រាជធានីភ្នំពេញ ៖ នួន ភិរក្ស អ្នកប្រដាល់មកពីក្លឹបក្រសួងមហាផ្ទៃ ដែលបាត់មុខជាយូរមកហើយនោះ បានត្រឡប់មកកាន់សង្វៀនប្រដាល់ម្តងទៀត ដោយជួបប្រកួតជាមួយសារឹម វ៉ាន់ថន មកពីក្លឹបក្រសួងការពារជាតិ នៅសង្វៀនស្ថានីយទូរទស្សន៍បាយ័ននាថ្ងៃទី២១ ឧសភា ឆ្នាំ២០១១ ។ នួន ភិរក្ស ជាអ្នកប្រដាល់ជើងចាស់ដែលធ្លាប់អង្រួនសង្វៀនប្រដាល់ឱ្យកក្រើក និងធ្លាប់ទទួលបាននូវការគាំទ្រពីសំណាក់ទស្សនិកជនយ៉ាងកក់ក្តៅបំផុត ។
គេនៅចាំបានថា កាលពីដើមឆ្នាំ២០០៩កន្លងមក នួន ភិរក្ស បានចូលរួមប្រកួតក្នុងព្រឹត្តិការណ៍ដណ្តើមខ្សែក្រវាត់ K-cement នៅសង្វៀនស្ថានីយទូរទស្សន៍ប៉ុស្តិ៍លេខ៥ ក្នុងប្រភេទទម្ងន់៦០គីឡូក្រាម ប៉ុន្តែភិរក្សមិនទទួលបានលទ្ធផលល្អទេ ។ ចាប់ពីពេលនោះមក ភិរក្សបាត់មុខរហូត ស្រាប់តែពេលនេះគេវិលមកម្តងទៀត ដោយសុំអ្នកផ្គូផ្គងប៉ុស្តិ៍បាយ័នឡើងប្រកួតជាមួយសារឹម វ៉ាន់ថន ។ តាមពិតទៅនួន ភិរក្ស និងសារឹម វ៉ាន់ថន គឺជាគូប្រកួតចាស់ធ្លាប់មានប្រវត្តិជួបគ្នាពីអតីតកាលញឹកញាប់រួចមកហើយ។
មួយរយៈនៃការបាត់មុខរបស់នួន ភិរក្ស កន្លងមកនេះ សារឹម វ៉ាន់ថន គេនៅរក្សាវិជ្ជាគុនបានល្អដដែល។ ចំណែកនួន ភិរក្ស ដែលគេដឹងថា ធ្លាប់មានសមត្ថភាពខ្ពស់ក្នុងការប្រយុទ្ធនោះ ឆ្លងកាត់ការអាក់ខានប្រកួតក្នុងរយៈពេលយូរបែបនេះ មិនដឹងថា គេអាចរក្សាវិជ្ជាគុនបានកម្រិតណា ឡើយ ។ តាមធម្មតា អ្នកដែលបាត់មុខយូរបែបនេះពេលត្រឡប់មកវិញតែងមានការឆ្គាំឆ្គងខ្លះមិនខាន ប៉ុន្តែលុះសមបាន៣-៤ប្រកួតទើបគ្រាន់បើវិញបាន ។ ពេលនេះនួន ភិរក្សទំនងមិនឈ្នះសារឹម វ៉ាន់ថនទេ ។
ជិន រ៉ា មកពីក្លឹបក្រសួងការពារជាតិ ត្រូវប្រកួតជាមួយស៊ឹម សំ មកពីក្លឹបប៉េអឹមរាជធានីភ្នំពេញ ។ ស៊ឹម សម ធ្លាប់មានឱកាសឡើងសង្វៀនញឹកញាប់ដែរ ប៉ុន្តែមិនសូវមានសំណាងទេ ។ ពេលនេះគេមកប៉ះជាមួយជិន រ៉ា ក៏ពិបាកសង្ឃឹមថាឈ្នះដែរ ។
មឿត ឆាយមាស មកពីក្លឹបប្រដាល់ខេត្តក្រចេះ ត្រូវប្រកួតជាមួយសូយ គោ មកពីក្លឹបអូដឹមកីឡា។ ឆាយមាស និងសូយ គោ គឺជាគូដែលមានការចាប់អារម្មណ៍ម្យ៉ាងដែរ។ ពួកគេស្ថិតក្នុងប្រភេទទម្ងន់ស្រាលមែន ប៉ុន្តែជាប្រភេទអ្នកខ្លាំង ។ ឆាយមាស និងសូយ គោ មានវិជ្ជាគុនពេញខ្លួន ការប្រយុទ្ធពោរពេញទៅដោយយុទ្ធវិធីនិងកលល្បិចដូចគ្នា មិនសូវប្រើកម្លាំងបាយទេ ។
ឌួង ចន្ទ្រា មកពីក្លឹបដីឡូត៍មានឫទ្ធិខេត្តបាត់ដំបង ត្រូវប្រកួតជាមួយយ៉ាម ផានិត មកពីក្លឹបរស្មីកុមារកំព្រា ។ រីឯម៉ៃ សុខលីម មកពីក្លឹបចាក់អង្រែមានជ័យ ត្រូវប្រកួតជាមួយអ៊ី ចំរើន មកពីក្លឹបតាឡីដំរីមានឫទ្ធិ ៕
ចែករំលែកព័តមាននេះ