រាជធានីភ្នំពេញ ៖ ដើម្បីចូលរួមលុបបំបាត់ព័ត៌មានក្លែងក្លាយ ក្រសួងចំនួន៣ ដែលសេនាធិការរបស់រាជរដ្ឋាភិបាល បានសម្រចចុះហត្ថលេខា ដាក់ឲ្យប្រើប្រាស់កម្មវិធីថ្នាលផ្ទៀងផ្ទាត់ឯកសារ មានឈ្មោះថាverify.gov.kh ។
ការដាក់ឲ្យប្រើកម្មវិធី verify.gov.kh ធ្វើឡើងនៅថ្ងៃទី៣១ ខែតុលា ឆ្នាំ២០២៣ នៅទីស្តីការក្រសួងប្រៃសណីយ៍ និងទូរគមនាគមន៍ (ក.ប.ទ.) ដោយមានការចុះហត្ថលេខា រវាងឯកឧត្តម ជា វ៉ាន់ដេត រដ្ឋមន្ដ្រី ក.ប.ទ. រួមជាមួយ ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន និងឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ។
យោងតាមសេចក្តីប្រកាសព័ត៌មាន បានឲ្យដឹងថា ក្នុងពិធីចុះហត្ថលេខាលើអនុស្សរណៈ នៃការយោគយល់រវាងរដ្ឋមន្ត្រីក្រសួងទាំងបីបានផ្ដោតលើគោលបំណង ៣សំខាន់គឺ កិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ការរៀបចំហេដ្ឋា រចនាសម្ព័ន្ធ និងការតភ្ជាប់អ៊ិនធឺណិត និងការរៀបចំវគ្គ បណ្តុះបណ្តាលជំនាញឌីជីថល ជូនដល់មន្ត្រីរាជការក្រោមឱវាទក្រសួងព័ត៌មាន ។
ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាល ដែលអភិវឌ្ឍ ដោយ ក.ប.ទ. និងត្រូវបានដាក់ឱ្យប្រើក្នុងគោលបំណងលុបបំបាត់ការក្លែងបន្លំឯកសារ ផ្ដល់ភាពងាយស្រួលក្នុងការប្រើ និងផ្ទៀងផ្ទាត់ភាពត្រឹមត្រូវ នៃឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រមទាំងជំរុញការធ្វើបរិវត្តកម្មឌីជីថល ស្របតាមឧត្តមានុវត្ត ជាអន្តរជាតិ ។
ការផ្ទៀងផ្ទាត់ឯកសារ នៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាពខ្ពស់ នៅលើសន្លឹក នៃឯកសារនីមួយៗ។
ទន្ទឹមនឹងនេះ ការប្រើឯកសារ ដែលមានដាក់បញ្ចូល QR Code ស្ដង់ដានេះ មិនតម្រូវឱ្យមានការធ្វើនីត្យានុកូលកម្ម លើឯកសារថតចម្លងក្នុងទម្រង់ជាក្រដាសឡើយ ។
ប្រភពបានលើកឡើងថា ផ្អែកតាមខ្លឹមសារអនុស្សរណៈ នៃការយោគយល់ ដែលត្រូវបានចុះហត្ថលេខានៅថ្ងៃនេះ ក.ប.ទ. នឹងជួយគាំទ្រដល់ក្រសួងព័ត៌មាន និងក្រសួងទេសចរណ៍ ក្នុងការធ្វើបរិវត្តកម្មឌីជីថលផ្ទៃក្នុង ស្របតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ និងបញ្ចកោណទី៥ នៃយុទ្ធសាស្ត្របញ្ចកោណ ដំណាក់កាលទី១ ជាអាទិ៍ ៖
-ការដាក់ QR Code ស្តង់ដាលើឯកសាររបស់ក្រសួងទាំងពីរ ដែលអាចផ្ទៀងផ្ទាត់បានតាមថ្នាល verify.gov.kh ។
-ការរៀបចំបណ្តាញហេដ្ឋារចនាសម្ព័ន្ធ និងតភ្ជាប់អ៊ីនធឺណិត ស្របតាមតម្រូវការ នៃការប្រើប្រាស់ជាក់ស្តែង ។
-ការកំណត់តម្រូវការ នៃការប្រើប្រាស់កុំព្យូទ័រ ឬឧបករណ៍ឌីជីថលជារបស់រដ្ឋ និងការប្រើប្រាស់សុសវរដែល មានអាជ្ញាបណ្ណក្នុងការងារប្រចាំថ្ងៃ ។
-ការកំណត់មុខសញ្ញាមន្ត្រីជំនាញ ដែលត្រូវទទួលការបណ្តុះបណ្តាល ការពិគ្រោះយោបល់ រៀបចំផែនការសកម្មភាពការងារ ក្នុងក្របខណ្ឌគណៈកម្មាធិការរដ្ឋាភិបាលឌីជីថល ។
-ការគិតគូរអំពីប្រព័ន្ធបច្ចេកវិទ្យាឌីជីថល សម្រាប់ការងារប្រចាំថ្ងៃ ។
សេចក្តីប្រកាសព័ត៌មានបានលើកឡើងថា ពិធីចុះហត្ថលេខាក្នុងថ្ងៃនេះ គឺជាលើកទី៦ ហើយ ដែល ក.ប.ទ. បានរៀបចំពិធីចុះហត្ថលេខាលើអនុស្សរណៈ និងកិច្ចព្រមព្រៀង ស្ដីពីកិច្ចសហប្រតិបត្តិការក្នុងការដាក់ឲ្យប្រើថ្នាលផ្ទៀងផ្ទាត់ឯកសារ verify.gov.kh និងជាការរអភិវឌ្ឍឌីជីថលភាវូនីយកម្ម ក្នុងក្រសួង ស្ថាប័នរដ្ឋ និងគ្រឹះស្ថានឧត្តមសិក្សា ៕
ចែករំលែកព័តមាននេះ