុខា ក៏បានជំរុញឲ្យយកចិត្តទុកដាក់អ្នកបើកបរម៉ូតូទាំងការប្រើប្រាស់ផ្លូវជាតិ និងផ្លូវលំ សំដៅធ្វើយ៉ាងណាចូលរួមចំណែកកាត់បន្ថយគ្រោះថ្នាក់ចរាចរណ៍ ក្នុងរួមទាំងវិធានការណែនាំ និងការរឹតបន្ដឹងការអនុវត្តច្បាប់ ។
ឧបនាយករដ្ឋមន្ដ្រី ស សុខា បានមើលឃើញថា អត្រានៃការគ្រោះថ្នាក់ចរាចរណ៍ ភាគច្រើនលើអ្នកប្រើប្រាស់ម៉ូតូនៅពេលយប់ ហើយសុទ្ធតែប្រើប្រាស់នូវគ្រឿងស្រវឹងនៅពេលបើកបរ ដូច្នេះត្រូវតែដាក់ពិន័យឲ្យបានធ្ងន់ដល់អ្នកប្រើប្រាស់គ្រឿងស្រវឹង ហើយបើកបរបង្កគ្រោះថ្នាក់ចរាចរណ៍ បណ្ដាលឲ្យអ្នកដទៃស្លាប់ និងរបួស។ ខណៈលោកកត់សម្គាល់ថា បច្ចុប្បន្ននេះការប្រើប្រាស់គ្រឿងស្រវឹងកាន់តែទូលំទូលាយ ។
លោកអភិសន្ដិបណ្ឌិត ស សុខា ថ្លែងយ៉ាងដូច្នេះថា «៥៤ភាគរយ នៃចំនួនអ្នកដែលមានគ្រោះថ្នាក់បង្កឲ្យស្លាប់នេះ ភាគច្រើនពេលយប់ ភាគច្រើនសុទ្ធតែគ្រឿងស្រវឹងទាំងអស់ បង្កឲ្យបាត់បង់ជីវិតអ្នកដទៃ ឬអ្នកជិះជាមួយខ្លួន អញ្ចឹងហើយនេះជាបញ្ហាប្រឈម ដោយសារតែឥលូវយើងឃើញថា បញ្ហាក្រេមគ្រឿងស្រវឹងនេះ មានភាពទូលំទូលាយ។ ដូច្នេះខ្ញុំសូមស្នើឲ្យ គណៈកម្មាធិការសុវត្ថិភាពចរាចរណ៍ផ្លូវគោក ពិសេសក្រសួងសាធារណការ និងដឹកជញ្ជូន ក៏ដូចជាក្រសួងមហាផ្ទៃ មេត្តាពិនិត្យក្នុងការដាក់ពិន័យឲ្យធ្ងន់បន្ដិចអ្នកដែលប្រើប្រាស់គ្រឿងស្រវឹង ដែលបង្កឲ្យមានគ្រោះថ្នាក់ដល់អ្នកដទៃ»។
សូមជម្រាបថា ក្នុងរយៈពេល៩ខែ ឆ្នាំ២០២៣នេះ គ្រោះថ្នាក់ចរាចរណ៍បង្កឡើងដោយអ្នកបើកបរម៉ូតូ មានចំនួន៤៩២គ្រឿង ដែលជាចំនួនមួយគួរឲ្យកត់សម្គាល់ ៕
ចែករំលែកព័តមាននេះ