ខេត្តសៀមរាប ៖ ស្របតាមអនុសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្តី នៃកម្ពុជា នៅថ្ងៃទី១២ ខែតុលា ឆ្នាំ២០២៣ ដែលជាថ្ងៃបិណ្ឌទី១៣ នៃពិធីបុណ្យភ្ជុំបិណ្ឌ រដ្ឋបាលរាជធានីភ្នំពេញ បានរៀបចំរថយន្តក្រុងចំនួន៤៥៥គ្រឿង ដើម្បីជូនដំណើរប្រជាពលរដ្ឋទូទៅដោយឥតគិតថ្លៃ ក្នុងការធ្វើដំណើរទៅជួបជុំគ្រួសារនៅស្រុកកំណើត តាមបណ្ដាខេត្តនានា។ ក្នុងនោះរថយន្តក្រុងមកពីរាជធានីភ្នំពេញ ឆ្ពោះមកកាន់ខេត្តសៀមរាប មានចំនួនសរុប១២០គ្រឿង ដែលមានចំណតក្នុងបរិវេណមណ្ឌលរដ្ឋបាលមន្ទីរខេត្តសៀមរាប។
បើតាមប្រជាពលរដ្ឋដែលធ្វើដំណើរពីរាជធានីភ្នំពេញ មកកាន់ខេត្តសៀមរាប បានលើកឡើងថា ការធ្វើដំណើរដោយរថយន្តក្រុងរបស់រាជរដ្ឋាភិបាលនេះ មានសុវត្ថិភាព ជាពិសេសបានកាត់បន្ថយការចំណាយយ៉ាងច្រើន ខណៈសេវាដឹកជញ្ជូនឯកជនមានតម្លៃថ្លៃ។ ការឡើងជិះរថយន្តក្រុងមានភាពងាយ ពុំមានតម្រូវការបំពេញបែបបទអ្វីទាំងអស់ គ្រាន់តែប្រាប់អ្នករៀបចំថាយើងចង់ទៅខេត្តណា។ មួយវិញទៀត អ្នកបើកបរមានភាពរួសរាយរាក់ទាក់ រថយន្តមានម៉ាស៊ីនត្រជាក់ ប្រកបដោយផាសុខភាព។
ដោយឡែក លោក អុន វីរៈ បុគ្គលិករដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ បានបង្ហាញឱ្យដឹងថា ការចេញដំណើរពីរាជធានីទៅតាមបណ្ដាខេត្តនានា នៅថ្ងៃបិណ្ឌទី១៣នេះ គឺមានចំនួនច្រើន ខណៈដែលថ្ងៃដំបូងនេះ មានការចេញដំណើរពីភ្នំពេញមកសៀមរាប រហូតដល់ទៅជាង៤០គ្រឿង ដើម្បីបំពេញតម្រូវការបងប្អូនជាពលរដ្ឋយើងមកលេងស្រុកកំណើត ជាពិសេសការមកកម្សាន្តនៅខេត្តសៀមរាប។
ជាមួយគ្នានោះ ការធ្វើដំណើរនេះដែរ សម្រាប់អ្នកបើកបរ រដ្ឋបាលក្រុងបានធ្វើការណែនាំរួចជាស្រេច មុននឹងចេញដំណើរដោយត្រូវប្រុងប្រយ័ត្នខ្ពស់ ហើយមិនត្រូវមានសេពគ្រឿ.ងស្រវឹង និងត្រូវសម្រាកឲ្យបានគ្រប់គ្រាន់ផងដែរ។ ក្នុងនោះផងដែរ លោកក៏សូមការអំពាវនាវទៅដល់បងប្អូនដែលបានទទួលសេវា សូមជួយរក្សាអនាម័យ តាមរយៈការទុកដាក់សំរាមឲ្យបានត្រឹមត្រូវ។ ដោយឡែក ក៏សូមអំពាវនាវដល់បងប្អូនដែលធ្វើដំណើរលើដងផ្លូវទាំងអស់ សូមមានការយោគយល់ និងអធ្យាស្រ័យគ្នាពេលធ្វើសំណើរ ដើម្បីចៀសផុតពីគ្រោះថ្នាក់ចរាចរណ៍។
តាមរយៈការផ្ដល់ជូនមធ្យោបាយធ្វើដំណើរសាធារណៈ ដោយមិនគិតថ្លៃ ដែលមានរយៈពេល ៥ថ្ងៃ គិតចាប់ពីថ្ងៃទី១២ រហូតដល់ថ្ងៃទី១៦ ខែតុលា ឆ្នាំ២០២៣នេះ ប្រជាពលរដ្ឋបានសាទរ និងថ្លែងអំណរគុណដល់រាជរដ្ឋាភិបាល ជាពិសេសសម្ដេចធិបតី ហ៊ុន ម៉ាណែត ដែលតែងតែគិតគូរពីសុខទុក្ខប្រជាពលរដ្ឋគ្រប់កាលៈទេសៈ៕
ចែករំលែកព័តមាននេះ