ខេត្តបាត់ដំបង ៖ អ្នកបើកបររថយន្តម្នាក់បានស្លាប់ភ្លាមៗនៅកន្លែងកើតហេតុ ក្រោយបើករថយន្តលឿនដល់ផ្លូវកោងបួងចង្កូតជ្រុលទើបធ្លាក់ផ្លូវបណ្ដាលឲ្យក្រឡាប់ កាលពីវេលាម៉ោង៧និង១០នាទីយប់ថ្ងៃទី២៤ តុលា ស្ថិតនៅចំណុចភូមិផ្លូវមាស ឃុំត្រែង ស្រុករតនៈមណ្ឌល ។
សមត្ថកិច្ចបានឲ្យដឹងថា ជនរងគ្រោះឈ្មោះ ហុក គឹមហ៊ុន ភេទប្រុស អាយុ៤៥ឆ្នាំ នៅភូមិដង្គត់ ឃុំស្ដៅ ស្រុករតនៈមណ្ឌល។ រីឯរថយន្តម៉ាក Fuso ពាក់ស្លាកលេខកំពង់ចាម 4A-2310 ។ រថយន្តនេះពុំមានដឹកអ្វីទេ តែទំនងអ្នកបើកលឿន ទើបដល់ចំណុចផ្លូវកោងបត់ជ្រុលក្រឡាប់តែម្ដង។
ប្រភពនៅកន្លែងកើតហេតុបានឲ្យដឹងដែរថា រថយន្តនោះបានជ្រុលចង្គូតធ្លាក់ផ្លូវទៅខាងឆ្វេងដៃ ហើយក្រឡាប់កៀបជាប់អ្នកបើកបរស្លាប់តែម្ដង។ ប្រភពបានបញ្ជាក់ថា មុនពេលក្រឡាប់ រថយន្តនោះហាក់បើកក្នុងល្បឿនលឿន ហើយដល់ផ្លូវកោងបួងចង្កូតជ្រុលហួសទៅខាងឆ្វេងដៃ រហូតក្រឡាប់ស្លាប់តៃកុងតែម្ដង។
យ៉ាងណាក៏ដោយ សមត្ថកិច្ចបានប្រាប់ថា ក្រោយកើតហេតុ សមត្ថកិច្ចមូលដ្ឋានបានចុះទៅដល់ ដើម្បីជួយអន្តរាគមន៍ដល់ជនរងគ្រោះ តែជនរងគ្រោះបានស្លាប់ទៅហើយ។ គេមិនបាននាំយករថយន្តទៅកាន់កន្លែងសមត្ថកិច្ចទេ ប្រគល់ឲ្យក្រុមគ្រួសារដោះស្រាយ ព្រោះឧប្បត្តិហេតុនេះ បង្កឡើងដោយខ្លួនឯង ។
ចែករំលែកព័តមាននេះ