ADផ្ទាំងផ្សព្វផ្សាយពាណិជ្ជកម្ម

Picture

ប្រមុខ​ការ​ទូត​ចិន និង​ជប៉ុន​ជួប​ពិភាក្សា​គ្នា​អំពី​បញ្ហា​ទ្វេ​ភាគី

3 ខែ មុន

ទី​ក្រុង​ពូសាន, កូរ៉េ​ខាង​ត្បូង៖ ប្រមុខ​ការ​ទូត​ប្រទេស​ជប៉ុន និង​ចិន​ជួប​ពិភាក្សាការ​ងារ​នៅ​ទី​ក្រុង​ពូសាន​ ​ប្រទេស​កូរ៉េ​ខាង​ត្បូង។ នេះ​ជា​កិច្ច​ជំនួប​លើក​ទី១​ចាប់​តាំង​លោក​វ៉ាងយី​ រដ្ឋ​មន្ត្រី​ការ​បរទេស​ចិន​ ​ឡើង​កាន់​តំណែង​​ជា​​ថ្មី​កាល​ពី​ខែ​កញ្ញា​។ លោក​វ៉ាង​ថ្លែង​នៅ​ក្នុង​ពេល​បើក​កិច្ច​ប្រជុំ​ថា​​លោក​ចង់​ធ្វើ​ការ​ជា​មួយ​​ភាគី​ជប៉ុន​ដើម្បី​ធ្វើ​ឱ្យ​ទំនាក់​ទំនង​នេះ​ដំណើរ​ការ​ដោយ​រលូន​ និង​នៅ​លើ​មាគ៌ា​ដ៏​​ត្រឹម​ត្រូវ​​។​…

ទី​ក្រុង​ពូសាន, កូរ៉េ​ខាង​ត្បូង៖ ប្រមុខ​ការ​ទូត​ប្រទេស​ជប៉ុន និង​ចិន​ជួប​ពិភាក្សាការ​ងារ​នៅ​ទី​ក្រុង​ពូសាន​ ​ប្រទេស​កូរ៉េ​ខាង​ត្បូង។ នេះ​ជា​កិច្ច​ជំនួប​លើក​ទី១​ចាប់​តាំង​លោក​វ៉ាងយី​ រដ្ឋ​មន្ត្រី​ការ​បរទេស​ចិន​ ​ឡើង​កាន់​តំណែង​​ជា​​ថ្មី​កាល​ពី​ខែ​កញ្ញា​។ លោក​វ៉ាង​ថ្លែង​នៅ​ក្នុង​ពេល​បើក​កិច្ច​ប្រជុំ​ថា​​លោក​ចង់​ធ្វើ​ការ​ជា​មួយ​​ភាគី​ជប៉ុន​ដើម្បី​ធ្វើ​ឱ្យ​ទំនាក់​ទំនង​នេះ​ដំណើរ​ការ​ដោយ​រលូន​ និង​នៅ​លើ​មាគ៌ា​ដ៏​​ត្រឹម​ត្រូវ​​។​

លោក​ស្រី​រដ្ឋ​មន្ត្រី​ការ​បរទេស​ជប៉ុន ខាមីខាវ៉ា (Kamikawa) ឆ្លើយ​តប​ទៅ​វិញ​ថា​លោក​ស្រី​ចង់​ធ្វើ​ការ​ជិត​ស្និទ្ធ​ជា​មួយ​លោក​វ៉ាង​ដើម្បី​​ធ្វើ​ឱ្យ​ទំនាក់​ទំនង​នេះ​ដើរ​នៅ​លើ​ទិស​ដៅ​ត្រឹម​ត្រូវ​ស្រប​តាម​អ្វី​ដែល​ថ្នាក់​ដឹក​នាំ​ប្រទេស​ទាំង​២​បាន​ឯក​ភាព​គ្នា​នៅ​ក្នុងកិច្ច​ជំនួប​កំពូល​លើក​ចុង​ក្រោយ​។​​ គេ​ជឿ​ជាក់​ថា​លោក​ស្រី​ខាមីខាវ៉ា​បាន​ស្នើ​សុំ​ឱ្យ​ប្រទេស​ចិន​ដក​ចេញ​វិញ​នូវ​ការ​ហាម​ឃាត់​ការ​នាំ​ចូល​គ្រឿង​សមុទ្រ​ពី​ប្រទេស​ជប៉ុន​​។ ចិន​ធ្វើ​ដូច​នេះ​បន្ទាប់​ពី​ប្រទេស​ជប៉ុន​បង្ហូរ​ទឹក​កាក​សំណល់​​ចេញ​ពី​រោង​ចក្រ​នុយក្លេអ៊ែរ​។ ចំណុច​មួយ​ទៀត​ លោក​ស្រី​ក៏​ស្នើ​សុំ​ឱ្យ​ប្រទេស​ចិន​ដោះ​លែង​ជន​ជាតិ​ជប៉ុន​​ម្នាក់​ដែល​ត្រូវ​អាជ្ញា​ធរ​ឃុំ​ឃាំង​នៅ​ប្រទេស​ចិន​​។

