យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ស្តីពីលទ្ធផលនៃព្រះរាជសវនាការរវាងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងឯកឧត្តម
រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ស្តីពីលទ្ធផលនៃព្រះរាជសវនាការរវាងព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងឯកឧត្តម Emmanuel MACRON ប្រធានាធិបតីនៃសាធារណរដ្ឋបារាំង នៅវិមានប្រធានាធិបតីបារាំង Élysée នាថ្ងៃទី១៣ ខែវិច្ឆិកា ឆ្នាំ២០២៣ គម្រោងកិច្ចសហប្រត្តិបត្តិការរវាងកម្ពុជា និងបារាំងលើវិស័យវប្បធម៌ ធំៗមួយចំនួនត្រូវបានបារាំងប្រកាសពីការប្តេជ្ញាចិត្ត គាំទ្រដើម្បីសម្រេចបានជោគជ័យ ។ នេះបើតាមការផ្សាយឱ្យដឹងពីក្រសួងវប្បធម៌ និងវិចិត្រសិល្បៈ កាលពីថ្ងៃទី១៥ វិច្ឆិកា ។
គម្រោងទាំងនោះរួមមាន៖
១.គម្រោងពង្រីកសារមន្ទីរជាតិ និងកិច្ចសហការរវាងសារមន្ទីរជាតិ(កម្ពុជា)ជាមួយសារមន្ទីរGuimet (បារាំង) ។
ដើម្បីឆ្លើយតបទៅនឹងតម្រូវការចាំបាច់នានារបស់ភ្ញៀវទេសចរ និងកំណើនសមុច្ច័យ ក្រសួងវប្បធម៌ និងវិចិត្រសិល្បៈបានគិតពីលទ្ធភាពនៃការពង្រីកសារមន្ទីរទៅទីតាំងនៃសាកលវិទ្យាល័យភូមិន្ទវិចិត្រសិល្បៈបច្ចុប្បន្ន ឬទីតាំងថ្មី។ ដើម្បីមានមូលដ្ឋានក្នុងការរៀបចំគម្រោងនេះ ក្រសួងបានចេញសេចក្តីអំពាវនាវកាលពីអំឡុងឆ្នាំ២០២២ទៅដៃគូបរទេសនានា ក្នុងបំណងដើម្បីស្នើសុំជួយបញ្ជូនអ្នកជំនាញចុះជួយផ្តល់យោបល់លើគម្រោងនៃការពង្រីកសារមន្ទីរនេះ ។
ក្រោយសេចក្តីអំពាវនាវ ស្ថានទូតបារាំងប្រចាំនៅកម្ពុជាបានឆ្លើយតបជាផ្លូវការកាលពីដើមឆ្នាំ២០២៣ ថានឹងចាត់ចែងបញ្ជូនក្រុមអ្នកជំនាញដើម្បីចុះមកពិនិត្យ និងពិភាក្សាការងារពង្រីកសារមន្ទីរជាមួយក្រសួង ។ នៅពាក់កណ្តាលឆ្នាំ២០២៣ ក្រុមជំនាញទាំងពីរបានជួបប្រជុំពិភាក្សាគ្នានៅរាជធានីភ្នំពេញ ហើយបច្ចុប្បន្នក្រុមជំនាញបារាំងកំពុងរៀបចំរបាយការណ៍បច្ចេកទេសបង្ហាញពីលទ្ធផលនៃកិច្ចប្រជុំនាពេលកន្លងមក ។
២.គម្រោងជួសជុលរូបព្រះវិស្ណុផ្ទុំធ្វើពីសំរឹទ្ធិ
