រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា គ្មានការកែច្បាប់ណាមួយ ដើម្បីឲ្យជនបរទេសអាចទិញអចលនទ្រព្យ នៅក្នុងប្រទេសកម្ពុជា ធ្វើជាកម្មសិទ្ធិខ្លួននោះទេ ទោះបីមានចំណុចនេះ មានការពិភាក្សាស្នើសុំមកសម្តេចក្តី ។
ថ្លែងក្នុងពិធីសម្ពោធ ដាក់ឱ្យប្រើប្រាស់ជាផ្លូវការ ៖ “ស្ពាននាគភ្លោះកោះនរា និងស្ពានបេតុង ខ្សែកាបតភ្ជាប់តំបន់អភិវឌ្ឍកោះនរា ទៅតំបន់អភិវឌ្ឍកោះពេជ្រ” នារសៀលថ្ងៃទី១៥ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា ៖ «នៅក្នុងវិស័យអចលនទ្រព្យ ខ្ញុំសូមបញ្ជាក់ចំណុចមួយ កន្លងទៅមានការលើកយក នូវបញ្ហាដែរថា រដ្ឋាភិបាលផ្តើមកែច្បាប់ ដើម្បីលក់ដីជូនជនបរទេស គោលគំនិតមានការស្នើសុំពិតមែន ការស្នើសុំនេះមែនមានគំនិតក្បត់ជាតិលក់ដីឲ្យបរទេសនោះទេ គឺមិនមែនទេ! គឺដើម្បីជួយសម្រួលឲ្យសេដ្ឋកិច្ចផ្នែកអចលនទ្រព្យបានដើរ ប៉ុន្តែរាជរដ្ឋាភិបាលអនុវត្ត ហើយមិនគិតថា មិនមានការចាំបាច់សម្រាប់ជួយស្រោចស្រង់ផ្នែកវិស័យអចលនទ្រព្យ ព្រោះថា វិស័យនេះ ជាង២០ឆ្នាំមកនេះ បានរីកចម្រើន មកដល់ពេលនេះ ក៏មានច្បាប់រដ្ឋធម្មនុញ្ញ និងមានលក្ខខណៈហាមឃាត់ដែរ» ។
សម្តេចធិបតី នាយករដ្ឋមន្ត្រី បានលើកឡើងថា ទោះបីមិនមានកែច្បាប់ក្តី ក៏មានលក្ខខ័ណ្ឌជាច្រើន បានជួយដល់វិស័យអចលនទ្រព្យ ដែលក្នុងនោះ ឲ្យជនបរទេសមានសិទ្ធិទិញអចលនទ្រព្យបាន។ ព្រោះកន្លងមក គាត់មានសិទ្ធិទិញ ដោយវិនិយោគនៅក្នុងកម្រិតណាមួយ ដើម្បីបានសញ្ជាតិ ផ្អែកលើច្បាប់វិនិយោគកម្ពុជា។ ហើយនៅកន្លែងខ្លះ គាត់អត់យកទេ គាត់បានយកតំណាងជាខ្មែរជួយ និងមួយទៀត គាត់បង្កើតក្រុមហ៊ុន ដើម្បីតំណាងឲ្យគាត់ចុះឈ្មោះក្នុងស្រុក ប៉ុន្តែពេលខ្លះ គាត់ចង់បានភាពកក់កៅ្ត ហើយយើងក៏បានផ្តល់ឲ្យគាត់ក្នុងរយៈពេលវែងដែរ គឺពី១៥ ឆ្នាំទៅ៥០ឆ្នាំ ។
ទោះបីមានការផ្តល់សិទ្ធិឲ្យជនបរទេស ទិញអចលនទ្រព្យតាមលក្ខខណៈច្បាប់ ដូចរយៈពេលខាងលើ សម្តេចធិបតី បានគូសបញ្ជាក់ថា ៖ «មិនមែនថា រាជរដ្ឋាភិបាល ធ្វើយ៉ាងនេះ ដើម្បីលក់ដីឲ្យបរទេសនោះទេ សូមបងប្អូនជ្រាប គឺជាលក្ខខណៈជួលដែលមានរយៈពេលវែង ហើយសិទ្ធិនៅតែជារបស់កម្ពុជាដដែល ហើយយើងនៅអនុវត្តតាមច្បាប់រដ្ឋធម្មនុញ្ញដដែល ដែលមិន អនុញ្ញាតឲ្យទាំងរូបវន្តបុគ្គល នីតិបុគ្គលអាចក្លាយជាម្ចាស់លើដីធ្លីនៅក្នុងប្រទេសកម្ពុជានោះទេ» ។
សម្តេចធិបតី បានបន្ថែមថា មានតែរូបវន្តបុគ្គល ឬនីតិបុគ្គល ដែលមានសញ្ជាតិខ្មែរ ទើបមានសិទ្ធិកាន់កាប់ដីធ្លី នៅក្នុងប្រទេសកម្ពុជា។ បញ្ហានេះ ដែលមានអ្នកខ្លះបកស្រាយ ដើម្បីចំណេញនយោបាយផងដែរ ដូច្នេះការដាក់ចេញគោលនយោបាយនេះដើម្បីជំរុញកំណើនសេដ្ឋកិច្ច ។
ជាមួយគ្នានោះដែរ សម្តេចធិបតី បានឲ្យដឹងថា រាជរដ្ឋាភិបាលមានលក្ខខណៈលម្អិតមួយចំនួន ចំពោះការគ្រប់លក្ខខណ្ឌ ដែលអាចជួលដីធ្លីនៅកន្លែងណាខ្លះ ? តើចម្ងាយប៉ុន្មានពីព្រំដែនដែល អនុញ្ញាត ដែលបងប្អូនមួយចំនួនបានព្រួបារម្ភ ។
សម្តេចធិបតី នាយករដ្ឋមន្ត្រី បានគូសបញ្ជាក់ថា ៖ «យើងនឹងធ្វើលក្ខខណៈមួយចំនួន ជួយវិស័យសេដ្ឋកិច្ច ប៉ុន្តែក៏ជួយដល់ប្រជាជនយើងដែរ។ កិច្ចការនេះ យើងយកចិត្តទុកដាក់ណាស់ ដោយកុំឲ្យ «ត្រីរស់ក៏រួច ទន្សាយក៏រួច»។ ពិតណាស់ អ្វីដែលយើងធ្វើ គឺដើម្បីផលប្រយោជន៍ដល់ប្រជាពលរដ្ឋយើង ដែលនឹងត្រូវកើនឡើងនៅពេលខាងមុខជាបន្តបន្ទាប់» ៕
ចែករំលែកព័តមាននេះ