អាជ្ញាធរស្រុកជីក្រែង សហការជាមួយម្ចាស់កសិដ្ឋានចិញ្ចឹមក្រពើ ដែលរួចចេញពីទ្រុងចំនួន៣ក្បាល និងចូលផ្ទះប្រជាពលរដ្ឋ១ក្បាលនោះ ពេលនេះត្រូវចាប់បានវិញអស់ហើយ ដូច្នេះសូមបងប្អូនប្រជាពលរដ្ឋ
ខេត្តសៀមរាប ៖ អាជ្ញាធរស្រុកជីក្រែង សហការជាមួយម្ចាស់កសិដ្ឋានចិញ្ចឹមក្រពើ ដែលរួចចេញពីទ្រុងចំនួន៣ក្បាល និងចូលផ្ទះប្រជាពលរដ្ឋ១ក្បាលនោះ ពេលនេះត្រូវចាប់បានវិញអស់ហើយ ដូច្នេះសូមបងប្អូនប្រជាពលរដ្ឋកុំមានការព្រួយបារម្ភបន្តទៅទៀត។
ហេតុការណ៍សត្វក្រពើរួចចេញទ្រុង៣ក្បាលខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោង៥ល្ងាច ថ្ងៃទី៦ ខែតុលា ឆ្នាំ២០២៣ ស្ថិតនៅក្នុងភូមិត្រពាំងត្រាវ ឃុំគោកធ្លកក្រោម ស្រុកជីក្រែង ខេត្តសៀមរាប ហើយត្រូវអាជ្ញាធរស្រុកជីក្រែង សហការជាមួយម្ចាស់កសិដ្ឋានចិញ្ចឹមក្រពើ ចាប់បានមកវិញនៅវេលាម៉ោង៩យប់ថ្ងៃដដែល។
បើតាមលោកវរសេនីយ៍ឯក តាំង លីហេង អធិការនគរបាលស្រុកជីក្រែង បានប្រាប់ឱ្យដឹងនៅរសៀលថ្ងៃទី៦ ខែតុលា ឆ្នាំ២០២៣ ថា «ករណីសត្វក្រពើរួចចេញពីអាងចិញ្ចឹមក្រពើ នៅត្រង់ចំណុចផ្លូវលំក្រាលកៅស៊ូ (ដីរបងព័ទ្ធជុំវិញ និងអាងក្រពើ) ស្ថិតនៅក្នុងភូមិត្រពាំងត្រាវ ឃុំគោកធ្លកក្រោម ស្រុកជីក្រែង ខេត្តសៀមរាបនោះ បានរកឃើញវិញទាំងអស់ហើយ»។
លោកបន្តថា «ម្ចាស់អាងក្រពើដែលរួចសត្វក្រពើនោះ មានឈ្មោះ ឆៃ វីតា ភេទប្រុស អាយុ៣៨ឆ្នាំ រស់នៅភូមិអន្លង់ ឃុំគោកធ្លកក្រោម ស្រុកជីក្រែង ខេត្តសៀមរាប។ ហើយចំពោះមូលហេតុធ្វើឱ្យសត្វក្រពើរួចចេញពីអាងចិញ្ចឹមក្រពើនេះ គឺមកពីអ្នកដែលជួយចិញ្ចឹមសត្វក្រពើមានការធ្វេសប្រហែស បណ្ដាលឱ្យសត្វក្រពើរួចចេញពីអាងចិញ្ចឹមក្រពើ ដោយសារតែភ្លៀងខ្លាំងទឹកលិច»។
លោកបន្ថែមទៀតថា «តាមការបញ្ជាក់ពីម្ចាស់មានឈ្មោះ ឆៃ វីតា បានរាយការណ៍ថា សត្វក្រពើដែលរួចចេញពីអាងចំនួន៣ក្បាល ហើយគាត់បានចិញ្ចឹមសត្វក្រពើអាយុ២ឆ្នាំមានចំនួន៣០០ក្បាល និងពងក្រពើចំនួន១០០០ក្បាលសម្រាប់ភ្ញាស់លក់»។
ចំណែកលោក បូ ម៉េងទ្រី អភិបាលស្រុកជីក្រែង ក៏បានប្រាប់ឱ្យដឹងដែរថា «សូមពលរដ្ឋ ក៏ដូចជា មហាជនកុំមានការព្រួយបារម្ភអំពីករណីសត្វក្រពើរួចចេញអាងនេះទៀត ព្រោះថា សមត្ថកិច្ច និងម្ចាស់កសិដ្ឋានបានរកឃើញវិញអស់ហើយ»។ លោកបន្តថា «ចំពោះទីតាំងរួចនោះ មិនមែននៅជាប់មាត់ស្ទឹងជីក្រែងនោះទេ។ ករណីនេះ អាជ្ញាធរនឹងមានវិធានការឲ្យម្ចាស់កសិដ្ឋានចិញ្ចឹមក្រពើខាងលើ រៀបចំទីតាំងនេះឱ្យបានត្រឹមត្រូវឡើងវិញទៅតាមស្តង់ដា»។
រីឯប្រភពព័ត៌មានពីពលរដ្ឋ បានប្រាប់ដែរថា «ករណីដែលធ្លាយរឿងរួចសត្វក្រពើនឹង គឺបណ្ដាលមកពីអ្នកជិតខាងជាប់នឹងអាងក្រពើនោះ បានបង្ហោះ Facebook ទើបមានការចាប់អារម្មណ៍តែម្តង»។
លោកបន្ថែមថា «សូមបងប្អូនប្រជាពលរដ្ឋរាយការណ៍មកអាជ្ញាធរភ្លាម ក្នុងករណីអាចមានក្រពើភ្នំមកពីបែកខាងលើជួរភ្នំ ឬក្រពើឡើងមកពីទន្លេសាប ដែលអាចមាននៅសេសសល់កន្លងមក ដូច្នេះបើសិនជាបានប្រទះឃើញ សូមរាយការណ៍មកអាជ្ញាធរមូលដ្ឋានភ្លាមៗ ។
លោកបានថែមទៀតថា សូមឱ្យប្រជាពលរដ្ឋមានការប្រុងប្រយ័ត្ន ចំពោះកុមារតូចៗដែលចូលចិត្តលេងទឹក សូមឱ្យពួកគាត់ប្រុងប្រយ័ត្នឱ្យបានខ្ពស់ ចៀសវាងមានការគ្រោះថ្នាក់ដោយប្រការណាមួយនោះ៕
ចែករំលែកព័តមាននេះ