ខេត្តកណ្តាល ៖ បន្ទាប់ពីបាត់មុខមួយរយៈវែង ឌុន រដ្ឋា អ្នកប្រដាល់មកពីក្លឹបអេភូថងកីឡា និងវ៉ាយ សុធន់ មកពីក្លឹបប្រដាល់ខេត្តបន្ទាយមានជ័យ បានវិលត្រឡប់មកកាន់សង្វៀនប្រដាល់ម្តងទៀតហើយ ។ អ្នកទាំង២នឹងប្រកួតគ្នានៅលើសង្វៀនស្ថានីយទូរទស្សន៍ប៉ុស្តិ៍លេខ៥ ស្រុកកណ្តាលស្ទឹង ខេត្តកណ្តាល នារសៀលថ្ងៃទី២២ ឧសភា ឆ្នាំ២០១១ ។ ឌុន រដ្ឋា និងវ៉ោយ សុធន់ ជាអ្នកប្រដាល់ជើងចាស់ធ្លាប់មានបទពិសោធន៍ពេញខ្លួន និងធ្លាប់អង្រួនសង្វៀនបង្កការចាប់អារម្មណ៍ពីសំណាក់ទស្សនិកជនជាយូរមកហើយ ។ ក្នុងរយៈពេលប៉ុន្មានឆ្នាំចុងក្រោយនេះ ពួកគេបាត់មុខទាំង២នាក់ មិនដឹងជាទៅទីណាទេ ស្រាប់តែពេលនេះបានណាត់គ្នាឡើងសាកវិជ្ជាគុនសាជាថ្មី ។ ពួកគេសុទ្ធតែជាអ្នកមានស្នៀតជង្គង់ល្អ ពិសេសគឺវ៉ោយ សុធន់ ប៉ុន្តែបន្ទាប់ពីបាត់មុខយូរបែបនេះ មិនដឹងជាមានការប្រែប្រួលបែបណាទេ ។
ភុំ សារ៉ាយ មកពីក្លឹបអាជ្ញាធរជាតិអាវុធគីមីត្រូវផ្គូផ្គងឱ្យជួបប្រកួតជាមួយសិង្ហ សាវ៉ន មកពី ក្លឹបសិង្ហកីឡា ។ សារ៉ាយ និងសាវ៉ន ក៏ជាអ្នកប្រដាល់ចាស់វស្សាដែរ ដូច្នេះពួកគេមានបទពិសោធន៍ និងវិជ្ជាគុនមិនអន់ឡើយ ។ សារ៉ាយ ពីមុនមានឈ្មោះល្បីខាងការប្រើស្នៀតពិសេស និងមានកណ្តាប់ដៃធ្ងន់ ប៉ុន្តែមួយរយៈចុងក្រោយនេះ សារ៉ាយ ហាក់បីដូចជាបាត់បង់នូវកម្លាំងច្រើន ខណៈវ័យរបស់គេកាន់តែទៅមុខនោះ ។ ចំណែកសិង្ហ សាវ៉ន ក៏មិនខុសគ្នាដែរ ទោះបីគេនៅរក្សាវិជ្ជាគុនបានល្អយ៉ាងណា ក៏បញ្ហាកម្លាំង ឬថាមពលពិតជាពិបាករក្សាបាន ។ សាវ៉ន មានស្នៀតរន្ទះជើង និងជង្គង់ល្អណាស់ កន្លងមករន្ទះជើងរបស់គេធ្លាប់បំបាក់ដៃគូអស់ច្រើននាក់មកហើយ ។ ទោះបីជាបែបណា រវាងសារ៉ាយ និងសាវ៉ន ដែលត្រូវជួបគ្នានៅពេលនេះ មិនអាចទស្សន៍ទាយលទ្ធផលទុកជាមុនបានទេ។
ទេស សំខាន់ មកពីក្លឹបកងពលតូចលេខ៧០ ត្រូវប្រកួតជាមួយខុន ស៊ីចាន់ មកពីក្លឹបកងពលធំអន្តរាគមន៍លេខ៣ ខេត្តព្រះវិហារ ។ សំខាន់ និងស៊ីចាន់ សុទ្ធតែជាអ្នកប្រដាល់ដែលមានចិត្តធំដូចគ្នា ពួកគេមិនងាយចុះចាញ់ងាយៗទេ។
ពុទ្ធ ហ៊ុយ មកពីក្លឹបពុទ្ធសេរីវង្សព្រែកតាទែន ត្រូវប្រកួតជាមួយអេង សេងលាភ មកពីក្លឹបរស្មីកុមារកំព្រា ។ រីឯព្រាប ភិរម្យ មកពីក្លឹបរិទ្ធិស័ក្តិកីឡា ត្រូវប្រកួតជាមួយថាន់ ថាត មកពីក្លឹបក្រសួងការពារជាតិ ។ ពួកគេជាអ្នកប្រដាល់រលកក្រោយ តែការប្រកួតមិនអន់ទេ ។
ចំពោះការប្រកួតជាលក្ខណៈសាកល ទិត្យ សុវណ្ណគីរី មកពីក្លឹបក្រសួងកសិកម្ម ត្រូវប្រកួតជាមួយថា រា៉វី មកពីក្លឹបភ្នំពេជ្រកីឡា ។ ពីមុនទិត្យ សុវណ្ណគីរី ជាអ្នកប្រដាល់សេរី បច្ចុប្បន្នគេចូលហ្វឹកហាត់ក្នុងក្រុមជម្រើសជាតិផ្នែកសាកល៕
ចែករំលែកព័តមាននេះ