ពាក់ព័ន្ធ​នឹង​ជម្លោះ​បូរណ​ភាព​ទឹក​ដី ​លោកស្រី​ប្រមុខ​ការ​ទូត​ជប៉ុន​ប្រហែល​ជា​បាន​ស្នើ​សុំ​ឱ្យ​ភាគី​ចិន​ដក​ចេញ​នូវ​​ពោង​ដែល​​អាជ្ញា​ធរ​ចិន​យក​ទៅ​ដាក់​ខណ្ឌ​រវាង​ដែន​ទឹក​ប្រទេស​ចិន និង​ប្រទេស​ជប៉ុន​​។ ​ជប៉ុន​អះអាង​ថា​នោះ​ជា​ដែន​សមុទ្រ​ផ្ដាច់​មុខ​របស់​ខ្លួន​។​​ ​ប្រទេស​ទាំង​២​​បញ្ជាក់​ជា​ថ្មី​អំពី​ការ​លើក​កម្ពស់​ទំនាក់​ទំនង​ជា​យុទ្ធ​សាស្ត្រ​ ​និង​ការ​កសាង​ទំនាក់​ទំនង​ទ្វេ​ភាគី​ដែល​ប្រកប​ដោយ​ការ​ស្ថាប​នា​ និង​​​ស្ថិរ​ភាព​។ កិច្ច​ការ​នេះ​អាត្រូវ​ការ​​​ប្រព័ន្ធ​ទំនាក់ទំនង​ដ៏​​ជិត​ស្និទ្ធ​នៅ​ក្នុង​គ្រប់​កម្រិត​ទាំង​អស់​។​

តាម​គម្រោង​, លោក​ស្រី​ខាមីខាវ៉ា​នឹង​ជួប​សម​ភាគី​កូរ៉េ​ខាង​ត្បូង លោក​ផាក​ជីន (Park Jin) នា​ពេល​បន្តិច​ទៀត​ ហើយ​នឹង​ត្រៀម​ចូលរួម​កិច្ច​ប្រជុំ​រដ្ឋ​មន្ត្រី​ការ​បរទេស​ត្រី​ភាគី​ ជប៉ុន ចិន និង​កូរ៉េ​ខាង​ត្បូង​។ ប្រធាន​បទសំខាន់​ពាក់​ព័ន្ធ​នឹង​ការ​បន្ត​ឡើង​វិញ​នូវ​ជំនួប​កំពូល​ត្រី​ភាគី​នៃ​ប្រទេស​ទាំង​៣​។​

សូម​រម្លឹក​ថយ​ក្រោយ​​​ពាក់​ព័ន្ធ​នឹង​បញ្ហា​ទឹក​កាក​សំណល់​របស់​ជប៉ុន​។ ទឹក​ដែល​ប្រើ​ប្រាស់​សម្រាប់​រក្សា​សីតុណ្ហភាព​ត្រជាក់​នៅ​រោង​ចក្រ​នុយក្លេអ៊ែរ​ជប៉ុន​នៅ​ហ៊្វូគូស៊ីម៉ា​នោះ​មាន​ឡូក​ឡំ​ជា​មួយ​ទឹក​ភ្លៀង និង​ទឹក​ក្រោម​ដី​។ ក្រោយ​ពេល​ប្រមូល​ទឹក​ទាំង​នេះ​ទៅ​រក្សា​ទុក​, គេ​បាន​ប្រើ​ប្រាស់​វិធី​ចម្រាញ់​សារ​ធាតុ​​វិទ្យុ​សកម្ម​​​។ ប៉ុន្តែ​សារ​ធាតុ​​ទ្រី​ត្យូម (tritium) ​មិន​អាច​ចម្រាញ់​​បាន​ទេ​។​

ទោះ​ជា​យ៉ាង​ណា​ក្ដី មុន​ពេល​​បង្ហូរ​ទឹក​កាក​សំណល់​នោះ ជប៉ុន​​បាន​ប្រើ​ប្រាស់​វិធី​បិត​ទឹក​ (ដូច​គេ​បិត​ស្រា​ស​) ដើម្បី​ចម្រាញ់​សារ​ធាតុ​ទ្រី​ត្យូម​​​មក​នៅ​កម្រិត​១/៧​នៃ​បរិមាណ​ទឹក​សរុប​។ កម្រិត​នេះ​ស្រប​តាម​​អនុសាសន៍​របស់​អង្គ​ការ​សុខ​ភាព​ពិភព​លោក​។ ជប៉ុន​​​ក៏​បាន​អញ្ជើញ​អ្នក​ជំនាញ​របស់​ទី​ភ្នាក់​ងារ​អាតូមិច​អន្តរ​ជាតិ (IAEA) ឱ្យ​ពិនិត្យ​មើល​គុណ​ភាព​ទឹក​ផង​ដែរ​។ ប៉ុន្តែ​ចិន និង​រុស្ស៊ី​មិន​ទាន់​ជឿ​ទុក​ចិត្ត​ទាំង​ស្រុង​ទេ​។ ប្រទេស​ទាំង​២​ហាម​ឃាត់​ការ​នាំ​ចូល​អាហារ​សមុទ្រ​ពី​ប្រទេស​ជប៉ុន​៕​​​​

ប្រភព៖ NHK
https://www3.nhk.or.jp/nhkworld/en/news/20231125_18/

ពីឆ្វេង​ទៅ​ស្ដាំ៖ រដ្ឋ​មន្ត្រី​ការ​បរទេស​ជប៉ុន, ចិន និង​កូរ៉េ​ខាង​ត្បូង​ ដែល​គ្រោង​ជួប​គ្នា​ត្រី​ភាគី​

អត្ថបទសរសេរ ដោយ

កែសម្រួលដោយ