រាជធានីភ្នំពេញ ៖ អង្គមហាសន្និបាត រណសិរ្សសាមគ្គី បានអំពាវនាវដល់ជនរួមជាតិ និងគ្រប់មជ្ឈដ្ឋានសង្គម បន្ដរួមសាមគ្គីគ្នាជាធ្លុងមួយ នៅក្រោមដំបូលរដ្ឋធម្មនុញ្ញតែមួយ ដើម្បីសម្រេចបាន នូវសមិទ្ធផលធំៗ…
រាជធានីភ្នំពេញ ៖ អង្គមហាសន្និបាត រណសិរ្សសាមគ្គី បានអំពាវនាវដល់ជនរួមជាតិ និងគ្រប់មជ្ឈដ្ឋានសង្គម បន្ដរួមសាមគ្គីគ្នាជាធ្លុងមួយ នៅក្រោមដំបូលរដ្ឋធម្មនុញ្ញតែមួយ ដើម្បីសម្រេចបាន នូវសមិទ្ធផលធំៗ និងថ្មីៗថែមទៀត នេះបើយោងតាមសេចក្តីសម្រេចចិត្ត មហាសន្និបាត រណសិរ្សសាមគ្គី អភិវឌ្ឍន៍មាតុភូមិកម្ពុជា លើកទី៦ ។
អង្គមហាសន្និបាត រណសិរ្សសាមគ្គី អភិវឌ្ឍន៍មាតុភូមិកម្ពុជា លើកទី៦ បានដំណើរការអស់រយៈពេលមួយព្រឹក នាថ្ងៃទី១៥ ខែវិច្ឆិកា ឆ្នាំ២០២៣ នៅរាជធានីភ្នំពេញ ក្រោមអធិបតីភាព សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានកិត្តិយស ក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា, សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអធិបតីកិត្តិយសក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ដោយមានការយាង និមន្ត និងអញ្ជើញចូលរួមពីសំណាក់ សម្តេចព្រះអគ្គមហាសង្ឃរាជទាំងពីរគណៈ សម្តេចព្រះសង្ឃនាយក សម្តេច ព្រះសង្ឃនាយករង ព្រះរាជាគណៈគ្រប់ឋានានុក្រម ថ្នាក់ដឹកនាំ សមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល ថ្នាក់ដឹកនាំតាមបណ្តាក្រសួង-ស្ថាប័ន រាជធានី-ខេត្ត ព្រមទាំង តំណាងអង្គការ សមាគមនានា ដែលជាសមាជិកក្រុមប្រឹក្សាជាតិរណសិរ្ស និងភ្ញៀវកិត្តិយសសរុបចំនួន ជាង ៥០០ អង្គ/នាក់ ។
នាឱកាសនោះ អង្គមហាសន្និបាត បានបញ្ជាក់ថា ៖ «សូមអំពាវនាវដល់ជនរួមជាតិទាំងមូល និងគ្រប់មជ្ឈដ្ឋានសង្គម សូមបន្តរួមសាមគ្គីគា្នជាធ្លុងមួយនៅក្រោមដំបូលរដ្ឋធម្មនុញ្ញតែមួយ និងក្រោមបាវចនា ជាតិ សាសនា ព្រះមហាក្សត្រ ដើម្បីសម្រេចបាននូវសមិទ្ធផលធំៗ ថ្មីៗថែមទៀត ក្នុងការងារកសាង និងអភិវឌ្ឍន៍ប្រទេសជាតិ ឲ្យមានការរីកចម្រើន ដូចបណ្តាប្រទេសអភិវឌ្ឍន៍នានា នៅក្នុងតំបន់ និងនៅលើសកលលោក» ។