គម្រោងជួសជុលរូបព្រះវិស្ណុផ្ទុំធ្វើពីសំរឹទិ្ធ ជាគម្រោងមួយដែលនឹងត្រូវអនុវត្តចាប់ពីពាក់កណ្តាលឆ្នាំ២០២៤នេះតទៅ ។ គម្រោងនេះ គឺការបញ្ជូនរូបព្រះវិស្ណុផ្ទុំពីសំរឹទ្ធិដ៏ធំពីសារមន្ទីរជាតិ យកទៅជួសជុលនិងអភិរក្សពង្រឹងផ្ទៃលោហៈដែលកំពុងរងការខូចខាតដោយកត្តាធម្មជាតិ ។ ក្រៅពីកិច្ចការនៃការអភិរក្ស និងជួសជុល រូបលោហៈនេះនឹងត្រូវយកទៅសិក្សានិងវិភាគបន្ថែមទៀតដើម្បីឈ្វេងយល់ពីមាសធាតុផ្សំនិងបច្ចេកទេសនៃការសិតលោហៈនាសម័យបុរាណ ។ ទន្ទឹមនឹងនោះក្រុមការងារជំនាញនឹងប្រើប្រាស់ពេលវេលានៃការអភិរក្ស ដើម្បីសាកល្បងផ្គុំបំណែកផ្សេងទៀតភ្ជាប់ទៅនឹងតួខ្លួនរបស់ព្រះវិស្ណុនេះ ។ គម្រោងនេះរំពឹងថានឹងបញ្ចប់នៅពាក់កណ្តាលឆ្នាំ២០២៥ ។
៣.គម្រោងកិច្ចសហប្រតិបត្តិការជាមួយបារាំង លើយន្តការគណៈកម្មាធិការអន្តរជាតិសម្របសម្រួលកិច្ចការអភិរក្ស និងអភិវឌ្ឍរមណីដ្ឋានអង្គរ សំបូរព្រៃគុកក្នុងចំណោមកិច្ចសហប្រតិបត្តិការជាមួយបារាំង គណៈកម្មាធិការអន្តរជាតិសម្របសម្រួលកិច្ចការអភិរក្សនិងអភិវឌ្ឍរមណីយដ្ឋានអង្គរ សំបូរព្រៃគុក ដែលមានបារាំង និងជប៉ុនជាសហប្រធាន គឺជាយន្តការអន្តររដ្ឋាភិបាលសម្រាប់កិច្ចការអភិរក្សរមណីយដ្ឋានអង្គរ និងតំបន់ប្រាសាទសំបូរព្រៃគុក ។
យន្តការអន្តរជាតិនេះ កំពុងត្រូវបានមជ្ឈដ្ឋានអន្តរជាតិ ជាពិសេសយូណេស្កូ ចាត់ទុកជាយន្តការគំរូ និងជោគជ័យសម្រាប់វិស័យអភិរក្ស និងអភិវឌ្ឍសម្បត្តិបេតិកភណ្ឌពិភពលោក ហើយក៏ជាជោគជ័យនៃកិច្ចសហប្រតិបត្តិការអន្តរជាតិរបស់កម្ពុជាផងដែរ។ សម្រាប់យន្តការ ICC-Angkor នេះបានដំណើរការដោយជោគជ័យរយៈពេល៣០ឆ្នាំមកហើយ ហើយនៅថ្ងៃទី១៥ ខែវិច្ឆិកា ឆ្នាំ២០២៣នេះ នឹងមានកិច្ចប្រជុំអន្តររដ្ឋាភិបាលដើម្បីប្រកាសបន្តកិច្ចសហប្រតិបត្តិការ១០ឆ្នាំទៅមុខទៀត (២០២៤-២០៣៤) ព្រមទាំងដាក់ចេញនូវយុទ្ធសាស្ត្រ១០ឆ្នាំទៅមុខ ដែលនឹងផ្តោតជាចម្បងទៅលើការបណ្តុះបណ្តាលធនធានមនុស្ស។ កិច្ចប្រជុំនេះនឹងរៀបចំនៅទីស្នាក់ការកណ្ដាលអង្គការយូណេស្កូ ប្រទេសបារាំង ៕ ដោយ ៖ ស.ភ.រ
ចែករំលែកព័តមាននេះ