តាមទីភ្នាក់ងារបរទេសផ្សាយឱ្យដឹងយោងតាមសេចក្តីប្រកាសរបស់ក្រសួងសុខាភិបាលតៃវ៉ាន់ ថា មន្ទីរពេទ្យ ឬគ្លីនិកនឹងត្រូវដាក់ទោសប្រសិនបើយល់ព្រមឱ្យមានការរំលូតកូនសម្រាប់ជ្រើសយកទារក (កូនប្រុស) ក្រោយពីប្រទះឃើញមានការរំលូតទារិកា (កូនស្រី) ច្រើនដល់ទៅ៣.០០០នាក់កាលពីឆ្នាំមុន (២០១០) ។ លោកជៀង ហុងជឺ រដ្ឋមន្ត្រីក្រសួងសុខាភិបាលតៃវ៉ាន់បានថ្លែងកាលពីថ្ងៃទី១៧ ឧសភា ថា ក្រសួងកំពុងធ្វើការស៊ីបអង្កេតមន្ទីរពេទ្យដែលទទួលរងការចោទប្រកាន់ថា មានចំណែកពាក់ព័ន្ធនឹងការរំលូតកូន ដោយអ្នកល្មើសច្បាប់ខាងលើ នឹងត្រូវដកហូតលិខិតអនុញ្ញាត ឬអាជ្ញាប័ណ្ណធ្វើអាជីវកម្ម ។
មន្ត្រីនៅក្នុងក្រសួងសុខាភិបាលម្នាក់បានបង្ហើបឱ្យដឹងថា ការរំលូតកូនដើម្បីជ្រើសរើសភេទរបស់ទារក ជាមូលហេតុចម្បងធ្វើឱ្យអត្រាកំណើតក្មេងប្រុសឡើងខ្ពស់ខុសប្រក្រតី ដោយស្ត្រីតៃវ៉ាន់ផ្តល់កំណើតកូនប្រុស១,០៩នាក់ ក្នុងការផ្តល់កំណើតកូនស្រីម្នាក់ បើប្រៀបធៀបនឹងអត្រាជាមធ្យមនៅទូទាំងពិភពលោកគឺ១,០៦នាក់ ។
ប្រទេសចិន និងឥណ្ឌាមានប្រជាជនប្រុស-ស្រីខុសគ្នាយ៉ាងច្រើនទោះបីជារដ្ឋាភិបាលនៃប្រទេសទាំង២ហាមមិនឱ្យគ្រូពេទ្យបង្ហើបឱ្យដឹងពីភេទរបស់ទារកក្នុងផ្ទៃក៏ដោយ ។ ស្របពេលជាមួយគ្នានេះ ជនជាតិតៃវ៉ាន់ជាច្រើននាក់ នៅតែពេញនិយមលើការមានកូនប្រុសច្រើនជាងកូនស្រី ព្រោះមានជំនឿថា កូនប្រុសអាចស្នងត្រកូលដល់ក្រុមគ្រួសារ និងជាអ្នកជួយទំនុកបម្រុងផ្នែកហិរញ្ញវត្ថុដល់គ្រួសារល្អជាងការមានកូនស្រី ៕
ចែករំលែកព័តមាននេះ