រាជធានីភ្នំពេញ ៖ សមាគមស្វាយចន្ទីកម្ពុជា ព្រួយបារម្ភចំពោះអាកាស ធ្វើឲ្យប៉ះពាល់ដល់ដំណើរការផលិតស្វាយចន្ទី នៅកម្ពុជា ខណៈរំពឹងថាកម្ពុជា នឹងប្រែក្លាយជាប្រទេស ដែលនាំចេញគ្រាប់ស្វាយចន្ទីច្រើនគេ ហើយនៅជាប្រទេសមានគ្រាប់ស្វាយចន្ទី…
រាជធានីភ្នំពេញ ៖ សមាគមស្វាយចន្ទីកម្ពុជា ព្រួយបារម្ភចំពោះអាកាស ធ្វើឲ្យប៉ះពាល់ដល់ដំណើរការផលិតស្វាយចន្ទី នៅកម្ពុជា ខណៈរំពឹងថាកម្ពុជា នឹងប្រែក្លាយជាប្រទេស ដែលនាំចេញគ្រាប់ស្វាយចន្ទីច្រើនគេ ហើយនៅជាប្រទេសមានគ្រាប់ស្វាយចន្ទី គុណភាពល្អ និងឆ្ងាញ់ជាងគេក្នុងលោក ។
ការព្រួយបារម្ភនេះ បន្ទាប់ពីស្វាយចន្ទី គឺដំណាំយុទ្ធសាស្ត្រ ដែលរាជរដ្ឋាភិបាលកម្ពុជា បាននិងកំពុងយកចិត្តទុកដាក់ និងជំរុញការនាំចេញឱ្យបានច្រើនជាងគេ នៅលើពិភពលោក ឬអាចនិយាយបានថា «ជាអធិរាជ» នាំចេញគ្រប់ស្វាយចន្ទី នាពេលខាងមុខនោះ សមាគមស្វាយចន្ទីកម្ពុជា រំពឹងថា ក្រៅពីកម្ពុជាអាចប្រែក្លាយជាប្រទេសនាំចេញ គ្រាប់ស្វាយចន្ទីច្រើនគេហើយនោះ ក៏នៅជាប្រទេសដែលមានគ្រាប់ស្វាយចន្ទីល្អ និងឆ្ងាញ់ជាងគេ ក្នុងពិភពលោកថែមទៀត ។
ថ្លែងប្រាប់បណ្តាញសារព័ត៌មាន នៅថ្ងៃទី២៩ ខែវិច្ឆិកា ឆ្នាំ២០២៣ ក្នុងពិធីបើកដំណើរទស្សនកិច្ច អ្នកសារព័ត៌មាន និងទស្សនកិច្ចសិក្សារបស់ក្រសួងកសិកម្ម រុក្ខាប្រមាញ់ និងនេសាទ និងសភាពអឺរ៉ុប អំពី ខ្សែច្រវ៉ាក់ ផលិតកម្ម ស្វាយចន្ទី នៅកម្ពុជា ចាប់ពីថ្ងៃទី២៩ ខែវិច្ឆិកា ដល់ថ្ងៃទី០២ ខែធ្នូ ឆ្នាំ ២០២៣ ក្នុងខេត្តចំនួន៣ គឺខេត្តកំពង់ធំ ខេត្តក្រចេះ និងខេត្តស្ទឹងត្រែង នាទីស្តីការក្រសួងកសិកម្ម លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានលើកឡើងថា ៖ តាមរយៈការខិតខំ លើកស្ទូយលើវិស័យស្វាយចន្ទី និងក៏ដូចជាការចូលរួមទាំងរាជរដ្ឋាភិបាល ពិសេសក្រសួងកសិកម្ម រុក្ខាប្រមាញ់ និងនេសាទ វិស័យឯកជន លោករំពឹងថា កម្ពុជានឹងអាចក្លាយជាប្រទេសដែលមានគុណភាពគ្រាប់ស្វាយចន្ទីល្អជាងគេ និងរស់ជាតិឆ្ងាញ់ ជាងគេក្នុងពិភពលោក ។
