កងរាជអាវុធហត្ថរាជធានីភ្នំពេញ នៅថ្ងៃទី៧ ខែវិច្ឆិកា ឆ្នាំ២០២៣នេះ បានបញ្ជូនជនសង្ស័យជាមុខសញ្ញាធា.ក់ប្ល.ន់ម៉ូតូម្នាក់ទៅកាន់តុលាការ ខណៈមន្ត្រីប៉េអឹម២នាក់ដែលរងរបួសក្នុងពេលចុះប្រតិបត្តិការ ត្រូវបានទទួល
រាជធានីភ្នំពេញ ៖ កងរាជអាវុធហត្ថរាជធានីភ្នំពេញ នៅថ្ងៃទី៧ ខែវិច្ឆិកា ឆ្នាំ២០២៣នេះ បានបញ្ជូនជនសង្ស័យជាមុខសញ្ញាធា.ក់ប្ល.ន់ម៉ូតូម្នាក់ទៅកាន់តុលាការ ខណៈមន្ត្រីប៉េអឹម២នាក់ដែលរងរបួសក្នុងពេលចុះប្រតិបត្តិការ ត្រូវបានទទួលរង្វាន់លើកទឹកចិត្តពីមេបញ្ជាការផងដែរ។
សូមជម្រាបថា កាលពីយប់ថ្ងៃទី០៤ ខែវិច្ឆិកា ឆ្នាំ២០២៣ កម្លាំងជំនាញមូលដ្ឋានអាវុធហត្ថខណ្ឌដង្កោ រាជធានីភ្នំពេញ បានធ្វើការចុះល្បាតប្រចាំថ្ងៃ និងពួនស្ទាក់ក្នុងភូមិសាស្ត្ររបស់ខ្លួនចាប់ពីម៉ោង៦ល្ងាច រហូតដល់ម៉ោង៦ព្រឹកដូចសព្វដង ។ លុះនៅម៉ោងប្រមាណ៩និង១០នាទីយប់ នៅត្រង់ចំណុចស្តុបឬស្សីសាញ់ ស្ថិតក្នុងទឹកដីខណ្ឌដង្កោ កម្លាំងល្បាតក៏ប្រទះឃើញយុវជនមួយក្រុមចំនួន៥នាក់ ជិះម៉ូតូ៣គ្រឿង ជាមុខសញ្ញាចាស់សង្ស័យពាក់ព័ន្ធករណីធា.ក់ប្ល.ន់យកម៉ូតូប្រជាពលរដ្ឋតាមដងផ្លូវសាធារណៈ។
ពេលឃើញដូច្នោះភ្លាម កម្លាំងល្បាតក៏បានហៅពួកគេឱ្យឈប់អែបខាងផ្លូវ ដើម្បីត្រួតពិនិត្យនិងសួរនាំ តែយុវជនមួយក្រុមនោះមិនព្រមឈប់នោះទេ ហើយព្យាយាមបន្ថែមល្បឿនរត់គេចខ្លួន ទើបកម្លាំងល្បាតប្រដេញតាមរហូតដល់ចំណុចមុខឃ្លាំងអេតចាយជិតស្តុបបាគូ ស្ថិតក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ក៏បណ្ដាលឱ្យរថយន្តសារ៉ែនរបស់សមត្ថកិច្ចជួបគ្រោះថ្នាក់រងការខូចខាតទាំងស្រុង និងបណ្តាលឲ្យមន្ត្រីអាវុធហត្ថចំនួន២នាក់រងរបួស ត្រូវបញ្ជូនទៅសម្រាកព្យាបាលនៅមន្ទីរពេទ្យព្រះកុសមៈភ្លាមៗផងដែរ តែយ៉ាងក៏ដោយ សមត្ថកិច្ចក៏បានធ្វើការឃាត់ខ្លួនជនសង្ស័យ២នាក់បានដែរ ។
ជនសង្ស័យដែលត្រូវឃាត់ខ្លួនខាងលើនេះ មានឈ្មោះ យុំ រតនៈ ភេទប្រុស អាយុ១៧ឆ្នាំ មុខរបរកម្មកររោងចក្រ មានទីលំនៅភូមិស្វាយមានលក្ខណ៍ សង្កាត់ស្ពានថ្ម ខណ្ឌដង្កោ រាជធានីភ្នំពេញ (មុខសញ្ញាវ៉ៃធា.ក់ប្ល.ន់យកម៉ូតូ) ។ និងម្នាក់ឈ្មោះ រ៉ា ស៊ីយ៉ា ភេទប្រុស អាយុ១៦ឆ្នាំ មុខរបរនៅផ្ទះ មានទីលំនៅភូមិស្ពានថ្ម សង្កាត់ស្ពានថ្ម ខណ្ឌដង្កោ រាជធានីភ្នំពេញ តែយុវជនរូបនេះ ពុំមានតម្រុយជាប់ពាក់ព័ន្ធបទល្មើសនោះទេ ទើបសមត្ថកិច្ចអនុញ្ញាតឱ្យគេត្រឡប់ទៅផ្ទះវិញ ។
ក្រោយឃាត់ខ្លួនជនសង្ស័យ និងវត្ថុតាង ត្រូវបានសមត្ថកិច្ចការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ បញ្ជូនទៅកាន់តុលាការចាត់ការតាមនីតិវិធី និងស្រាវជ្រាវតាមរកចាប់ខ្លួនបក្សពួកបន្ថែមទៀត ។
ដោយឡែកកាលពីរសៀលថ្ងៃទី០៥ ខែវិច្ឆិកា ឆ្នាំ២០២៣ លោកវរសេនីយ៍ឯក សរ សុភ័ណ្ឌ មេបញ្ជាការមូលដ្ឋានអាវុធហត្ថខណ្ឌដង្កោ បានដឹកនាំក្រុមការងារនាំយកថវិកា និងអំណោយរបស់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ មានដូចជា ៖ ថវិកាចំនួន២លានរៀល, ទឹកក្រូចដប២កេស, ទឹករិសុទ្ធ៣កេស, ទឹកដោះគោឆៅ២យួរ និងផ្លែក្រូចពោធិ៍សាត់ចំនួន២ឡូ ចុះសួរសុខទុក្ខ លោកអនុសេនីយ៍ទោ យិន ចំរ៉ុង ដែលបានជួបគ្រោះថ្នាក់ចរាចរណ៍ខណៈពេលកំពុងបំពេញភារៈកិច្ចបង្ក្រាបបទល្មើសខាងលើ ហើយកំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ (ហៅពេទ្យលោកសង្ឃ)។ ខណៈលោកឧត្តមសេនីយ៍ឯក រ័ត្ន ស្រ៊ាង មេបញ្ជាការ កឺជាអ្នករ៉ាប់រងលើថ្លៃព្យាបាលទាំងស្រុងផងដែរ ៕
ចែករំលែកព័តមាននេះ