ម្ចាស់ម៉ូតូជួបជុំមិត្តភក្តិផឹកស៊ីនៅរមណីយដ្ឋានមួយកន្លែង រហូតដល់ស្រវឹងជោកជាំ ក៏បើកបរម៉ូតូក្នុងល្បឿនលឿន ហើយជ្រុលទៅបុ.ករថយន្ត នៅត្រង់ចំណុចផ្លូវបែកជា៣ បណ្ដាលឲ្យមនុស្សរងរបួសធ្ងន់ស្រាលចំនួន២នាក់
ខេត្តប៉ៃលិន ៖ ម្ចាស់ម៉ូតូជួបជុំមិត្តភក្តិផឹកស៊ីនៅរមណីយដ្ឋានមួយកន្លែង រហូតដល់ស្រវឹងជោកជាំ ក៏បើកបរម៉ូតូក្នុងល្បឿនលឿន ហើយជ្រុលទៅបុ.ករថយន្ត នៅត្រង់ចំណុចផ្លូវបែកជា៣ បណ្ដាលឲ្យមនុស្សរងរបួសធ្ងន់ស្រាលចំនួន២នាក់ ខូចខាតរថយន្ត និងម៉ូតូកម្រិតធ្ងន់ទាំង២គ្រឿង។ ក្រោយកើតហេតុ អ្នករងរបួសធ្ងន់ស្រាលត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត តែដោយសារម្នាក់របួសធ្ងន់ធ្ងរពេក ក៏ត្រូវបញ្ជូនបន្តទៅមន្ទីរពេទ្យខេត្តបាត់ដំបង។ ចំណែកម្ចាស់រថយន្តវិញ ដោយសារភ័យខ្លាំងពេក ក៏បើកទ្វាររថយន្ត រួចរត់គេចខ្លួនបាត់។
ហេតុការណ៍ស្រវឹងស្រានាឱកាសបុណ្យភ្ជុំបិណ្ឌ រួចបើកបរម៉ូតូក្នុងល្បឿនលឿនទៅបុ.កជាមួយរថយន្តបណ្តាលឱ្យរងរបួសធ្ងន់ស្រាលខាងលើនេះ បានកើតឡើងកាលពីវេលាម៉ោង៤និង២០នាទីល្ងាច ថ្ងៃទី១៤ ខែតុលា ឆ្នាំ២០២៣ នៅលើកំណាត់ផ្លូវក្រាលកៅស៊ូ ត្រង់ចំណុចផ្លូវបំបែកសាលារៀនបរយ៉ាខា ស្ថិតក្នុងភូមិរោងចក្រ សង្កាត់បរយ៉ាខា ក្រុងប៉ៃលិន ខេត្តប៉ៃលិន។
ប្រភពព័ត៌មានពីមន្ត្រីនគរបាលបានឱ្យដឹងថា ភាគីបង្កមានឈ្មោះ ក្ដី ភេទប្រុស អាយុ១៩ឆ្នាំ រស់នៅភូមិកំរៀង ស្រុកកំរៀង ខេត្តបាត់ដំបង (រងរបួសធ្ងន់) បានបើកបរម៉ូតូម៉ាកហុងដាឌ្រីម ពណ៌ក្រហម ស៊េរីឆ្នាំ២០២២ ពាក់ស្លាកលេខ បាត់ដំបង1AI-1696 ក្នុងទិសដៅពីត្បូងទៅជើងចំណែកអ្នករួមដំណើរជាមួយមានឈ្មោះ ងួន ជីវ័ន ភេទប្រុស អាយុ១៨ឆ្នាំ រងរបួសស្រាល។ រីឯភាគីរងគ្រោះវិញ មានឈ្មោះ មិន សុវណ្ណ ភេទប្រុស អាយុ៣០ឆ្នាំ មុខរបរអ្នករត់តាក់ស៊ី (គ្មានរបួសរត់ចេញពីកន្លែងកើតហេតុបាត់) រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានបើកបររថយន្តម៉ាកតូយ៉ូតាស៊ីណា (Toyota Siena) ពណ៌ស ស៊េរីឆ្នាំ២០០៤ ពាក់ស្លាកលេខ ភ្នំពេញ2AY-1696 ក្នុងទិសដៅពីកើតទៅលិច។
ប្រភពដដែលបន្តទៀតថា មូលហេតុនៃការបង្កឱ្យមានគ្រោះថ្នាក់ចរាចរណ៍នេះកើតឡើង ដោយសារតែការបើកបរម៉ូតូក្នុងល្បឿនលឿន ហើយស្ថិតក្នុងស្ថានភាពស្រវឹងជោកជាំទៀតផង។
ទោះបីជាយ៉ាងណាក៏ដោយ បច្ចុប្បន្ន ភាគីខាងម៉ូតូត្រូវគេបញ្ជូនទៅព្យាបាលនៅមន្ទីរពេទ្យបង្អែកខេត្តបាតដំបង រីឯវត្ថុតាង ត្រូវបានកម្លាំងជំនាញចរាចរណ៍ផ្លូវគោកខេត្ត យកមករក្សាទុក ដើម្បីរង់ចាំការដោះស្រាយតាមនីតិវិធី៕
ចែករំលែកព័តមាននេះ