ទោះបីយ៉ាងណា អនុប្រធានសមាគមស្វាយចន្ទីកម្ពុជា រូបនេះ លើកឡើងដែរថា ៖ ទន្ទឹងនឹងកម្ពុជា មានស្វាយចន្ទីល្អ និងគុណភាពល្អជាងគេនេះដែរ យើងនៅខ្វះខាតចំណុចតិចតួច មួយគឺ កែច្នៃគ្រាប់ចន្ទីដ៏ល្អរបស់យើងនេះ ឱ្យទៅជាផលិតផលមួយស្តង់ដា និងអាចទទួលយកបានក្នុងទីផ្សារអន្តរជាតិ។ ពេលនេះ កម្ពុជាយើងបានចាប់ផ្តើមចេញដំណើរហើយ គឺតាមរយៈកម្ពុជា បានចូលរួមសន្និសីទស្វាយចន្ទី នៅទីក្រុងឌូបៃ គឺគេអបអរខ្លាំងណាស់ ដោយសារកម្ពុជាបានជាប់ជាប្រទេស ដែលមានគ្រាប់ផ្លែចន្ទីដ៏ល្អ នៅឆ្នាំ២០២១។ នេះជាជំហ៊ានដ៏ល្អមួយ ហើយវាស្រប នឹងរាជរដ្ឋាភិបាលកម្ពុជា អាណត្តិមុន មានមហិច្ចតា ក្នុងទិសដៅលើកស្ទួយប្រទេសកម្ពុជា ដែលមានស្វាយចន្ទីច្រើនជាងគេ និងមានគុណភាពល្អជាងគេ លើពិភពលោកផងដែរ ។
ជាមួយគ្នានេះ លោកបានបញ្ជាក់បន្ថែមថា ៖ នាពេលនេះ មានការបង្កើតដី ចំនួន៥០ហិកតានៅខេត្តកំពង់ធំ ទៅជាកន្លែងកសិឧស្សហកម្មស្វាយចន្ទី។ នាពេលនេះ គេបានទាក់ទាញអ្នកវិនិយោគទុន ពីប្រទេសសិង្ហបុរី ដែលបានបោះទុន លើកទី១ ខ្ទង់១២លានដុល្លារ ដើម្បីបង្កើតរោងចក្រ កែច្នៃគ្រាប់ចន្ទី ឱ្យបាន៤០ម៉ឺនតោនក្នុងមួយថ្ងៃ។ ក្រៅពីនេះ ក៏មានក្រុមហ៊ុនមួយចំនួនទៀត ក៏បានកំពុងសហការ ដើម្បីកែច្នៃគ្រាប់ចន្ទីនេះផងដែរ។ ទន្ទឹមជាមួយគ្នានេះ ក៏មានឧកញ៉ា ជាច្រើននាក់ នៅកម្ពុជា កំពុងចាប់អារម្មណ៍ វិនិយោគលើស្វាយចន្ទីថែមទៀត។
លោកជំទាវ អ៊ឹម រចនា មន្ត្រីនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃដដែលនេះដែរថា ៖ គ្រាប់ផ្លែស្វាយចន្ទីកម្ពុជាកំពុងមានការគាំទ្រ នៅប្រទេសជប៉ុន។ ជាមួយគ្នានេះ បើតាមការសាកសួរបង្ហាញថា គ្រាប់ផ្លែស្វាយចន្ទីកម្ពុជា បើប្រៀបធៀបជាមួយគ្រាប់ស្វាយចន្ទីប្រទេសផ្សេងៗទៀត ឃើញថា គ្រាប់ស្វាយចន្ទីកម្ពុជា មានរស់ជាតិឆ្ងាញ់ គ្រាប់ធំគុណភាពល្អ។ គ្រាប់ស្វាយចន្ទីកម្ពុជា ចាប់ផ្តើមទទួលការគាំទ្រច្រើន ពីសំណាក់ពលរដ្ឋជប៉ុន និងមានដាក់លក់តាមទីផ្សារធំៗ នៅជប៉ុន ថែមទៀត ។
ដោយឡែកឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងពិធីនេះដែរថា ដំណាំស្វាយចន្ទីកម្ពុជា គឺជាដំណាំមានកេរ្តិ៍ឈ្មោះល្បី និងជាពិសេសមានការទទួលស្គាល់គុណភាព ដ៏ល្អមួយផង ។
គួរបញ្ជាក់ថា សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា នាកន្លងមកធ្លាប់ បានបញ្ជាក់ថា នាពេលអនាគត សម្តេចចង់ធ្វើឱ្យកម្ពុជា ក្លាយទៅជាប្រទេសអធិរាជស្វាយចន្ទី ពោលគឺជាប្រទេស ដែលនាំចេញគ្រាប់ស្វាយចន្ទីច្រើនជាងគេ នៅលើពិភពលោក ៕
ចែករំលែកព័តមាននេះ