មិនដឹងមានរឿងអ្វី? បុរសជាបុគ្គលិកធនាគារម្នាក់ ត្រូវជនដៃដល់ដើរទៅដាល់១ដៃពេញទំហឹង
- ប៉ៃលិន
បុរសជាមន្ត្រីបុគ្គលិកធនាគារម្នាក់ បានចូលរួមផឹកស៊ីជួបជុំមិត្តភក្តិ ស្រាប់តែជនដៃដល់ដើរទៅដាល់១ដៃពេញទំហឹង ទាំងមិនដឹងមូលហេតុ
ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា បុរសជាមន្ត្រីបុគ្គលិកធនាគារម្នាក់ បានចូលរួមផឹកស៊ីជួបជុំមិត្តភក្តិ ស្រាប់តែជនដៃដល់ដើរទៅដាល់១ដៃពេញទំហឹង ទាំងមិនដឹងមូលហេតុ បណ្ដាលឱ្យរងរបួសបែកចិញ្ចើមខាងស្តាំ បង្កឱ្យមានការភ្ញាក់ផ្អើលកាលពីវេលាម៉ោង៧និង៣៥នាទីយប់ ថ្ងៃទី១២ ខែវិច្ឆិកា ឆ្នាំ២០២៣ នៅចំណុចទល់មុខផ្ទះពូ ឡៃ ស្ថិតក្នុងភូមិតាង៉ែនលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។ ទោះបីជាយ៉ាងណា ជនរងគ្រោះបានដាក់ពាក្យបណ្តឹងទៅនគរបាលឱ្យចាប់ឃាត់ខ្លួនជនដៃដល់យកទៅអនុវត្តតាមនីតិវិធីច្បាប់ហើយ។
សេចក្តីរាយការណ៍បន្តថាថា ជនរងគ្រោះខាងលើឈ្មោះ ជា ជីនឡា ភេទប្រុស អាយុ២៨ឆ្នាំ ជាបុគ្គលិកធនាគារ រស់នៅភូមិតាង៉ែនលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន របួសបែកចិញ្ចើមខាងស្តាំ ដេរអស់ចំនួន៥ថ្នេរ។ ចំណែកជនសង្ស័យវិញ មានឈ្មោះ យស រក្សា ភេទប្រុស អាយុ២៣ឆ្នាំ មុខរបរធ្វើចម្ការ រស់នៅភូមិជាមួយគ្នា មានផ្ទុកសារធាតុញៀ.ន។
បើតាមប្រភពព័ត៌មានបានប្រាប់ឱ្យដឹងថា មុនពេលកើតហេតុ កាលពីវេលាម៉ោងជាង៧យប់ ថ្ងៃទី១២ ខែវិច្ឆិកា កូនប្រុសរបស់ម្ចាស់ផ្ទះឈ្មោះ ប៉ា ភារម្យ ភេទប្រុស អាយុ៣២ឆ្នាំ ជាបុគ្គលិកធនាគារ រស់នៅភូមិ-ឃុំខាងលើ កំពុងអង្គុយផឹកស្រាបៀរជាមួយមិត្តភក្តិបងប្អូន ដោយមានគ្នាចំនួន៤នាក់។ មួយសន្ទុះក្រោយមក ស្រាប់តែឈ្មោះ យស រក្សា ដើរមកចូលរួមផឹកស៊ីជាមួយនឹងគេដែរ រហូតម៉ោង៨និង១០នាទីយប់ ជនរងគ្រោះឈ្មោះ ជា ជីនឡា និងមិត្ដភក្តិម្នាក់ទៀតឈ្មោះ រតនា ក៏បានជិះម៉ូតូមកដល់ផ្ទះឈ្មោះ ប៉ា ភារម្យ រួចក៏ចូលរួមផឹកស្រាបៀរជាមួយគ្នាផងដែរ។
ប្រភពដដែលបន្តថា បន្ទាប់ពីផឹកស្រាបៀរអស់មួយកំប៉ុង ស្រាប់តែឈ្មោះ យស រក្សា ដើរទៅក្បែរជនរងគ្រោះ រួចវាយ១ដៃពេញទំហឹង បណ្តាលឱ្យត្រូវចំចិញ្ចើមខាងស្ដាំ បែកហូរឈា.មតែម្ដង។ ភ្លាមៗនោះ មិត្ដភក្តិក៏បញ្ជូនជនរងគ្រោះទៅព្យាបាលនៅមន្ទីរពេទ្យបង្អែកខេត្ដប៉ៃលិន។
ពាក់ព័ន្ធនឹងបញ្ហាខាងលើនេះ ជនរងគ្រោះបានទៅដាក់ពាក្យបណ្តឹងនៅអធិការដ្ឋាននគរបាលក្រុងប៉ៃលិន ដើម្បីឱ្យសមត្ថកិច្ចអនុវត្តតាមនីតិវិធីច្បាប់៕
ចែករំលែកព័តមាននេះ