អ៊ីស្រាអែល-ប៉ាឡេស្ទីន ៖ តាម CNN ផ្សាយថា ការវាយប្រហាររបស់ក្រុមហាម៉ាស់ មកលើប្រទេសអ៊ីស្រាអែល បានធ្វើឲ្យបាត់បង់ជីវិតមនុស្សជាច្រើនទាំងសងខាង មិនតែប៉ុណ្ណោះ ថែមទាំងបាត់បង់ជីវិតជនជាតិដទៃនៅជុំវិញពិភពលោក ជាមួយនឹងការកើនឡើង នៃបញ្ជីជនជាតិបរទេស ដែលត្រូវបានសម្លា.ប់ ឬចាប់ពង្រត់ (ចំណាប់ខ្មាំង) ។
អ្នកនាំពាក្យក្រសួងការបរទេសថៃ បាននិយាយនៅថ្ងៃចន្ទ ទី០៩ តុលានេះថា ជនជាតិ១២នាក់ ត្រូវបានបញ្ជាក់ច្បាស់ថា បានស្លា.ប់ និង ១១នាក់ទៀត កំពុងស្ថិតក្នុងដៃរបស់ក្រុមហាម៉ាស ចាប់ធ្វើជាចំណាប់ខ្មាំង ។
អ្នកនាំពាក្យ លោកស្រី Kanchana Patarachoke បាននិយាយថា មានជនជាតិថៃ ០៨នាក់បន្ថែមទៀត បានរងរបួសធ្ងន់ស្រាល ត្រូវបានគេបញ្ជូនទៅមន្ទីរពេទ្យ ដើម្បីសង្គ្រោះ ។
លោកស្រី បន្តថា «យើងសុំមិនបញ្ចេញឈ្មោះនោះទេ។ យើងមិនចង់ឲ្យសាច់ញាតិ ដឹងព័ត៌មានតាមប្រព័ន្ធផ្សព្វផ្សាយ មុនពេលយើងធ្វើការទំនាក់ទំនងផ្ទាល់ ជាមួយពួកគេ» ។
យោងតាមក្រសួងការបរទេសថៃ បានឱ្យដឹងថា អ៊ីស្រាអែលជាគោលដៅសំខាន់សម្រាប់ជនចំណាកស្រុកជនជាតិថៃ ជាយូរមកហើយ ដែលភាគច្រើន ធ្វើការងារកសិកម្ម ។
ក្រសួងការបរទេសថៃ អះអាងថា មានពលករថៃ ប្រមាណជា៣០,០០០នាក់ នៅអ៊ីស្រាអែល។ ហើយជាង១,០០០នាក់ បានស្នើសុំជំនួយ ឲ្យជម្លៀសចេញ នាពេលនេះ។
នាយករដ្ឋមន្ត្រីថៃ លោក សេតថា ថាវីស៊ីន បានថ្លែងនៅថ្ងៃចន្ទនេះថា រដ្ឋាភិបាលថៃ បានត្រៀមលក្ខណៈជាមួយនឹងយន្តហោះពីកងទ័ពអាកាសថៃ ដើម្បីជម្លៀសពលរដ្ឋរបស់ខ្លួន ដែលនៅសេសសល់ ៕
ចែករំលែកព័តមាននេះ