រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគូសបញ្ជាក់ថា ដំណើរការវិវឌ្ឍជាតិខ្មែរ បានឈានដល់ដំណាក់កាលថ្មីមួយ…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគូសបញ្ជាក់ថា ដំណើរការវិវឌ្ឍជាតិខ្មែរ បានឈានដល់ដំណាក់កាលថ្មីមួយ ធ្វើឲ្យប្រជាជនខ្មែរមានទំនុកចិត្តរឹងមាំ និងមហិច្ឆតាខ្ពស់ ក្នុងលើកស្ទួយមោទនភាពជាតិឱ្យខ្ពស់ ដូចសម័យអង្គរ និងក្លាយទៅជាប្រទេសមានចំណូលខ្ពស់ នៅឆ្នាំ២០៥០ ។
ថ្លែងក្នុងឱកាសអញ្ជើញចូលរួម ពិធីអបអរសាទរ ខួបអនុស្សាវរីយ៍ លើកទី៧០ ទិវាបុណ្យឯករាជ្យជាតិ ៩ វិច្ឆិកា និងទិវាកំណើតកងយោធពលខេមរភូមិន្ទ ថ្ងៃទី៩ ខែវិច្ឆិកា ឆ្នាំ២០២៣ ក្រោមព្រះរាជាធិបតីដ៏ខ្ពង់ខ្ពស់បំផុតរបស់ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា សម្តេចនាយករដ្ឋមន្ត្រី បានលើកឡើងថា រាជរដ្ឋាភិបាល នីតិកាលទី៧ នៃរដ្ឋសភា បានប្តេជ្ញាចិត្តសម្រេចឱ្យបាននូវគោលដៅចម្បង ជាយុទ្ធសាស្ត្រចំនួន៥ ដែលបានដាក់ចេញក្នុងកម្មវិធីនយោបាយ និង យុទ្ធសាស្ត្របញ្ចកោណ-ដំណាក់កាលទី១ ។
សម្តេចមហាបវរធិបតី នាយករដ្ឋមន្ត្រី បានគូសបញ្ជាក់យ៉ាងដូច្នេះថា ៖ «ដំណើរ នៃការវិវឌ្ឍជាតិខ្មែរ បានឈានដល់ដំណាក់កាលថ្មីមួយ ដែលយើងទាំងអស់គ្នា មានទំនុកចិត្តរឹងមាំ និងមានមហិច្ឆតាខ្ពស់ ក្នុងការលើកស្ទួយមោទនភាពជាតិខ្មែរឱ្យខ្ពស់ ដូចសម័យអង្គរ តាមរយៈការកសាងជាតិមួយដ៏រឹងមាំ រស់រវើក រុងរឿង និងមានវិបុលភាព ក្លាយជាប្រទេសមានចំណូលខ្ពស់នៅត្រឹមឆ្នាំ ២០៥០» ។
សម្តេចបានសង្កត់ធ្ងន់ថា ៖ «រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវ កម្មវិធីនយោបាយរបស់ខ្លួន ដែលមាន (យុទ្ធសាស្ត្របញ្ចកោណ-ដំណាក់កាលទី១) ជារបៀបវារៈគោលនយោបាយសង្គម-សេដ្ឋកិច្ច នៃកម្មវិធីនយោបាយនេះ ដោយប្តេជ្ញា ចិត្តសម្រេចឱ្យបាននូវគោលដៅចម្បង ជាយុទ្ធសាស្ត្ររួមមាន ៖
ទី១- ការពារសន្តិភាព ការពារឯករាជ្យ អធិបតេយ្យ បូរណភាពទឹកដី និងការពាររាល់សមិទ្ធផល នៃសង្គមជាតិ ឱ្យបានគង់វង្សស្ថិតស្ថេរ។
ទី២- កសាងព្រះរាជាណាចក្រកម្ពុជា ជារដ្ឋប្រជាធិបតេយ្យសេរីពហុបក្សដ៏ជឿនលឿន និងរឹងមាំដែលផ្អែកលើច្បាប់ មានសេដ្ឋកិច្ចរីកចម្រើន ប្រកបដោយចីរភាព និងសមធម៌ ប្រជាជនមានជីវភាពសម្បូរសប្បាយ រស់នៅយ៉ាងសុខដុមរមនា ប្រកបដោយកិត្តិយស សេចក្តីថ្លៃថ្នូរ និងមានការគោរពសិទ្ធិមនុស្ស ។
ទី៣- កសាងប្រព័ន្ធគាំពារសង្គម ប្រកបដោយបរិយាបន្ន ប្រសិទ្ធភាព និងចីរភាពហិរញ្ញវត្ថុ ដែលធានាការផ្តល់ការគាំពារដល់ប្រជាជន ក្នុងការឆ្លើយតបចំពោះហានិភ័យសេដ្ឋកិច្ច ហានិភ័យសុខភាពសាធារណៈ និងភាពងាយរងគ្រោះផ្សេងៗ ។
ទី៤- ជំរុញការអនុវត្ត «កម្ពុជាគ្មានមីនត្រឹមឆ្នាំ ២០២៥» និងកាត់បន្ថយគ្រាប់មិនទាន់ផ្ទុះ ឱ្យបានជាអតិបរមា ។
ទី៥- បន្តអនុវត្តនយោបាយការបរទេសឯករាជ្យ ដោយផ្អែកលើច្បាប់ កសាងមិត្តភាព និងកិច្ចសហប្រតិបត្តិការល្អប្រសើរ ជាមួយប្រទេសទាំងអស់លើសកលលោក និងចូលរួមយ៉ាងសកម្ម ចំពោះបុព្វហេតុសន្តិភាព ស្ថិរភាព សន្តិសុខ និងវិបុលភាព ក្នុងតំបន់ និង ពិភពលោក ៕
ចែករំលែកព័តមាននេះ