ខេត្តកំពង់ចាម ៖ លំនៅដ្ឋានរបស់ប្រជាពលរដ្ឋមួយខ្នង ត្រូវបានអគ្គិភ័យលេបត្របាក់យ៉ាងសន្ធោសន្ធៅ ដោយមានផ្សែងហុយឡើងខ្មួលខ្មាញ់ទៅលើអាកាស បង្កឲ្យមានការភ្ញាក់ផ្អើលពីសំណាក់ប្រជាពលរដ្ឋកាលពីនៅវេលាម៉ោង១១និង៣០នាទីព្រឹក ថ្ងៃទី២៦ វិច្ឆិកា ឆ្នាំ២០២៣ចំណុចភូមិប្រសំ ស្ថិតក្នុងឃុំរអាង ស្រុកកំពង់សៀម ខេត្តកំពង់ចាម។ ជាមួយគ្នានោះ ក៏មានការអន្តរាគមន៍ពីរថយន្តពន្លត់អគ្គិភ័យចំនួន៣គ្រឿង ចុះមកជួយបា.ញ់ពន្លត់ភ្លើងកុំឲ្យឆេះរាលដាលទៅដល់ផ្ទះអ្នកភូមិផ្សេងទៀតនៅក្បែរនោះផងដែរ។
លោក ម៉ន រ៉េត មេឃុំរអាង បានមានប្រសាសន៍ឲ្យដឹងតាមទូរស័ព្ទថា ពេលដែលភ្លើងបានឆាបឆេះដំបូង ត្រូវបានលោកមេធំប្រសប់ រាយការណ៍មកគ្រុបលោក។ ក្រោយពីទទួលព័ត៌មាននេះ រូបលោកបានប្រញាប់ចុះមកដល់ផ្ទះកើតខេត្ត ពេលនោះក៏ឃើញភ្លើងបានឆាបឆេះយ៉ាងពេញបន្ទុកទៅហើយ។ បន្ទាប់មក ក៏ឃើញមានរថយន្តពន្លត់អគ្គិភ័យរបស់អធិការដ្ឋាននគរបាលស្រុកកំពង់សៀមមួយគ្រឿង ចុះមកបា.ញ់ទឹកពន្លត់ និងរថយន្ត២គ្រឿងទៀតរបស់ស្នងការដ្ឋាននគរបាលខេត្ត បានចុះមកបន្តបន្ទាប់។
លោកមេឃុំរអាង បន្តឲ្យដឹងទៀតថា បុរសជាម្ចាស់ផ្ទះ នៅពេលដែលភ្លើងកំពុងតែឆាបឆេះនោះ បានរត់ចូលទៅក្នុងផ្ទះ ដើម្បីឱបបីកូនតូចៗចំនួន២នាក់ពីក្នុងបន្ទប់ក្រោមផ្ទះយកមកដាក់នៅខាងក្រៅផ្ទះវិញ ដែលជាកន្លែងសុវត្ថិភាព។ បន្ទាប់មកបុរសម្ចាស់ផ្ទះក៏រត់ស្ទុះទៅបណ្ដើរម៉ូតូចេញមកក្រៅ ប៉ុន្តែចៃដន្យត្រូវភ្លើងធ្លាក់ពីលើមក បណ្ដាលឱ្យរលាកខ្នងតែម្ដង។ ហើយនៅក្នុងហេតុការណ៍នេះដែរ កម្លាំងសមត្ថកិច្ចពន្លត់អគ្គិភ័យបានយកចិត្តទុកដាក់ ដោយប្រើប្រាស់រថយន្តចំនួន៣គ្រឿងបា.ញ់ទឹកពន្លត់ ដើម្បីទប់ស្កាត់មិនឲ្យឆេះរាលដាលទៅដល់ផ្ទះអ្នកភូមិនៅក្បែរខាងនោះទេ។
ចំណែកសមត្ថកិច្ចវិញ បានឲ្យដឹងដែរថា ផ្ទះកើតហេតុខាងលើនេះ គឺជាកម្មសិទ្ធិរបស់ឈ្មោះ ឆាន លឹមហេន អាយុ៣៧ឆ្នាំ ភេទប្រុស ជាជនជាតិខ្មែរ និងមានប្រពន្ធឈ្មោះ ហាស ឡូត អាយុ៤២ឆ្នាំ ជាជនជាតិខ្មែរ មានទីលំនៅភូមិប្រសំ ឃុំរអាង ស្រុកកំពង់សៀម ខេត្តកំពង់ចាម។
សមត្ថកិច្ចបន្តថា គ្រោះអគ្គិភ័យកើតឡើងខាងលើ បានបណ្ដាលឱ្យបា.ត់ប.ង់ និងខូចខាតសម្ភារៈមានដូចជា ៖ ផ្ទះឈើប្រក់ក្បឿង មានទំហំទទឹង៦ម៉ែត្រx១០ម៉ែត្រ, របួសមនុស្សម្នាក់ (ម្ចាស់ផ្ទះ) រលាកខ្នងកម្រិតស្រាល, ថវិកា២០០ដុល្លារ, មាសទម្ងន់៥ជី និងបា.ត់ប.ង់សម្ភារៈ ព្រមទាំងឯកសារមួយចំនួនទៀតផង។
សមត្ថកិច្ចបន្តទៀតថា អគ្គិភ័យនេះ មិនបណ្ដាលឲ្យឆេះរាលដាលដល់ផ្ទះប្រជាពលរដ្ឋក្បែរនោះឡើយ ហើយចំពោះមូលហេតុ គឺបណ្ដាមកពីឆ្លងចរន្តអគ្គិសនី។
ក្រោយពីទទួលព័ត៌មានពីករណីអគ្គិភ័យភ្លាមនោះ លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តកំពង់ចាម បញ្ជាដោយផ្ទាល់ និងចង្អុលបង្ហាញដល់លោកវរសរនីយ៍ឯក យ៉ន ឌីន នាយការិយាល័យអគ្គិភ័យ និងលោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀម បានដឹកនាំកម្លាំងជំនាញ និងកម្លាំងអន្តរាគមន៍របស់ស្នងការនគរបាលខេត្តកំពង់ចាម និងស្រុកកំពង់សៀម សហការជាមួយកម្លាំងប៉ុស្តិ៍នគរបាលរដ្ឋបាលរអាង ចុះធ្វើការអន្តរាគមន៍ផ្ទាល់ និងបានពន្លត់អគ្គិភ័យឱ្យរលត់ជាស្ថាពរ ដោយប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តកំពង់ចាម ចំនួន២គ្រឿង និងឡានរបស់អធិការដ្ឋាននគរបាលស្រុកកំពង់សៀម ចំនួន១គ្រឿង ចំនួនសរុប៣គ្រឿង និងប្រើប្រាស់ទឹកអស់៣រថយន្ត។
ជាមួយគ្នានោះ អាជ្ញាធរមូលដ្ឋានបានបញ្ជាក់បន្ថែមថា នេះជារដូវធ្លាក់ខ្យល់ពីទិសខាងជើង ដូច្នេះសូមបងប្អូនបង្កើនការប្រុងប្រយ័ត្ន ព្រោះងាយបង្កឱ្យក្លាយជាអគ្គិភ័យកើតឡើងណាស់ ប្រសិនបើយើងមានការធ្វេសប្រហែស ។
ចែករំលែកព័តមាននេះ