ខេត្តបាត់ដំបង ៖ បើគិតត្រឹមម៉ោង១២រសៀល ថ្ងៃទី២២ ខែតុលា ឆ្នាំ២០២៣នេះ គឺមានរយៈពេលជិត០២ថ្ងៃមកហើយ ក្រុមគ្រួសារជនរងគ្រោះ និងសមត្ថកិច្ចនៅមិនទាន់រាវរកឃើញសា.កស.ពយុវជនម្នាក់ដែលលង់ទឹកនៅប្រឡាយមួយកន្លែង ស្ថិតក្នុងស្រុកថ្មគោល នៅឡើយទេ។ នេះបើតាមការផ្ដល់ដំណឹងពីសមត្ថកិច្ចដែលកំពុងស្វះស្វែងជួយរាវរកស.ពយុវជនរងគ្រោះជាមួយក្រុមគ្រួសារជនរងគ្រោះ។
លោក សេង លុច អធិការស្រុកថ្មគោល បានរាយការណ៍ប្រាប់ឱ្យដឹងថា ហេតុការណ៍នេះបានកើតឡើងកាលពីវេលាម៉ោងជាង៣រសៀលថ្ងៃទី២១ ខែតុលា ឆ្នាំ២០២៣ នៅចំណុចប្រឡាយលេខ០២ ស្ថិតក្នុងភូមិកៀនកែស១ ឃុំគោកឃ្មុំ ស្រុកថ្នគោល។ ជនរងគ្រោះខាងលើមានឈ្មោះ យ៉ាន តារ៉ា ភេទប្រុស អាយុ២៣ឆ្នាំ រស់នៅភូមិប៉ោយយង់ ឃុំតាពូង ស្រុកថ្មគោល។
លោកអធិការ បានប្រាប់បន្តថា ជនរងគ្រោះ និងគ្នីគ្នាប៉ុន្មាននាក់ទៀតបាននាំគ្នាជិះកង់ទៅលេងទឹកប្រឡាយខាងលើ ហើយក៏លង់ទឹកប្រឡាយ ខណៈពេលទឹកកំពុងតែហូរខ្លាំងផង ក៏បាត់ខ្លួនរហូតមកដល់ពេលនេះ។ ចំណែកក្រុមគ្រួសារ អ្នកភូមិ និងសមត្ថកិច្ចបានប្រឹងប្រែងជួយរាវរកដែរ ប៉ុន្តែមិនទាន់ប្រទះឃើញសា.កស.ពយុវជនរូបនោះទេ ហើយរហូតមកដល់ត្រឹមម៉ោង១២ថ្ងៃត្រង់នេះ ក៏មិនទាន់រកឃើញដែរ ខណៈទាំងសមត្ថកិច្ច ទាំងអ្នកភូមិ និងសាច់ញាតិកំពុងតាមរកស.ពជនរងគ្រោះនៅឡើយ។
បើតាមប្រភពព័ត៌មាន បានឲ្យដឹងដែរថា ជនរងគ្រោះបានជិះកង់ទៅលេងទឹកប្រឡាយខាងលើនេះ ជាមួយក្មេងៗប៉ុន្មាននាក់ទៀត។ ពេលនោះជនរងគ្រោះព្យាយាមចុះលេងទឹកប្រឡាយនោះ តែពេលព្យាយាមចុះទឹក ស្រាប់តែជនរងគ្រោះរអិលជើងធ្លាក់ទឹកដោយពុំទាន់បានត្រៀមលក្ខណៈអ្វីទាំងអស់ ស្របពេលដែលទឹកកំពុងតែហូរខ្លាំងផង។
ប្រភពដដែលបានបន្តថា គ្រានោះ ជនរងគ្រោះបានស្រែកហៅឲ្យក្មេងប្រុសម្នាក់ដែលឈរនៅខាងលើ ឲ្យជួយទាញដៃឡើងគោកវិញ តែពេលក្មេងប្រុសរូបនោះស្ទុះទៅចាប់ដៃ គឺចាប់មិនជាប់ឡើយ ក៏របូតដៃលិចបាត់ជនរងគ្រោះភ្លាមៗតែម្ដង។ ដោយសារតែមិនអាចជួយសង្គ្រោះយុវជនរងគ្រោះរូបនេះបាន ហើយក៏លិចបាត់ស្ងាត់ឈឹងទៀត ទើបក្មេងប្រុសម្នាក់នោះរត់ទៅហៅអ្នកភូមិឲ្យជួយ ហើយក៏បង្កឱ្យមានការផ្អើលយ៉ាងព្រោងព្រាតភ្លាមៗ រួចនាំគ្នាមកជួយរាវរក តែរកមិនឃើញឡើយ។
ប្រភពដដែលបន្តទៀតថា នៅកន្លែងកើតហេតុ ភ្លាមៗនោះ គេឃើញសាច់ញាតិជនរងគ្រោះ អ្នកភូមិ និងសមត្ថកិច្ចមូលដ្ឋានរាប់សិបនាក់បានចុះរាវរកជនរងគ្រោះនៅក្នុងប្រឡាយ ខណៈស្ថានភាពទឹកកំពុងតែហូរខ្លាំង តែរកមិនឃើញជនរងគ្រោះទេ បើទោះបីជាគេនាំគ្នាទម្លាក់ទ្វារទឹកកុំឲ្យហូរខ្លាំងក្ដី។
ចំណែកសាក្សីនៅទីនោះ ក៏បាននិយាយដែរថា មនុស្សជាច្រើននាក់នាំគ្នាចុះរាវរកជនរងគ្រោះ ចាប់តាំងពីពេលកើតហេតុ រហូតថ្ងៃទី២២ ខែតុលា តែរកមិនឃើញសា.កស.ពជនរងគ្រោះឡើយ។
អធិការស្រុកថ្មគោល លោក សេង លុច បានបញ្ជាក់ថា បើតាមការពិនិត្យស្ថានភាពកន្លែងកើតហេតុ លោកសង្ស័យសា.កស.ពជនរងគ្រោះទើរជាប់នៅក្នុងលូទ្វារទឹក ទើបរកមិនឃើញនៅតាមប្រឡាយ ខណៈអ្នកជួយរាវរករាប់សិបនាក់នាំគ្នាស្វែងរកតាំងពីលើ រហូតដល់ប៉ែកខាងក្រោមហើយ បើគិតត្រឹមម៉ោង១២ថ្ងៃត្រង់ ថ្ងៃទី២២ ខែតុលា គឺជិត០២ថ្ងៃមកហើយ នៅតែរកមិនឃើញទៀត។ ប៉ុន្តែទោះបីជាយ៉ាងណាក៏ដោយ ក៏លោកបានបញ្ជាក់ទៀតថា ទាំងកម្លាំងសមត្ថកិច្ច ក្រុមគ្រួសារជនរងគ្រោះ និងអ្នកភូមិផង បាននិងកំពុងស្វែងរកស.ពជនរងគ្រោះនៅឡើយទេ៕
ចែករំលែកព័តមាននេះ