បន្ទាយមានជ័យ ៖ កម្លាំងនគរបាលស្រុកម៉ាឡៃ បានឃាត់ខ្លួនជនសង្ស័យ០៣នាក់ ក្នុងករណីបង្កអំពើហិ.ង្សា ដោយចេតនាមានស្ថានទម្ងន់ទោសប្រព្រឹត្តនៅវេលាម៉ោង០៦ល្ងាចថ្ងៃសុក្រ ទី២០ ខែតុលា ឆ្នាំ២០២៣ នៅលើដងផ្លូវជាតិលេខ៥៩…
បន្ទាយមានជ័យ ៖ កម្លាំងនគរបាលស្រុកម៉ាឡៃ បានឃាត់ខ្លួនជនសង្ស័យ០៣នាក់ ក្នុងករណីបង្កអំពើហិ.ង្សា ដោយចេតនាមានស្ថានទម្ងន់ទោសប្រព្រឹត្តនៅវេលាម៉ោង០៦ល្ងាចថ្ងៃសុក្រ ទី២០ ខែតុលា ឆ្នាំ២០២៣ នៅលើដងផ្លូវជាតិលេខ៥៩ ចំណុចភូមិស្វាយព្រៃ ឃុំអូរស្រទ្បៅ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ករណីហិង្សានៅវេលាម៉ោង០៦ល្ងាច ថ្ងៃទី២០ តុលា បង្កឡើងដោយក្មេងមួយក្រុម មានគ្នា៣នាក់ ជិះម៉ូតូម៉ាកហុងដាឌ្រីម សេរី២០០៨ ពណ៌ខ្មៅ ស្លាកលេខ បន្ទាយមានជ័យ 1S-4305 មកឈប់ឈរចាំត្រង់ចំណុចភូមិស្វាយព្រៃ ឃុំអូរស្រទ្បៅ ស្រុកម៉ាឡៃ លើដងផ្លូវជាតិលេខ៥៩ រួចធ្វើសកម្មភាពយកដុំថ្ម គប់ទៅលើជនរងគ្រោះ០២នាក់ កំពុងជិះម៉ូតូហុងដាឌ្រីមសេរី ២០២៣ ពណ៌ស គ្មានស្លាកលេខ បណ្តាលឲ្យដួលរងគ្រោះទាំង០២នាក់ រួមមាន ៖
ទី១-ឈ្មោះ ដា ភេទប្រុស អាយុប្រហែល១៨ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ រងរបួសធ្ងន់ចំក្បាលផ្នែកខាងក្រោយ ស្លាប់តាមផ្លូវ ពេលកំពុងបញ្ជូនតាមឡានសង្គ្រោះទៅមន្ទីពេទ្យបង្អែកក្រុងប៉ោយប៉ែត។
និងទី២-ឈ្មោះ ប៉ាវ ពិសី ភេទប្រុស អាយុប្រហែល១៥ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ របួសធ្ងន់ ត្រូវបានឡានសង្គ្រោះបញ្ជូនទៅព្យាបាលនៅមន្ទីពេទ្យបង្អែកក្រុងប៉ោងប៉ែត ។
លោកអធិការបានបញ្ជាក់ថា ក្រោយធ្វើសកម្មភាព កម្លាំងប៉ុស្តិ៍នគរបាលរដ្ឋបាលអូរស្រឡៅ សហការជាមួយកម្លាំងប៉ុស្តិ៍នគរបាលរដ្ឋបាលម៉ាឡៃ ធ្វើការឃាត់ខ្លួនជនសង្ស័យ បានចំនួន៣នាក់ រួមមាន ៖
១-ឈ្មោះ វេត បូរី ភេទប្រុស អាយុ១៥ឆ្នាំ រស់នៅភូមិត្រសេកជ្រុំ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។
២-ឈ្មោះ សំ ផុង ភេទប្រុស អាយុ១៤ឆ្នាំ រស់នៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
៣-ឈ្មោះ សៅ ទីងសែង ភេទប្រុស អាយុ១៦ឆ្នាំ រស់នៅភូមិសង្កែ ឃុំបឹងបែង ស្រុកម៉ាឡៃ។
លោកវរសេនីយ៍ឯក បេន សំអាត បានឲ្យដឹងទៀតថា បើតាមការសាកសួរចម្លើយជនសង្ស័យទាំង៣នាក់ បានសារភាពថា មូលហេតុដែលពួកគេចាំស្ទាក់ផ្លូវយកដុំថ្មគប់ទៅលើជនរងគ្រោះ ពេលកំពុងជិៈម៉ូតូ ក៏ព្រោះពួកគេមានគំនុំ ជាមួយជនរងគ្រោះពីមុនមក ។
បច្ចុប្បន្ន ជនសង្ស័យទាំង០៣នាក់ ត្រូវបានមន្ត្រីនគរបាលជំនាញកំពុងរៀបចំសំណុំរឿងបញ្ជូនខ្លួនទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធី ៕
ចែករំលែកព័តមាននេះ