រាជធានីភ្នំពេញ ៖ អាជីវករផ្សារសាំហាន់ ប្រមាណជាង៤០នាក់ បានបន្តលើកបដាតវ៉ា នៅវេលាម៉ោងប្រមាណ២និង៣០នាទីរសៀលថ្ងៃទី១៨ ខែតុលា ឆ្នាំ២០២៣នេះ ដើម្បីទាមទារ នូវសំណើរចំនួន៧ចំណុច…
រាជធានីភ្នំពេញ ៖ អាជីវករផ្សារសាំហាន់ ប្រមាណជាង៤០នាក់ បានបន្តលើកបដាតវ៉ា នៅវេលាម៉ោងប្រមាណ២និង៣០នាទីរសៀលថ្ងៃទី១៨ ខែតុលា ឆ្នាំ២០២៣នេះ ដើម្បីទាមទារ នូវសំណើរចំនួន៧ចំណុច ។
ការតវ៉ានេះ បានផ្ទុះឡើងបន្ទាប់ពីគណៈកម្មការផ្សារ ឆ្លៀតឱកាសរុះរើតូប អាជីវករម្នាក់ ក្នុងឱកាសបុណ្យភ្ជុំបិណ្ឌ ហើយបង្ខំអោយទៅលក់ដូរ នៅតូបថ្មី ដែលអាជីវករ អះអាងថា មានតម្លៃខ្ពស់ និងលក់មិនសូវដាច់ ។
គួរបញ្ជាក់ថា ផ្សារសាំហាន់ ហៅផ្សារធំទួលសង្កែ មានទីតាំងស្ថិតនៅភូមិ បាក់ទូក សង្កាត់ទួល សង្កែទី១ ខណ្ឌឬស្សីកែវ រាជធានីភ្នំពេញ ហើយកាលពីព្រឹកថ្ងៃទី១៧ ខែតុលា ឆ្នាំ២០២៣ ម្សិលមិញនេះ មានអាជីវករប្រមាណជាង១០នាក់ បានជួបប្រមូលផ្តុំ នៅតវ៉ាម្តងមកហើយ បន្ទាប់ពី តូបកាហ្វេ លេខ០១R ដែលមានម្ចាស់ឈ្មោះ មេ ឃុន ត្រូវបានគណៈកម្មាការផ្សាររុះរើចេញ ។
តាមតំណាងរបស់អាជីវករ បានអោយដឹងថា ការតវ៉ា ដើម្បីស្នើសុំចំណុច ៧ចំណុច រួមមាន ៖
១. សុំអោយម្ចាស់ផ្សារគោរព តាមកំណត់ហេតុ កន្លងមក ដែលចេញពីអាជ្ញាធរខណ្ឌ
២. សុំអោយម្ចាស់ផ្សារ បង្ហាញអាជ្ញាប័ណ្ណបញ្ជាក់ថា ខ្លួនពិតជាម្ចាស់អាជីវកម្មពិតប្រាកដ
៣. ស្នើសុំអោយម្ចាស់ផ្សារ បញ្ចុះតម្លៃ៥០ភាគរយ លើថ្លៃឈ្មួលដី
៤. ស្នើសុំកុំអោយម្ចាស់ផ្សារយកដី មកចាក់លើផ្លូវចាស់ខាងមុខ និងខាងក្រោយតូបអាជីវករ
៥. ស្នើសុំអោយម្ចាស់ផ្សារ បើកលក់ធម្មតា នៅថ្ងៃបុណ្យទាន
៦. ស្នើសុំបញ្ចុះតម្លៃភ្លើង និងផ្គត់ផ្គង់ភ្លើងអោយបានគ្រប់គ្រាន់ដល់អាជីវករ
និង៧. ស្នើអោយលោក គឹម ឆាយ ដកពាក្យបណ្តឹងចេញ ដែលប្តឹងឈ្មោះ ស្រ៊ុន ភី (តំណាង), ឃឹម ច័ន្ទធា (អាជីវករ) និងឈ្មោះ ឡុច ស្រីម៉ី (អាជីវករ) ។
តាមអាជីវករ បានអោយដឹងថា ការតវ៉ានេះ បានផ្ទុះឡើង បន្ទាប់ពីគណៈកម្មាការផ្សារ សាំហាន់ បានលួចរុះរើតូប នៅខាងមុខ នៅក្នុងឱកាសបុណ្យភ្ជុំបិណ្ឌ ហើយបានអោយម្ចាស់តូប ទៅលក់នៅតូបថ្មី ដែលរៀបចំរួច ជាស្រេច។ ម្យ៉ាងទៀត តូបថ្មី មានទំហំតូច និងថ្លៃគ្រាន់តែ កុងត្រាដំបូង រយៈពេល២ឆ្នាំ ត្រូវបង់២,៥០០ដុល្លារ និងបង់ជាប្រចាំខែ ១ខែ ២០០ដុល្លារ ហើយលក់មិនសូវដាច់ទៀត ។
លោក គឹម ឆាយ ប្រធានគណៈកម្មការផ្សារ បានអោយដឹងថា ចំណុចទាំង៧ ដែលអាជីវករ តវ៉ាស្នើសុំ ត្រូវបានដោះស្រាយចប់រួចរាល់យូរហើយ នៅសាលាខណ្ឌឬស្សីកែវ។ ហើយការតវ៉ាថ្មី មានតែ ១តូបទេ ដែលត្រូវបានគណៈកម្មការផ្សាររុះរើសតូបចាស់ លេខ០១R ហើយគាត់ទៅលក់ដូរនៅតូបថ្មី ដែលគាត់ពុំព្រម ។
តាមប្រធានគណៈកម្មការផ្សាររូបនោះ បានអោយដឹងទៀតថា នៅក្នុងការរុះរើ តូបចាស់ ធ្វើតូបថ្មី ដើម្បីរៀបចំកែលំអរ ធ្វើប្រព័ន្ធលូ អោយមានអនាម័យ និងសោភណ្ឌភាព។ នៅក្នុងការរុះរើ អាជីវករបានឯកភាព នៅសល់តែ១តូប គាត់ពុំព្រម ហើយផ្សារបានជូនដំណឹង ចំនួន៣លើកមកហើយ នៅតែមិនព្រមរុះរើ ទើបផ្សារបានរុះរើតែម្តង។ នៅរសៀលនោះដែរ អាជីវករ ក៏បាននាំគ្នា ទៅភូមិគ្រឹះសម្តេចតេជោ ផងដែរតែក្រោយមក ក៏មានការសម្របសម្រួលពីអាជ្ញាធរ ដោយសន្យាថា នឹងជួបដោះស្រាយ នៅស្អែក ទើបក្រុមអាជីវករ ព្រមត្រឡប់មកវិញ ៕
ចែករំលែកព័តមាននេះ