ADផ្ទាំងផ្សព្វផ្សាយពាណិជ្ជកម្ម

Picture

ខ្លាំង​បាត់​! រៀង​រាល់​១៣​វិនាទី​ម្តង នៅ​សហ​រដ្ឋអាមេរិក​កើត​មានការ​លែងលះ​១​ករណី

4 ខែ មុន

សហរដ្ឋអាមេរិក ៖ យោង​តាម​របាយការណ៍​ពី​គេហទំព័រ Pubity កាលពី​ពេល​ថ្មី​ៗ​នេះ បាន​បង្ហាញ​ថា

សហរដ្ឋអាមេរិក ៖ យោង​តាម​របាយការណ៍​ពី​គេហទំព័រ Pubity កាលពី​ពេល​ថ្មី​ៗ​នេះ បាន​បង្ហាញ​ថា នៅ​សហរដ្ឋអាមេរិក ការ​លែងលះ​ប្តី​ប្រពន្ធ​១​ករណី កើតឡើង​ប្រហែល​រៀង​រាល់ ១៣.២​វិនាទី​ម្តង ដូច្នេះ​មាន​ន័យ​ថា ការ​លែងលះ​ប្រហែល ២៧៧​ករណី​ក្នុង​១​ម៉ោង ៦,៦៤៦​ករណី​ក្នុង​១​ថ្ងៃ ៤៦,៥២៣​ករណី​ក្នុង​១​ស​ប្តា​ហ៍ និង ២,៤១៩,១៩៦​ករណី​ក្នុង​១​ឆ្នាំ​។

ការ​លែងលះ​នៅ​សហរដ្ឋអាមេរិក គឺជា​ដំណើរការ​ផ្លូវច្បាប់​ដែល​ចៅក្រម ឬ​អាជ្ញាធរ​ផ្សេង​ទៀត​រំលាយ​អាពាហ៍ពិពាហ៍​ដែល​មាន​ស្រាប់​រវាង​មនុស្ស​ពីរ​នាក់​។ ការ​លែងលះ​ធ្វើ​ឱ្យ​មនុស្ស​មាន​ស្ថានភាព​នៅ​លីវ និង​អនុញ្ញាត​ឱ្យ​ពួក​គេ​រៀប​ការ​ជាមួយ​បុគ្គល​ផ្សេង​ទៀត​។ នៅ​សហរដ្ឋអាមេរិក អាពាហ៍ពិពាហ៍ និង​ការ​លែងលះ​ស្ថិត​នៅ​ក្រោម​យុត្តាធិការ​របស់​រដ្ឋាភិបាល​រដ្ឋ ពុំ​មែន​រដ្ឋាភិបាល​សហព័ន្ធ​នោះ​ទេ​។

ទោះបីជា​បញ្ហា​បែប​នេះ​ជា​ធម្មតា​កើតឡើង​បន្ទាប់បន្សំ ឬ​ជា​ផលវិបាក​ដល់​ការ​រំលាយ​អាពាហ៍ពិពាហ៍​យ៉ាងណា​ក៏​ដោយ ក៏​ការ​លែងលះ​អាច​ពាក់ព័ន្ធ​នឹង​បញ្ហា​នៃ​ការ​គាំទ្រ​ប្តី​ប្រពន្ធ ការ​មើលថែ និង​ចិញ្ចឹម​បីបាច់​កូន ការ​ចែកទ្រព្យ​សម្បត្តិ និង​ការ​បែងចែក​បំណុល​។

បើ​ក្រ​ឡែក​មើល​តួលេខ​ខាងលើ ពិត​ណាស់​គ្រប់​គ្នា​ច្បាស់​ជា​គិត​ថា សហរដ្ឋអាមេរិក គឺជា​ប្រទេស​មាន​អត្រា​លែងលះ​ខ្ពស់​បំផុត​នៅ​លើ​ពិភពលោក ប៉ុន្តែ​ពុំ​ដូច្នោះ​នោះ​ទេ​។ បើ​តាម​ទិន្នន័យ​ចុង​ក្រោយ​ពី​គេហទំព័រ Wisevoter របស់​អា​មេ​រិ​ក ដែល​បង្កើត​ដោយ​ផ្អែក​លើ​គោលការណ៍​ផ្តល់​ការ​ពិត​នូវ​ព័ត៌មាន ការ​យល់​ដឹង និង​គន្លឹះ​ដែល​ពង្រីក​លទ្ធិប្រជាធិបតេយ្យ​នៅ​ក្នុង​យុគសម័យ​ទំនើប​នោះ បាន​បង្ហាញ​ថា ម៉ា​ល់​ឌី​វ គឺជា​ប្រទេស ឬ​ដែនដី​មាន​អត្រា​លែងលះ​ខ្ពស់​បំផុត​លើ​ពិភពលោក ខណៈ​ដែល​អា​មេ​រិ​ក​មិន​ជាប់​ក្នុង​តំណែង​កំពូល​ទាំង ១០ នៃ​តារាង​របស់ Wisevoter ឡើយ ពោល​គឺ​នៅ​ចំណាត់ថ្នាក់​លេខ ២១ ឯណោះ​។

