ខេត្តស្ទឹងត្រែង ៖ ជាធម្មតានៅពេលដាក់ចេញនូវគម្រោងសាងសង់តភ្ជាប់ផ្លូវថ្មីនីមួយៗដែលជាផ្លូវធ្វើដោយមន្ទីរសាធារណៈការនិងដឹកជញ្ជូន ជំហានដំបូងត្រូវជ្រើសរើសទីតាំង ដើម្បីដាក់គ្រឿងចក្រ និងសម្ភារ ។ ទីតាំងដីទាំងនោះ ក៏ត្រូវបានរក្សាទុកជាដីបម្រុងសាធារណៈការ ដើម្បីបំរើលើការថែទាំផ្លូវ…
ខេត្តស្ទឹងត្រែង ៖ ជាធម្មតានៅពេលដាក់ចេញនូវគម្រោងសាងសង់តភ្ជាប់ផ្លូវថ្មីនីមួយៗដែលជាផ្លូវធ្វើដោយមន្ទីរសាធារណៈការនិងដឹកជញ្ជូន ជំហានដំបូងត្រូវជ្រើសរើសទីតាំង ដើម្បីដាក់គ្រឿងចក្រ និងសម្ភារ ។ ទីតាំងដីទាំងនោះ ក៏ត្រូវបានរក្សាទុកជាដីបម្រុងសាធារណៈការ ដើម្បីបំរើលើការថែទាំផ្លូវ ។
តាមប្រភពព័ត៌មានពីប្រជាពលរដ្ខមួយចំនួនរស់ភូមិអន្លុងស្វាយ ឃុំថាឡា ស្រុកថាឡាបរិវ៉ាត់ បានចោទប្រកាន់មន្ទីរ និងមន្ត្រីសាធារណៈការ ដោយក្រសោបរំលោភយកដីប្រជាពលរដ្ឋយកទៅដាក់ជាដីបម្រុងសាធារណៈការ រួចលួចបែងបែកគ្នាស្ងាត់ៗ ។
លោក សុខ ងី ប្រជាពលរដ្ឋម្នាក់ក្នុងចំណោមប្រជាពលរដ្ឋច្រើនគ្រួសារទៀតបានលើកឡើងថា លោកបានទិញដីនៅភូមិសាស្ត្រខាងលើ តាមបណ្តោយផ្លូវក្រួសក្រហមភូមិឃុំខាងលើពីប្រជាពលរដ្ឋរស់នៅភូមិអន្លុងស្វាយ នាឆ្នាំ២០០៦ និងបានស្នើសុំពាក្យកាន់កាប់ប្រើប្រាស់ដីធ្លីទទួលស្គាល់ពីអាជ្ញាធរភូមិឃុំនៅឆ្នាំ២០១៤ ដោយមានការបញ្ជាក់ពីទំហំក្បាលដី និងបណ្តោយព្រមទាំងព្រមប្រទល់ផងដែរ ក្រោយមក ក៏ត្រូវមន្ទីរសាធារណៈការនិងដឹកជញ្ជូនទៅដាក់ទីតាំងក្រសោបដីតំបន់នោះ ទៅដាក់ជាដីបម្រុងសាធារណៈការ បង្កជាទំនាស់ ។
លោកក៏បានចោទប្រកាន់អតីតមន្ត្រីសាធារណៈការចូលនិវត្តន៍ម្នាក់ឈ្មោះ រស់ សុខាន់ បានបែងចែងដីបំរ៉ុងនោះ និងមានការលក់ដូរទៅបុគ្គលឯទៀតផងដែរ ។ លោកបន្តថា ក្រោយរូបលោកនិងប្រជាពលរដ្ឋដ៏ទៃទៀតតវ៉ាសើរើ ទើបលោក រស់ សុខាន់ ចេញមុខសធ្វើការសម្រសម្រួលដោះស្រាយអោយតែរូបលោកម្នាក់ប៉ុណ្ណោះ ចំណែកប្រជាពលរដ្ឋដទៃទៀត គឺមិនអាចបានចំណែកដីណាមួយទេ ។ លោកបន្តថាការសម្របសម្រួលនេះ គឺអយុត្តិធម៌សម្រាប់ប្រជាពលរដ្ឋខ្លាំងណាស់ ។
ទាក់ទិនករណីករណីចោទប្រកាន់ខាងលើនេះ ប្រធានមន្ទីរសារធារណៈការនិងដឹកជញ្ជូនខេត្ត លោក ស គឺមណាត បានបញ្ជាក់ថា ចំពោះមន្ត្រីចូលនិវត្តន៍របស់មន្ទីរសាធារណៈការ លោកបានបញ្ជាអោយលោក រស់ សុខាន់ ព្រមទាំងបងប្អូនដកខ្លួនចញអស់ហើយ ។ លោកបន្តថា ដីនោះមិនមានចុះបញ្ជីជាដីក្រសួងសាធារណៈការ ឬមន្ទីរនោះទេ គឺចាប់ទុកចុះបញ្ជីវាស់ជើងម៉ែត្រលើផែនទីរបស់ស្រុក តែមន្ទីរជាអ្នកគ្រប់គ្រងថែរក្សាជាដីបម្រុងសម្រាប់បម្រើលើវិស័យថែទាំផ្លូវ គឺអាចទៅកាយអាចម៍ដីទីនោះជួសជុលផ្លូវ ។
លោកបន្តថា ចំពោះប្រជាពលរដ្ឋដែលមានបំណងតវ៉ាអាចយកឯកសារពាក់ព័ន្ធទៅដាក់នៅសាលាស្រុកឬខេត្តដើម្បីអោយគណៈកម្មាការដោះស្រាយវិវាទដីធ្លីដោះស្រាយ ក្នុងគោលនយោបាយណាមួយ ។ អភិបាលស្រុកថាឡាបរិវ៉ាត់លោកសន សារឿន បានបញ្ជាក់ថា ករណីខាងលើ យើងមានជម្រើស២ ទី១-យើងសម្របសម្រួលជាមួយសាធារណៈការកាត់ឆ្វៀលទុកអោយសាធារណៈការទុកអោយរដ្ឋ ដើម្បីធ្វើការអភិវឌ្ឍន៍ខ្លះនិងអោយសារមីខ្លួនបានខ្លះ ទី២-ចុះបញ្ជីដីរដ្ឋទាំងអស់ ។
មានព័ត៌មានបន្ថែម កោះសន្តិភាពមានផ្សាយជូនបន្ត ។
ចែករំលែកព័តមាននេះ