ទីតាំងប្រព្រឹត្តបទល្មើសនេសាទចំនួន០៦កន្លែង នៅតំបន់ទន្លេសាប ស្ថិតក្នុងភូមិសាស្ត្រ ឃុំព្រែកនរិន្ទ ស្រុកឯកភ្នំ ត្រូវបានកម្លាំងចម្រុះឆ្មក់ចុះទៅកា.ប់កម្ទេចចោល
ខេត្តបាត់ដំបង ៖ ទីតាំងប្រព្រឹត្តបទល្មើសនេសាទចំនួន០៦កន្លែង នៅតំបន់ទន្លេសាប ស្ថិតក្នុងភូមិសាស្ត្រ ឃុំព្រែកនរិន្ទ ស្រុកឯកភ្នំ ត្រូវបានកម្លាំងចម្រុះឆ្មក់ចុះទៅកា.ប់កម្ទេចចោល កាលពីថ្ងៃទី២០ ខែតុលា ឆ្នាំ២០២៣។ នេះបើតាមសេចក្ដីរាយការណ៍ពីសមត្ថកិច្ចមូលដ្ឋាន តែរកមិនឃើញ ឬស្គាល់អត្តសញ្ញាណម្ចាស់បទល្មើសណាម្នាក់នោះទេ។
បើតាមសមត្ថកិច្ច បានរាយការណ៍ឱ្យដឹងថា នៅក្នុងកិច្ចប្រតិបត្តិការនោះ មានកម្លាំងកងរាជអាវុធហត្ថ មន្ត្រីជលផល មន្ត្រីរដ្ឋបាលស្រុកឯកភ្នំ និងប្រជាសហគមន៍នេសាទមួយចំនួនផងដែរ។ កម្លាំងចម្រុះនេះ បានចុះបង្ក្រាបទីតាំងប្រព្រឹត្តបទល្មើសនេសាទចំនួន០៦កន្លែង និងបានកា.ប់កម្ទេចឧបករណ៍នេសាទ (សាច់អួន) និងភស្ដុតាងពាក់ព័ន្ធជាច្រើនទៀត។
បើតាមរបាយការណ៍ បានឲ្យដឹងបន្តថា វត្ថុតាងដែលត្រូវកា.ប់បំផ្លាញចោលនោះ រួមមាន ៖ សាច់អួនក្រឡាញឹក ប្រវែងជាង៣,៣៥០ម៉ែត្រ, បង្គោលឈើ ចំនួន៦៧០ដើម, ឡុកចាប់ត្រី ចំនួន១២ឡុក និងលែងកូនត្រីចម្រុះចូលទឹកវិញ ជិត១០០គីឡូក្រាមទៀតផង។ ប៉ុន្តែរបាយការណ៍មិនបានបង្ហាញអត្តសញ្ញាណជនប្រព្រឹត្តបទល្មើសណាម្នាក់នោះទេ។
គួរឱ្យកត់សម្គាល់ផងដែរថា ការបង្ក្រាបបទល្មើសនេសាទរយៈពេលប៉ុន្មានខែចុងក្រោយនេះ សមត្ថកិច្ចចម្រុះហាក់បានប្រឹងប្រែងយ៉ាងសកម្ម រហូតមានដាក់កម្លាំងពង្រាយប្រចាំការ និងជិះកាណូតល្បាតស្ទើរគ្រប់ទិសទីនៅតំបន់ទន្លេសាបទៀតផង តែហាក់មិនបានធ្វើឲ្យជនល្មើសខ្លាចញញើតឡើយ។ ផ្ទុយទៅវិញ ជនល្មើសហាក់កាន់តែបង្កើតបទល្មើសទ្វេដង ពោលគឺសមត្ថកិច្ចកាន់តែបង្ក្រាប ជនល្មើសកាន់តែបង្កើនបទល្មើស កាន់តែផ្គើន។
បើតាមមតិនានា បានលើកហេតុផលថា ដរាបណា ជនប្រព្រឹត្តនៅតែស្ថិតក្រៅគុ.ក កុំរំពឹងថា បទល្មើសនេសាទអាចថយចុះឲ្យសោះ។ ព្រោះថា កន្លងមក គេសង្កេតឃើញសមត្ថកិច្ចហាក់ប្រឹងប្រែងណាស់ក្នុងការចុះបង្ក្រាបបទល្មើសនេសាទនានា តែគេមិនដែលឃើញចាប់ខ្លួនជនប្រព្រឹត្តបទល្មើសណាបានម្នាក់ បញ្ជូនទៅកាន់តុលាការម្ដងឡើយ។ ដូច្នេះហើយ ទើបជនល្មើសបានចិត្ត បានឱកាសកាន់តែប្រព្រឹត្តបទល្មើសទ្វេដង៕
ចែករំលែកព័តមាននេះ