១-ម៉ា​ល់​ឌី​វ អត្រា ៥.៥​ករណី​លែងលះ​ក្នុង​ចំណោម​១​ពាន់​នាក់
២-កោះ​ហ្គាំ (Guam) អត្រា ៤.៣​ករណី​លែងលះ​ក្នុង​ចំ​ណោ​១​ពាន់​នាក់
៣-រុ​ស្ស៊ី អត្រា ៣.៩​ករណី​លែងលះ​ក្នុង​ចំណោម​១​ពាន់​នាក់
៤-ម៉ុ​ល​ដា​វី អត្រា ៣.៨​ករណី​លែងលះ​ក្នុង​ចំណោម​១​ពាន់​នាក់
៥-បេឡា​រុស អត្រា ៣.៧​ករណី​លែងលះ​ក្នុង​ចំណោម​១​ពាន់​នាក់

៦-ចិន អត្រា ៣.២​ករណី​លែងលះ​ក្នុង​ចំណោម​១​ពាន់​នាក់
៧-អា​រូបា (Aruba) អត្រា ២.៩​ករណី​លែងលះ​ក្នុង​ចំណោម​១​ពាន់​នាក់
៨-ហ្ស​ក​ហ្ស៊ី អត្រា ២.៩​ករណី​លែងលះ​ក្នុង​ចំណោម​១​ពាន់​នាក់
៩-អ៊ុយ​ក្រែ​ន អត្រា ២.៩​ករណី​លែងលះ​ក្នុង​ចំណោម​១​ពាន់​នាក់
១០-កូ​ស្តា​រី​កា អត្រា ២.៨​ករណី​លែងលះ​ក្នុង​ចំណោម​១​ពាន់​នាក់
២១-អា​មេ​រិ​ក អត្រា ២.៣​ករណី​លែងលះ​ក្នុង​ចំណោម​១​ពាន់​នាក់​។

ជាមួយ​គ្នា​នោះ​ផង​ដែរ របាយការណ៍ Wisevoter ក៏​បាន​បង្ហាញ​ថា អត្រា​លែងលះ​នៅ​ជុំវិញ​ពិភពលោក​មានការ​កើន​ឡើងជា​លំដាប់​ក្នុង​ប៉ុន្មាន​ទស​វត្ស​ថ្មី​ៗ​នេះ​។ យោង​តាម​ការ​វិភាគ​ពី​មជ្ឈមណ្ឌល​ស្រាវជ្រាវ Pew របស់​អា​មេ​រិ​ក​បង្ហាញ​ថា ស្ទើរ​ពាក់កណ្តាល​នៃ​អាពាហ៍ពិពាហ៍​ទាំងអស់​នៅ​សហរដ្ឋអាមេរិក​បញ្ចប់​ដោយ​ការ​លែងលះ ជាមួយ​អត្រា​សម្រាប់​អាពាហ៍ពិពាហ៍​លើក​ដំបូង កើនឡើង​ប្រហែល ២៥% ចាប់តាំងពី​ទស​វត្ស​ឆ្នាំ ១៩៦០​។

ដូច​គ្នា​នេះ​ដែរ អត្រា​លែងលះ​នៅ​អឺរ៉ុប និង​តំបន់​ផ្សេង​ទៀត ក៏​មានការ​កើនឡើង​គួរ​ឱ្យ​កត់សម្គាល់​នៅ​ក្នុង​រយៈពេល​ប៉ុន្មាន​ឆ្នាំ​កន្លង​មកនេះ​។ ប្រទេស​ផ្សេង​ទៀត​ដូច​ជា ចិន ជប៉ុន និង​ឥណ្ឌា ដែល​មានច្បាប់​អាពាហ៍ពិពាហ៍​ដ៏​តឹង​រឹង​មានការ​លំបាក ឬ​មិន​អាច​បញ្ចប់​អាពាហ៍ពិពាហ៍​ដោយ​ស្របច្បាប់ បាន​មើលឃើញ​ថា អត្រា​ការ​លែងលះ​របស់​ពួក​គេ​កើនឡើង​ទ្វេ​ដង ឬ​បី​ដង ចាប់តាំងពី​ទស​វត្ស​មុន ដោយសារ​ការ​ផ្លាស់​ប្តូរ​ច្បាប់ និង​បទដ្ឋាន​វប្បធម៌​។

អត្រា​ការ​លែងលះ​កំពុង​កើនឡើង​យ៉ាង​ខ្លាំង នៅ​ទូ​ទាំង​ផ្នែក​ភាគច្រើន​នៃ​ពិភពលោក ហើយ​និន្នាការ​នេះ ត្រូវ​បាន​គេ​រំពឹង​ថា នឹង​បន្ត​សម្រាប់​ឆ្នាំ​ខាង​មុខ ដែល​រារាំង​ការ​ផ្លាស់​ប្តូរ​មិន​នឹក​ស្មាន​ដល់​នៅ​ក្នុង​ទំនៀមទម្លាប់ និង​ច្បាប់សង្គម​ទាក់ទង​នឹង​អាពាហ៍ពិពាហ៍ និង​ការ​បញ្ចប់​របស់​វា​៕

អត្ថបទសរសេរ ដោយ

កែសម្រួលដោយ