រាជធានីភ្នំពេញ ៖ បន្ទាប់ពីមានករណីជនសង្ស័យ២នាក់បានធ្វើសកម្មភាពផ្លោះឡើងរបងផ្ទះរបស់ប្រជាពលរដ្ឋលួចទ្រព្យសម្បត្តិនោះ ពេលនេះ ជនទាំង២នាក់ត្រូវបានឃាត់ខ្លួនហើយ ។
យោងតាមផេកស្នងការរាជធានីភ្នំពេញបានឱ្យដឹងថា ក្រោយពីមានសារព័ត៌មានផ្សព្វផ្សាយករណីផ្លោះរបងចូលទៅក្នុងផ្ទះលួចទ្រព្យសម្បត្តិប្រជាពលរដ្ឋនៅសង្កាត់បឹងកក់១ ខណ្ឌទួលគោក បច្ចុប្បន្ន សមត្ថកិច្ចជំនាញបានស្រាវជ្រាវឃាត់ខ្លួនចំនួន០២នាក់ ។
ដោយមានបញ្ជាដឹកនាំពីលោកវរសេនីយ៍ឯក ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ និងលោកឧត្តមសេនីយ៍ត្រី លី ប៊ុនអេង ស្នងការរងទទួលដឹកនាំការិយាល័យ និងលោកអធិការនគរបាលខណ្ឌទួលគោក បានចុះស្រាវជ្រាវបង្ក្រាបករណីផ្លោះរបងចូលទៅក្នុងផ្ទះលួចទ្រព្យសម្បត្តិ និងឃាត់ជនសង្ស័យចំនួន០២នាក់នៅថ្ងៃទី១៨ ខែតុលា ឆ្នាំ២០២៣ វេលាម៉ោង១៣និង០០នាទីកម្លាំងការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ សហការជាមួយកម្លាំងអធិការដ្ឋាននគរបាលខណ្ឌទួលគោក ស្រាវជ្រាវឃាត់ខ្លួនជនសង្ស័យចំនួន០២នាក់ នៅចំណុចដីឡូតិ៍លេខ១ សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ ពាក់ព័ន្ធករណីផ្លោះរបងចូលទៅក្នុងផ្ទះលួចទ្រព្យសម្បត្តិ ប្រព្រឹត្តល្មើសនៅចំណុចផ្ទះលេខ៦ ផ្លូវលេខ២៨៥ ក្រុម៥២ ភូមិ១៣ សង្កាត់បឹងកក់១ ខណ្ឌទួលគោក រាជធានីភ្នំពេញ កាលពីថ្ងៃទី០៥ ខែតុលា ឆ្នាំ២០២៣។
សមត្ថកិច្ចឃាត់ខ្លួនជនសង្ស័យចំនួន០២នាក់៖ ១-ឈ្មោះ សុខ វិត ភេទ ប្រុស ជនជាតិ ខ្មែរ មុខរបរ រើអេតចាយ ទីលំនៅមិនពិតប្រាកដ។ ២-ឈ្មោះ វ៉ន ខេង ភេទ ប្រុស ជនជាតិ ខ្មែរ មុខរបរ និងទីលំនៅ មិនពិតប្រាកដ។
ចំពោះសម្ភារចាប់យកមានទូរស័ព្ទដៃម៉ាកណូគៀ ពណ៌ខ្មៅ, កុំព្យូទ័រយួរដៃ(ឡេបថប់) ម៉ាកACER ពណ៌ ខ្មៅ។ សម្ភារៈបាត់បង់៖ម៉ាស៊ីនត្រជាក់ ម៉ាកPANASONIC ចំនួន០២ គ្រឿង និងស៊ុមម៉ាស៊ីនត្រជាក់ចំនួន០១។
បច្ចុប្បន្ន ជនសង្ស័យ និងសម្ភារខាងលើ កម្លាំងជំនាញការិយាល័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី ។
ចែករំលែកព័តមាននេះ