សូមបញ្ជាក់ថា អង្គមហាសន្និបាត បានអនុម័តជ្រើសតាំង សម្តេច ហេង សំរិន ជាប្រធានកិត្តិយសក្រុមប្រឹក្សាជាតិរណសិរ្សសាមគ្គី, សម្ដេចធិបតី ហ៊ុន ម៉ាណែត ជាគណៈអធិបតីកិត្តិយស, សម្តេច ម៉ែន សំអន ជាប្រធាន និងលោក ហ៊ុន ម៉ានី ជាអនុប្រធាន នៃក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងឥសរ្សជន ចំនួន ៤៤អង្គ/នាក់ ផ្សេងៗទៀត ។
ជាមួយគ្នានោះដែរក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងឥសរ្យជនចំនួន ៤៤អង្គ/នាក់ ផ្សេងៗទៀត។
អង្គមហាសន្និបាត ក៏បានអបអរសាទរសមិទ្ធផលសម្រេចបាន ក្នុងការកសាង និងអភិវឌ្ឍន៍ ប្រទេសជាតិឲ្យមានការរីកចម្រើនលើគ្រប់វិស័យរបស់រាជរដ្ឋាភិបាលអាណត្តិមុនៗ ក្រោមការដឹកនាំប្រកប ដោយគតិបណ្ឌិត និងចក្ខុវិស័យវែងឆ្ងាយ គ្រប់ជ្រុងជ្រោយរបស់សម្តេចតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ក្នុងកិច្ចជំរុញការអនុវត្តយុទ្ធសាស្ត្រចតុកោណនៅគ្រប់ ដំណាក់កាល យ៉ាងមានប្រសិទ្ធភាពខ្ពស់ និងសូមគាំទ្រយ៉ាងពេញទំហឹង និងមានជំនឿយ៉ាងមុតមាំ ចំពោះកម្មវិធី គោលនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា ។
អង្គមហាសន្និបាត សូមសម្តែងនូវការដឹងគុណយ៉ាងជ្រាលជ្រៅបំផុតចំពោះសម្តេចអគ្គមហាពញាចក្រី ហេង សំរិន ដែលបានបូជាទាំងកម្លាំងកាយ ស្មារតី និងបញ្ញាញាណ ដឹកនាំអង្គការរណសិរ្ស ឱ្យមានដំណើរការ និងវឌ្ឍនភាពក្នុងរយៈកាលកន្លងមក និងសូមប្តេជ្ញាបន្តជ្រោងទង់រណសិរ្សមហាសាមគ្គីជាតិ សំដៅប្រមូលផ្ដុំកម្លាំងប្រជាជាតិខ្មែរទាំងមូល ព្រមទាំងកត្តាអនុគ្រោះនានាទាំងខាងក្នុង និងក្រៅប្រទេស ដើម្បីអភិវឌ្ឍ មាតុភូមិ ឲ្យចម្រើនជឿនលឿន សម្បូរសប្បាយក្នុងសន្តិភាព សេរីភាព ប្រជាធិបតេយ្យ យុត្តិធម៌ និងភាពថ្លៃថ្នូរ ស្របតាមកម្មវិធី និងគោលនយោបាយរបស់គណបក្ស និងរាជរដ្ឋាភិបាល ។
ជាមួយគ្នានោះដែរ អង្គមហាន្និបាត បានត្រងត្រាប់ស្តាប់ដោយយកចិត្តទុកដាក់ និងប្តេជ្ញាអនុវត្តតាមអនុសាសន៍ ដ៏មានសារៈសំខាន់របស់សម្តេចប្រធានទាំងពីរ ដែលបានលើកឡើងក្នុងអង្គពិធី ទុកជាដំបូន្មានដ៏មានតម្លៃ សម្រាប់តម្រង់ទិស នៃសកម្មភាពរបស់អង្គការរណសិរ្ស គ្រប់ថ្នាក់ក្នុងពេលបច្ចុប្បន្ន និងទៅអនាគត និងសូមអំពាវនាវដល់សមាជិក សមាជិការណសិរ្សគ្រប់លំដាប់ថ្នាក់ ត្រូវខិតខំផ្សព្វផ្សាយខ្លឹមសារ និងសេចក្តីសម្រេចចិត្ត នៃអង្គមហាសន្និបាត រណសិរ្សសាមគ្គី អភិវឌ្ឍន៍មាតុភូមិកម្ពុជា លើកទី៦ ឲ្យបានទូលំទូលាយដល់គ្រប់ មជ្ឈដ្ឋានសង្គម ៕
ចែករំលែកព័តមាននេះ