ទីក្រុងគែរ ៖ ប្រេសិតពិសេសរបស់ចិន ទទួលបន្ទុកបញ្ហាមជ្ឈិមបូព៌ា បានព្រមានកាលពីថ្ងៃអាទិត្យថា ស្ថានភាពនៅតំបន់ហ្គាហ្សា មានភាពធ្ងន់ធ្ងរ ហើយហានិភ័យ នៃជម្លោះនេះ កំពុងរីករាលដាលទ្រង់ទ្រាយធំ ។
ថ្លែងនៅក្នុងសន្និសីទសារព័ត៌មាន នៅទីក្រុងគែរ លោក Zhai Jun បាននិយាយថា «ជម្លោះប្រដាប់អាវុធ កំពុងកើតឡើងនៅតាមព្រំដែនអ៊ីស្រាអែល-លីបង់ និងអ៊ីស្រាអែល-ស៊ីរី។ លោកមានការព្រួយបារម្ភចំពោះហានិភ័យ នៃជម្លោះនៅហ្គាហ្សា កំពុងរីករាលដាលក្នុងតំបន់ និងអន្តរជាតិ» ។
លោក Zhai Jun បានជំរុញឲ្យសហគមន៍អន្តរជាតិ រក្សាការប្រុងប្រយ័ត្ន ប្រឆាំងនឹងការវិវឌ្ឍន៍បែបនេះ ហើយចាត់វិធានការជាបន្ទាន់ ដើម្បីការពារស្ថានភាព កុំឲ្យប្រែក្លាយទៅជាគ្រោះមហន្តរាយធ្ងន់ធ្ងរ ។
លោក Zhai Jun ក៏បានសន្យាថា ប្រទេសចិន នឹងបន្តផ្តល់ជំនួយមនុស្សធម៌ជាបន្ទាន់ ដល់ប្រជាជនប៉ាឡេស្ទីន តាមរយៈអង្គការសហប្រជាជាតិ ។
ទូរទស្សន៍ជាតិចិន CCTV រាយការណ៍ថា ប្រេសិតពិសេសរបស់ចិន បានចូលរួមកិច្ចប្រជុំកំពូលសន្តិភាពទីក្រុងគែរ កាលពីថ្ងៃសៅរ៍ ជាមួយប្រធានាធិបតីអេហ្ស៊ីប លោក Abdel Fattah el-Sisi និងមេដឹកនាំអារ៉ាប់ផ្សេងទៀត ដើម្បីស្វែងរក “ផែនទីបង្ហាញផ្លូវ” សម្រាប់បញ្ចប់ “សោកនាដកម្ម” នៅក្នុងតំបន់ហ្គាហ្សា ។
បច្ចុប្បន្ន លោក Zhai Jun កំពុងស្ថិតនៅមជ្ឈិមបូព៌ា ដើម្បីជំរុញកិច្ចចរចាសន្តិភាព និងជំរុញឲ្យមានបទឈប់បាញ់។
លោក Zhai Jun ប្រេសិតពិសេសរបស់ចិន បានទៅបំពេញទស្សនកិច្ចនៅប្រទេសកាតា និងអេហ្ស៊ីប ហើយក៏នឹងទៅបំពេញទស្សនកិច្ចនៅអារ៉ាប់រួម អារ៉ាប៊ីសាអូឌីត ហ្ស៊កដានី និងប្រទេសដទៃទៀត នៅក្នុងតំបន់មជ្ឈិមបូព៌ា ។
មុនពេលដំណើរ លោក Zhai Jun បានទូរសព្ទជួបជាមួយប្រមុខក្រសួងការបរទេស នៃអាជ្ញាធរប៉ាឡេស្ទីន អ៊ីស្រាអែល អេហ្ស៊ីប អារ៉ាប៊ីសាអូឌីត អារ៉ាប់រួម ន័រវេស និងបណ្តាប្រទេសដទៃទៀត ក៏ដូចជាតំណាងពិសេសនៅអង្គការសហប្រជាជាតិ និងសហភាពអឺរ៉ុប ៕
ចែករំលែកព័តមាននេះ