រាជធានីភ្នំពេញ ៖ រដ្ឋលេខាធិកាក្រសួងយុត្តិធម៌បានឲ្យដឹងថា ឆ្លងតាមកិច្ចប្រជុំរយៈពេល២ថ្ងៃ របស់គណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ដែលដឹកនាំផ្ទាល់ដោយឯកឧត្តម កើត រិទ្ធ…
រាជធានីភ្នំពេញ ៖ រដ្ឋលេខាធិកាក្រសួងយុត្តិធម៌បានឲ្យដឹងថា ឆ្លងតាមកិច្ចប្រជុំរយៈពេល២ថ្ងៃ របស់គណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ដែលដឹកនាំផ្ទាល់ដោយឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានបញ្ចប់ការពិនិត្យទាំងស្រុងលើបញ្ជីទណ្ឌិតដែលបានស្នើសុំសរុបចំនួន៩០២នាក់។
ឯកឧត្តម គឹម សន្តិភាព រដ្ឋលេខាធិកាក្រសួងយុត្តិធម៌បានលើបណ្តាញសង្គមឲ្យដឹង កាលពីពេលថ្មីៗកន្លងមកនេះថា ជាលទ្ធផលទណ្ឌិតប្រមាណ៦០% លើចំនួនទណ្ឌិតស្នើសុំសរុប៩០២នាក់ ត្រូវបានគណៈកម្មការជាតិបានពិនិត្យ និងជ្រើសរើសសម្រាប់ការស្នើសុំបន្ធូរបន្ថយទោស ដើម្បីគោរពជូនសម្តេចធិបតី ពិនិត្យ និងទូលថ្វាយព្រះមហាក្សត្រ ស្នើសុំព្រះរាជទានផ្តល់ការអនុគ្រោះទោសដល់ទណ្ឌិតនៅក្នុងឱកាសនៃពិធីបុណ្យឯករាជ្យជាតិ៩ ខែវិច្ឆិកា និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាពេលខាងមុខនេះ។
ឯកឧត្តមបានលើកឡើងថា ចំពោះសំណើសុំលើកលែងទោសទាំងអស់ គណៈកម្មការជាតិពុំទទួលយកមកពិនិត្យនោះឡើយ លើកលែងតែករណី១គត់ គឺទណ្ឌិតភេទស្រី១រូប នៅពន្ធនាគារខេត្តកំពង់ធំ ដែលជាករណីមនុស្សធម៌ក្នុងលក្ខខណ្ឌដែលទណ្ឌិតរូបនេះកំពុងមានជំងឺមហារីកកម្រិតទីបួនតែប៉ុណ្ណោះ ។
ឯកឧត្តមរដ្ឋលេខាធិការបានបន្ថែមថា ជាមួយគ្នានេះ គណៈកម្មការជាតិក៏ពុំលើកយកមកពិនិត្យពិចារណានោះឡើយ ចំពោះទណ្ឌិត ដែលបានប្រព្រឹត្តអំពើដូចខាងក្រោម៖ ១-ចំពោះបទល្មើសទូទៅ, ឧក្រិដ្ឋជនគ្រឿងញៀន,អំពើសាហាវយង់ឃ្នង, ករណីមិនរាងចាល,ប្រព្រឹត្តលើជនរងគ្រោះដែលជាសាច់ញាតិ ឬសហព័ទ្ធប្រព្រឹត្តលើជនរងគ្រោះជាមន្ត្រីរាជការ ឬមន្ត្រីសាធារណៈ ទណ្ឌិតធ្លាប់ទទួលបានការបន្ធូរបន្ថយទោសម្តងរួចមកហើយ ។ ២-ចំពោះបទល្មើសរំលោភផ្លូវ៖ជនរងគ្រោះជាអនីតិជនអាយុក្រោម១៤ឆ្នាំ, ជនរងគ្រោះជាជនមានវិបល្លាសស្មារតី ឬពិការ ជនរងគ្រោះជាសាច់សាលោហិត ករណីរំលោភបូកករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត។
សូមជម្រាបថា កាលពីថ្ងៃទី៧ ខែវិច្ឆិកា ឆ្នាំ២០២៣ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ដើម្បីពិនិត្យលើសំណើសុំបន្ធូរបន្ថយទោស និងលើក លែងទោសសម្រាប់ឱកាសនៃពិធីបុណ្យឯករាជ្យជាតិ ៩ ខែវិច្ឆិកា ២០២៣ និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាពេលខាងមុខនេះ។
សូមគូសបញ្ជាក់ថា សម្រាប់ពិធីបុណ្យទាំងពីរខាងលើនេះ គណៈកម្មការជាតិបានទទួលសំណើពីគណៈកម្មការរាជធានី-ខេត្ត(ពន្ធនាគាររាជធានី-ខេត្ត ចំនួន ២៣) និងពីគណៈកម្មការក្រសួង មហា ផ្ទៃ (មណ្ឌលអប់រំកែប្រែទាំង៤) ដែលបានស្នើសុំបន្ធូរបន្ថយទោស និងលើកលែងទោសដល់ទណ្ឌិត មានចំនួនសរុប ៩០២ នាក់ (ស្រី៦១នាក់)៕
ចែករំលែកព័តមាននេះ